ବାଲିକୁଦା,୧୧ା୬(ସ୍ବ.ପ୍ର.): ବାଲିକୁଦା ଥାନା ଅଧୀନ କନ୍ଦରପୁର-ନୂଆଗଁା ରାସ୍ତାର ଗୋପାଳପୁର ଛକଠାରୁ ୧୦୦ ମିଟର ଦୂରରେ ଗୁରୁବାର ଏକ ଦୁର୍ଘଟଣା ଘଟିଛି। ଏକ ପଥର ବୋଝେଇ ଟ୍ରକ୍ ବାଇକ୍ ଚାଳକଙ୍କ ଉପରେ ଚଢ଼ିଯିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ମୃତକ ହେଲେ ସ୍ଥାନୀୟ ଗରାମ ଗ୍ରାମର ସିଆର୍ସିସି ପ୍ରଶାନ୍ତ ପଣ୍ଡା(୪୫)। ଦୁର୍ଘଟଣା ପରେ ଟ୍ରକ୍ ଭାରସାମ୍ୟ ହରାଇ ଗଛରେ ପିଟି ହୋଇଯିବାରୁ ଉକ୍ତ ରାସ୍ତା ୧ ଘଣ୍ଟା ଜାମ୍ ହୋଇଥିଲା। ଫଳରେ ଯାତାୟାତ ଠପ ହୋଇ ଯାଇଥିଲା। ଖବର ପାଇ ବାଲିକୁଦା ଓ ଜଗତ୍ସିଂହପୁର ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲେ। ପ୍ରଶାନ୍ତଙ୍କ ଉପରେ ଟ୍ରକ୍ ଚଢ଼ିଯାଇଥିବାରୁ ଅଣ୍ଟାଠାରୁ ମୁଣ୍ଡ ପର୍ଯ୍ୟନ୍ତ ରାସ୍ତାରେ ମିଶି ଯାଇଥିଲା। ପୋଲିସ ଛିନ୍ଭିନ୍ ହୋଇଥିବା ମାଂଶ ଟୁକୁରାକୁ ଏକାଠି କରି ବ୍ୟବଚ୍ଛେଦ ପାଇଁ ପଠାଇଥିଲା। ବାଲିକୁଦା ପୋଲିସ ଦୁଇ ଗାଡ଼ିକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି।
ସୂଚନା ଅନୁସାରେ, ପଥର ବୋଝେଇ ଟ୍ରକ୍ଟି ଜଗତ୍ସିଂହପୁର ପଟରୁ ବାଲିକୁଦା ଆଡକୁ ଯାଉଥିଲା। ଅପରପଟରୁ ପ୍ରଶାନ୍ତ ତାଙ୍କ ବାଇକ୍ ଯୋଗେ ଘରକୁ ଫେରୁଥିଲେ। ଗୋପାଳପୁର ଛକ ନିକଟରେ ହଠାତ୍ ପ୍ରଶାନ୍ତଙ୍କ ବାଇକ୍ ଡାହାଣ ପଟକୁ ମାଡି ଯାଇଥିଲା। ଫଳରେ ଦ୍ରୁତ ଗତିରେ ଆସୁଥିବା ଟ୍ରକ୍ ତାଙ୍କୁ ଧକ୍କା ଦେଇଥିଲା। ସେ ବାଇକ୍ରୁ ଡାହାଣ ପଟକୁ ପଡ଼ି ଯାଇଥିଲେ। ବାଇକ୍ ବାମ ପାର୍ଶ୍ୱକୁ ପଡ଼ି ଯାଇଥିଲା। ଫଳରେ ପ୍ରଶାନ୍ତଙ୍କ ଉପରେ ଟ୍ରକଟି ଚଢି ଯିବା ସହ କିଛି ବାଟ ଯାଇ ଏକ ଗଛରେ ପଟି ହୋଇ ଯାଇଥିଲା।
