ପ୍ୟାରିସ,୧୨।୮(ଏଏଫ୍ପି)- ୟୁଏସ୍ ଓ ଅଷ୍ଟ୍ରେଲିଆନ ଓପନ ଚାମ୍ପିୟନ ନାଓମି ଓସାକା ଡବ୍ଲ୍ୟୁଟିଏ ର଼୍ୟାଙ୍କିଙ୍ଗ୍ ଶୀର୍ଷକୁ ଫେରିିଛନ୍ତି। ୨୧ ବର୍ଷୀୟ ଜାପାନିଜ ଖେଳାଳି ଗତ ସପ୍ତାହରେ ରୋଜର୍ସ କପ କ୍ୱାର୍ଟର ଫାଇନାଲରେ ସେରେନା ଓ୍ବିଲିୟମ୍ସଙ୍କଠାରୁ ହାରିଯାଇଥିଲେ। ହେଲେ ପୂର୍ବତନ ନଂ ୧ ଖେଳାଳି ଆଶ୍ଲେ ବାର୍ଟି ଉକ୍ତ ଟୁର୍ନାମେଣ୍ଟର ଦ୍ୱିତୀୟ ରାଉଣ୍ଡରେ ହାରିଥିବାବେଳେ କାରୋଲିନା ପ୍ଲିସ୍କୋଭା ଟରଣ୍ଟୋ ଟୁର୍ନାମେଣ୍ଟର ସେମିଫାଇନାଲରେ ପ୍ରବେଶ କରିପାରି ନ ଥିଲେ। ଏଥିଯୋଗୁ ଓସାକା ଶୀର୍ଷ ସ୍ଥାନ ହାତେଇ ନେଇଛନ୍ତି। ନ୍ୟୁୟର୍କ ଓ ମେଲବୋର୍ନଠାରେ କ୍ରମାଗତ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଜିତିବା ପରେ ଚଳିତ ବର୍ଷ ଜାନୁୟାରୀରେ ସେ କ୍ୟାରିୟରରେ ପ୍ରଥମ ଥର ପାଇଁ ନଂ ୧ ମାନ୍ୟତା ପାଇଥିଲେ। ୭ ସପ୍ତାହ ପରେ ସେ ସ୍ଥାନ ହରାଇଥିଲେ। ଏହା ବ୍ୟତୀତ ଟପ୍ ୧୦ରେ ଆଉ ଏକ ପରିବର୍ତ୍ତନ ହୋଇଛି। ପୂର୍ବାପେକ୍ଷା ଓ୍ବିଲିୟମ୍ସ ଦୁଇ ସୋପାନ ଉପରକୁ ଉଠି ୮ମ ସ୍ଥାନ ଅଧିକାର କରିଛନ୍ତି।
