ଭୁବନେଶ୍ୱର,୧।୨(ବ୍ୟୁରୋ): ବାଂଲାଦେଶୀ ଯୁବତୀଙ୍କୁ ଓଡ଼ିଶା ଚାଲାଣ କରି ଦେହ ବ୍ୟବସାୟରେ ଲଗାଇବା ମାମଲାରେ କ୍ରାଇମବ୍ରାଞ୍ଚ ଏସ୍ଟିଏଫ୍ ହାତରେ ଏବେ ଆଉ ଏକ ବଡ଼ ସୁରାକ ଲାଗିଛି। ଏହି ର଼୍ୟାକେଟର କିଙ୍ଗ୍ପିନ୍ ଅଞ୍ଜଳି ଦିଦି ଓ ତାଙ୍କ ସ୍ବାମୀ ଇବ୍ରାହିମ୍ଙ୍କୁ ଶୁକ୍ରବାର ରିମାଣ୍ଡରେ ଆଣି ଦିନତମାମା ମାରାଥନ ଜେରା କରିଛି ଏସ୍ଟିଏଫ୍। ତଦନ୍ତ ଓ ପଚରାଉଚରାବେଳେ ମିଳିଥିବା ତଥ୍ୟ ଅନୁସାରେ ବାଂଲାଦେଶରୁ ଯୁବତୀ ଚାଲାଣ ରୁଟ୍ ସହ ସମ୍ପୃକ୍ତ ମାଷ୍ଟରମାଇଣ୍ଡ୍ ଓ ଦଲାଲଙ୍କ ତାଲିକା ପ୍ରସ୍ତୁତ କରାଯାଇଛି। ସେହି ତାଲିକା ଧରି ଏସ୍ଟିଏଫ୍ ଟିମ୍ ଅଧିକ ଖୋଳତାଡ଼ ପାଇଁ ଶୁକ୍ରବାର କୋଲକତା ଯାତ୍ରା କରିଛି। ତେବେ ଆବଶ୍ୟକ ପଡ଼ିଲେ ଏହି ଟିମ୍ ବାଂଲାଦେଶ ଯାଇପାରେ ବୋଲି ସୂଚନା ମିଳିଛି।
ମିଳିଥିବା ସୂଚନାନୁସାରେ, ସମ୍ପୃକ୍ତ ଦଲାଲମାନେ ବାଂଲାଦେଶ ସୀମା ନିକଟରୁ ଯୁବତୀଙ୍କୁ ଆଣି କୋଲକତା ସହରରେ ଥିବା ଏକ ହୋଟେଲରେ ରଖୁଥିଲେ। ପରେ ଅଞ୍ଜଳିଙ୍କ ସହ ଯୋଗାଯୋଗ କରାଯାଇ ଅନ୍ୟ କେତେଜଣ ଦଲାଙ୍କ ସହ ଓଡ଼ିଶା ପଠାଯାଇ ସେକ୍ସ ର଼୍ୟାକେଟରେ ନିୟୋଜିତ କରାଯାଉଥିଲା। ଦଲାଲଙ୍କୁ ଧରି ଅଧିକ ତଥ୍ୟ ପାଇବାକୁ ଆଶା ରଖିଛି ଏସ୍ଟିଏଫ୍। ଏପରି କି କୋଲକତା ପୋଲିସ ଓ ବିଏସ୍ଏଫ୍ ମୁଖ୍ୟଙ୍କ ସହ ଆଲୋଚନା କରାଯିବ। ବାଂଲାଦେଶୀ ଯୁବତୀଙ୍କ ବେଆଇନ ପ୍ରବେଶ ରୋକାଯିବା ସହ ଏଥିରେ ସମ୍ପୃକ୍ତ ପୋଲିସ ଅଧିକାରୀ ଓ କର୍ମଚାରୀଙ୍କ ସଂକ୍ରାନ୍ତରେ ସେମାନଙ୍କୁ ଅବଗତ କରାଇ ପଦକ୍ଷେପ ଗ୍ରହଣ କରିବାକୁ ଏସ୍ଟିଏଫ୍ ଯୋଜନା କରିଛି।
ଅନ୍ୟପକ୍ଷରେ, ଡିଆଇଜି ର଼୍ୟାଙ୍କ୍ର ଜଣେ ଅଧିକାରୀ ଅଞ୍ଜଳି ଓ ଇବ୍ରାହିମଙ୍କୁ ପଚରାଉଚରାବେଳେ ଯୁବତୀ ଚାଲାଣ ର଼୍ୟାକେଟର ବହୁ ତଥ୍ୟ ମିଳିଥିବା କୁହାଯାଉଛି। ଏହାସହ ଲକ୍ଷ୍ମୀସାଗର ଥାନା ପୋଲିସ ଗିରଫ କରିଥିବା ୩ ଦଲାଲ, ପୁରୁଣା ଭୁବନେଶ୍ୱର ଅଞ୍ଚଳରୁ ଧରାପଡ଼ିଥିବା ୬ଜଣ ରୂପଜୀବୀଙ୍କ ସହ ଅଞ୍ଜଳି ଓ ଇବ୍ରାହିମ୍ଙ୍କୁ ଶନିବାର ମୁହାଁମୁହିଁ ଜେରା କରାଯିବ। ଜାଲ୍ ଆଧାରକାର୍ଡ ଓ କାଗଜପତ୍ର ତିଆରି କରୁଥିବା ସମ୍ବିତ୍ଙ୍କ ବିଷୟରେ ମଧ୍ୟ ପଚରାଉଚରା କରାଯିବ। ପ୍ରମାଣ ମିଳିଲେ ଏସ୍ଟିଏଫ୍ ସମ୍ବିତକୁ ଗିରଫ କରିପାରେ ବୋଲି କୁହାଯାଉଛି।
