କୋକସରା,୨୨।୮(ଡି.ଏନ.ଏ.) କଳାହାଣ୍ଡି ଜିଲା କୋକସରା ବ୍ଲକ ଶିକ୍ଷା ବିଭାଗ ଅଧୀନ ଆମପାଣି କ୍ଳଷ୍ଟରର ବଣପାହାଡ଼ ଘେରା ଦୁର୍ଗମ ବରାଡ଼ଙ୍ଗା ପଞ୍ଚାୟତ ଝୁଲେନବର ପ୍ରାଥମିକ ବିଦ୍ୟାଳୟ। ଆଦିବାସୀ ବହୁଳ ଗ୍ରାମରେ ୧୯୭୫ରେ ସ୍ଥାପିତ ଏହି ପ୍ରାଥମିକ ବିଦ୍ୟାଳୟକୁ ନିୟମିତ ଶିକ୍ଷକ ଆସୁ ନ ଥିବା ଓ ମଧ୍ୟାହ୍ନଭୋଜନ ଖାଇ ସାରିବା ପରେ ଅଘୋଷିତ ଛୁଟି ହେଉଥିବା ନେଇ ଅଭିଭାବକ ଓ ଗ୍ରାମବାସୀ ଅଭିଯୋଗ କରିଛନ୍ତି। ବୁଧବାର ମଧ୍ୟ ସ୍କୁଲକୁ ୨ ଜଣ ଶିକ୍ଷକଙ୍କ ମଧ୍ୟରୁ କେହି ଜଣେ ବି ଆସି ନ ଥିବା ବେଳେ ସ୍କୁଲ ପାଚିକା ମଧ୍ୟାହ୍ନଭୋଜନ ପ୍ରସ୍ତୁତ କରି ପିଲାମାନଙ୍କୁ ଖାଇବାକୁ ଦେଇଛନ୍ତି ।
ସୂଚନାଯୋଗ୍ୟ ଯେ, ଏହି ସ୍କୁଲରେ ପ୍ରଧାନ ଶିକ୍ଷକ ଡୋମନିକ ସୁନାନି ଓ ସହକାରୀ ଶିକ୍ଷକ ତ୍ରିନାଥ ପଣ୍ଡା ନିଯୁକ୍ତି ହୋଇଛନ୍ତି । ଦୁର୍ଗମ ଅଞ୍ଚଳର ଫାଇଦା ଉଠାଇ ସ୍କୁଲକୁ ଶିକ୍ଷକ ଦ୍ୱୟ ନିୟମିତ ଆସୁ ନାହାନ୍ତି ବୋଲି ସ୍କୁଲ କମିଟି ସଭାପତି ବିଶ୍ୱନାଥ ମାଝି, ଅଚ୍ୟୁତ ମାଝି, ଯୁଗେଶ୍ୱର ମାଝି, କ୍ଷିରୋଦ ମାଝି, ଡିଙ୍ଗର ମାଝି ପ୍ରମୁଖ ଅଭିଭାବକମାନେ ଅଭିଯୋଗ କରିଛନ୍ତି । ଏହି ସ୍କୁଲ ଜଙ୍ଗଲକୁ ଲାଗି ରହିଥିବା ବେଳେ ପିଲାମାନଙ୍କ ସୁରକ୍ଷା ପାଇଁ କୌଣସି ବ୍ୟବସ୍ଥ୍ୟା ନାହିଁ। ଏଠାରେ ପ୍ରଥମରୁ ପଞ୍ଚମ ଶ୍ରେଣୀ ଯାଏ ୨୫ ଜଣ ପିଲା ପଢୁଛନ୍ତି । ଅନେକ ସମୟରେ ଶିକ୍ଷକମାନେ ଆସୁ ନ ଥିବା ନେଇ ଛାତ୍ରୀଛାତ୍ରମାନେ ମଧ୍ୟ ଅଭିଯୋଗ କରିଛନ୍ତି । ବୁଧବାର ୧୭ ଜଣ ଛାତ୍ରୀଛାତ୍ର ସ୍କୁଲ ଆସିଥିବା ବେଳେ ସ୍କୁଲ ଗୃହ ଖୋଲା ନ ଥିବା ଯୋଗୁ ବାରଣ୍ଡାରେ ବସି ରହିଥିଲେ। ଏ ନେଇ ଜିଲା ଶିକ୍ଷା ଅଧିକାରୀ ସଞ୍ଜୀବ କୁମାର ସିଂଙ୍କୁ ପଚାରିବାରୁ କୋକସରା ବ୍ଲକ୍ ଶିକ୍ଷା ଅଧିକାରୀଙ୍କୁ ଏହାର ତଦନ୍ତ ନିର୍ଦ୍ଦେଶ ପାଇଁ କୁହାଯିବ। ରିପୋର୍ଟ ଆସିବା ପରେ ସମ୍ପୃକ୍ତ ପ୍ରଧାନ ଶିକ୍ଷକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି । ଏ ବିଷୟରେ ସମ୍ପୃକ୍ତ ପ୍ରଧାନଶିକ୍ଷକ ଡୋମନିକ ସୁନାନୀଙ୍କୁ ପଚାରିବାରୁ ଗ୍ରାମବାସୀଙ୍କ କଥାକୁ ଅସ୍ବୀକାର କରିଥିଲେ। ଦେହ ଅସୁସ୍ଥ ଥିବାରୁ ସହକାରୀ ଶିକ୍ଷକ ତ୍ରିନାଥ ପଣ୍ଡା ୨ ଦିନ ଛୁଟିରେ ରହିଥିବାରୁ ସେ ଦରମା ଓ ମଧ୍ୟାହ୍ନଭୋଜନ ବିଲ ଦେବା ପାଇଁ ଆମପାଣି ସିଆରସିସିଙ୍କ ପାଖକୁ ଯାଇଥିବା କହିଥିଲେ।
