ଦିଗପହଣ୍ଡି,୨୯ା୧୦(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବି.ତୁରୁବୁଡି ଗ୍ରାମ ନିକଟସ୍ଥ କେରାଣ୍ଡିମାଳ ପର୍ବତ ଶୀର୍ଷରେ ପୂଜା ପାଉଥିବା ସମଗ୍ର ଦକ୍ଷିଣ ଓଡ଼ିଶାର ଅଧିଷ୍ଠାତ୍ରୀ ଦେବୀ ମା’ ସିଦ୍ଧ ବାଙ୍କେଶ୍ୱରୀ ପ୍ରତ୍ୟକ୍ଷ ଦେବୀ ଭାବେ ବିଦ୍ୟମାନ। ମା’ ସମସ୍ତ ଭକ୍ତଙ୍କ ମନବାଞ୍ଛା ପୂର୍ଣ୍ଣ କରିଥାନ୍ତି। ବାତ୍ୟା ‘ଅର୍ଣ୍ଣବ’ ପ୍ରଭାବରେ ୨ ଦିନଧରି ପ୍ରବଳ ବର୍ଷା ଯୋଗୁ ପାହାଡ଼ରୁ ଅତଡ଼ା ଖସିବାରୁ ମା’ ସିଦ୍ଧ ବାଙ୍କେଶ୍ୱରୀଙ୍କ ପୀଠକୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। ପାହାଡ଼ରୁ ବର୍ଷାପାଣି ଓ ଝରଣା ପାଣି ରାସ୍ତା ଉପରକୁ ମାଡ଼ି ଆସିବାରୁ ରାସ୍ତାଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ମା’ ସମସ୍ତ ଭକ୍ତଙ୍କ ମନବାଞ୍ଛା ପୂର୍ଣ୍ଣ କରିଥାନ୍ତି। ଏଣୁ ଏହି ବିଶ୍ବାସ ନେଇ ଶ୍ରଦ୍ଧାଳୁମାନେ ପୂର୍ବରୁ ଦୁର୍ଗମ ଜଙ୍ଗଲ ରାସ୍ତା ଅତିକ୍ରମ କରି ଏଠାକୁ ଆସୁଥିଲେ। ପରେ ଅଞ୍ଚଳବାସୀଙ୍କ ବହୁବାର ଉଦ୍ୟମ କ୍ରମେ ଦିଗପହଣ୍ଡି ପୂର୍ତ୍ତ ବିଭାଗ ପକ୍ଷରୁ ରାସ୍ତା ନିର୍ମାଣ କରାଯାଇଥିଲା। ପରବର୍ତ୍ତୀ ସମୟରେ କେରାଣ୍ଡି ମାଳ ପର୍ବତ ଉପରେ ଥିବା ନିଜ ବାଙ୍କେଶ୍ୱରୀ ଶକ୍ତିପୀଠ ରାସ୍ତାକୁ ଚଉଡ଼ା କରାଯିବା, ଶକ୍ତିପୀଠକୁ ଅଗ୍ରଣୀ ପର୍ଯ୍ୟଟନୀ ସ୍ଥଳୀରେ ପରିଣତ କରାଯିବା, ଯାତ୍ରୀଙ୍କ ରହିବା ସକାଶେ ପାନ୍ଥନିବାସ ନିର୍ମାଣ କରିବା ପାଇଁ ବିଭାଗୀୟ ମନ୍ତ୍ରୀଙ୍କ ସହ ସେ ଆଲୋଚନା କରିବେ ବୋଲି ଗତ ୨୦୨୪ ଅକ୍ଟୋବର ୪ ତାରିଖରେ ଦିଗପହଣ୍ଡି ବିଧାୟକ ଡ.ସିଦ୍ଧାନ୍ତ ମହାପାତ୍ର ବାଙ୍କେଶ୍ୱରୀଙ୍କ ପୀଠ ରେ ଆୟୋଜିତ ଏକ ସଭାରେ ବିଭିନ୍ନ ଗ୍ରାମରୁ ଆସିଥିବା ଲୋକଙ୍କୁ ପ୍ରତିଶ୍ରୁତି ଦେଇଥିଲେ। କିନ୍ତୁ ଏହି ଶକ୍ତିପୀଠକୁ ଆଜି ଯାଏ ପକ୍କା ରାସ୍ତା ନିର୍ମାଣ ହୋଇପାରି ନ ଥିବା ଜଣାପଡିଛି। ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଏହି ରାସ୍ତାକୁ ତୁରନ୍ତ ଯୁଦ୍ଧକାଳୀନ ଭିତ୍ତିରେ ନିର୍ମାଣ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
