ବେଜିଂ,୬।୧: ଚାଇନା ସେନା ଭାରତ ସୀମାକୁ ଲାଗି ରହିଥିବା ଉଚ୍ଚସ୍ଥାନ ତିବ୍ବତରେ ବଡ ଧରଣର ସମରାଭ୍ୟାସ କରୁଥିବା ସୂଚନା ମିଳିଛି। ସେଠାରେ ଚାଇନା ସେନା ପକ୍ଷରୁ ଟାଇପ୍ ୧୫ ହାଲୁକା ଯୁଦ୍ଧ ଟ୍ୟାଙ୍କ ଓ ନୂଆ ୧୫ ଏମ୍ଏମ୍ ଯାନ ଉପରେ ତୋପକୁ ରଖିଥିବା ଜଣାପଡିଛି। ନ୍ୟୁଜ ଏଜେନ୍ସି ‘ଗ୍ଲୋବାଲ ଟାଇମ୍ସ’ର ସୂଚନା ଅନୁଯାୟୀ ପିପୁଲ୍ସ ଲିବରେଶନ ଆର୍ମି(ପିଏଲ୍ଏ) ତିବ୍ବତ ସେନା କମାଣ୍ଡ ପକ୍ଷରୁ ନୂଆବର୍ଷରୁ ଏହି ସମରାଭ୍ୟାସ ଆରମ୍ଭ କରାଯାଇଛି। ଏହାସହ ତିବ୍ବତର ରାଜଧାନୀ ଲ୍ୟାସାରେ ଶକ୍ତିଶାଳୀ କ୍ଷେପଣାସ୍ତ୍ର ମଧ୍ୟ ମହଜୁଦ ରଖିଛି। ସୂଚନାଯୋଗ୍ୟ, ଭାରତ ଓ ଚାଇନାର ବାସ୍ତବିକ ନିୟନ୍ତ୍ରଣ ରେଖା ୩,୪୮୮ କିଲୋମିଟର ଲମ୍ବା ଯାହା ଅରୁଣାଚଳ ପ୍ରଦେଶରୁ ସିକ୍କିମ ପର୍ଯ୍ୟନ୍ତ ରହିଛି। ଚାଇନା ଦାବି କରୁଛି କି ଅରୁଣାଚଳ ପ୍ରଦେଶ ଦକ୍ଷିଣ ତିବ୍ବତର ଅଂଶ।
