ଢେଙ୍କିକୋଟ, ୧୮ା୧୨(ଡି.ଏନ୍.ଏ.)- ଘଟଗାଁ ବ୍ଲକର ଅଗ୍ରଣୀ ଢେଙ୍କିକୋଟ ଲ୍ୟାମ୍ପରେ ମଙ୍ଗଳବାର ପୂର୍ବାହ୍ନ ୧୧ଟାବେଳେ ଚାଷୀମାନଙ୍କଠାରୁ ଧାନ କିଣା ଆରମ୍ଭ ହୋଇଛଇ। ଲ୍ୟାମ୍ପର ସଭାପତି ଈଶ୍ୱର ଚନ୍ଦ୍ର ନାୟକ, ଧାନକଣ୍ଟାକୁ ଧୂପଦୀପ ଜାଳିବା ସହ ନଡ଼ିଆ ବାଡ଼େଇ ଧାନକିଣା ଆରମ୍ଭ କରିଛନ୍ତି। ଏହି ଅବସରରେ ଲ୍ୟାମ୍ପର ପରିଚାଳନା ନିର୍ଦ୍ଦେଶକ ଅକ୍ଷୟ କୁମାର ମହାନ୍ତ, ଲ୍ୟାମ୍ପ କର୍ମଚାରୀ ଚିନ୍ମୟ ନାୟକ, ସୁରେନ୍ଦ୍ର ନାୟକ, ଦଶରଥ ମହାନ୍ତ ପ୍ରମୁଖ ଉପସ୍ଥିତ ରହିଥିବାବେଳେ ପ୍ରଥମ କିସ୍ତି ଟୋକନ ୨୯ ଜଣ ଚାଷୀ ପାଇଥିବା ପରିଚାଳନା ନିର୍ଦ୍ଦେଶକ ଅକ୍ଷୟ ମହାନ୍ତ ପ୍ରକାଶ କରିଛନ୍ତି। ଧାନର ମାନ ମେଶିିନ ଦ୍ୱାରା ଯାଞ୍ଚ କରାଯାଇ ଧାନ କିଣାଯାଉଛି। ରାଜ୍ୟ ସରକାରଙ୍କ ଧାର୍ଯ୍ୟ ମୂଲ୍ୟ ଚାଷୀମାନେ ପାଉଥିବା ପ୍ରକାଶ କରିଛନ୍ତି। ମଣ୍ଡିକୁ ଚାଷୀମାନେ ଟ୍ରାକ୍ଟର ସାହାଯ୍ୟରେ ଧାନ ଆଣି ଜମା ରଖିଛନ୍ତି। ପ୍ରଥମ ଦିନରେ କେନ୍ଦୁଝର ଜିଲା ପାଟଣା ବ୍ଲକରେ ଥିବା ବୈତରଣୀ ରାଇସ୍ମିଲ୍ ଢେଙ୍କିକୋଟ ଲ୍ୟାମ୍ପରୁ ଧାନ କିଣିଛନ୍ତି। ଢେଙ୍କିକୋଟ ଲ୍ୟାମ୍ପରେ ସପ୍ତାହର ପ୍ରତ୍ୟେକ ମଙ୍ଗଳବାର ଏବଂ ଶୁକ୍ରବାର ଚାଷୀମାନଙ୍କ ନିର୍ଦ୍ଧାରିତ ଟୋକନଧାରୀଙ୍କଠାରୁ ଧାନ କିଣାଯିବାର ସ୍ଥିର କରାଯାଇଥିବାବେଳେ ଲ୍ୟାମ୍ପ ଅଧୀନରେ ଥିବା ଶାଖା, ପିପିଳିଆ ଲ୍ୟାମ୍ପରେ ବୁଧବାର, ସୋମବାର, ପଣ୍ଡାପଡ଼ା ଲ୍ୟାମ୍ପରେ ସୋମବାର ଓ ଶୁକ୍ରବାର ଏବଂ ଘଟଗାଁ ଲ୍ୟାମ୍ପରେ ବୁଧବାର, ଶନିବାର ଧାନକିଣା ଯିବା ପାଇଁ ଦିନ ଧାର୍ଯ୍ୟ କରାଯାଇଛି। ଘଟଗାଁ ବ୍ଲକରେ ଥିବା ୨୭ ପଞ୍ଚାୟତର ଚାଷୀ ନିଜ ନିଜ ପାଖ ଶାଖା ଲ୍ୟାମ୍ପମାନଙ୍କରେ ଟୋକନ ପାଇ ଧାନ ବିକ୍ରି କରିବାକୁ ଆସିଥିଲେ। ରାଜ୍ୟ ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ ଚାଷୀମାନେ ଅନ୍ଲାଇନ୍ରେ ନିଜର ନାମ ପଞ୍ଜୀକରଣ କରାଇ ଆସୁଛନ୍ତି। ବିନା ଟୋକନରେ ଧାନ କିଣିବା ପାଇଁ କୌଣସି ନିର୍ଦ୍ଦେଶ ରାଜ୍ୟ ସରକାରଙ୍କଠାରୁ ଆସି ନ ଥିବା କଥା ଲ୍ୟାମ୍ପ ପରିଚାଳନା ନିର୍ଦ୍ଦେଶକ କହିଛନ୍ତି।
ଫଟୋ
