ଝାରସୁଗୁଡା ଅଫିସ,୩୦ା୪- ପଶ୍ଚିମବଙ୍ଗରୁ ଝାରସୁଗୁଡା ଜିଲା ବ୍ରଜରାଜନଗର ଅଞ୍ଚଳକୁ ଆସିଥିବା ଜଣେ ଯୁବତୀ ବୁଧବାର କରୋନା ପଜିଟିଭ୍ ଚିହ୍ନଟ ହୋଇଥିଲେ। ଏହାପରେ ଜିଲା ପ୍ରଶାସନ ପକ୍ଷରୁ ତାଙ୍କୁ ଚିକିତ୍ସା ପାଇଁ ତୁରନ୍ତ ରାଉରକେଲା ସ୍ଥିତ କୋଭିଡ୍ ହସ୍ପିଟାଲକୁ ପଠାଯାଇଥିଲା। ତେବେ ଝାରସୁଗୁଡାଠାରେ କୋଭିଡ୍ ହସ୍ପିଟାଲ ଥିଲେ ସୁଦ୍ଧା ତାଙ୍କୁ କେଉଁ କାରଣରୁ ରାଉରକେଲାସ୍ଥିତ ହସ୍ପିଟାଲକୁ ପଠାଗଲା ତାହା ଏବେ ଜିଲାରେ ଚର୍ଚ୍ଚାର ବିଷୟ ପାଳଟିଛି। ଜିଲା ପ୍ରଶାସନର ଏହି ପଦକ୍ଷେପକୁ ଜିଲାର ବୁଦ୍ଧିଜୀବୀମାନେ ପ୍ରଶ୍ନ କରୁଥିବା ବେଳେ ସୋସିଆଲ ମିଡିଆରେ ଲୋକମାନେ ସ୍ବାସ୍ଥ୍ୟ ବିଭାଗ ଓ ଜିଲା ପ୍ରଶାସନକୁ ସମାଲୋଚନା କରୁଛନ୍ତି।
ଏହାର କାରଣ ସମ୍ପର୍କରେ ଝାରସୁଗୁଡ଼ା କୋଭିଡ୍ ହସ୍ପିଟାଲର ପ୍ରଶାସନିକ ଅଧିକାରୀ ତଥା ଅତିରିକ୍ତ ଜିଲାପାଳ ପ୍ରଦୀପ କୁମାର ସାହୁଙ୍କୁ ସହିତ ଆଲୋଚନା କରିବାରୁ ହସ୍ପିଟାଲରେ ଏକ ମେଶିନ ଲଗାଯାଉଥିବା ସେ ସୂଚନା ଦେଇଥିଲେ। ଏହାଛଡ଼ା କିଛି ଦିନ ତଳେ ବୁର୍ଲାରୁ ଏକ ଟିମ୍ ଏହି ହସ୍ପିଟାଲକୁ ପରିଦର୍ଶନରେ ଆସିଥିଲେ। ସେମାନେ ଆଇସିୟୁରେ ଏକ ମେସିନ(ନେଗେଟିଭ ପ୍ରେସର) ଲଗାଇବାକୁ ପରାମର୍ଶ ଦେଇଥିଲେ। ଏଭଳି ପରିସ୍ଥିତିରେ ଏହି କରୋନା ଆକ୍ରାନ୍ତଙ୍କୁ ହସ୍ପିଟାଲରେ ଭର୍ତ୍ତି କଲେ ହସ୍ପିଟାଲ ପରିସରକୁ କଣ୍ଟେନମେଣ୍ଟ ଜୋନ ଘୋଷଣା କରାଯିବ। ଫଳରେ ମେଶିନ ସ୍ଥାପନ କାର୍ଯ୍ୟ ହୋଇପାରିବ ନାହିଁ। ତେବେ ଝାରସୁଗୁଡା କୋଭିଡ୍ ହସ୍ପିଟାଲକୁ ପରିଚାଳନା କରୁଥିବା ସଂସ୍ଥା ରାଉରକେଲା କୋଭିଡ୍ ହସ୍ପିଟାଲ ମଧ୍ୟ ପରିଚାଳନା କରୁଛି। ଏଣୁ ରାଉରକେଲା ହସ୍ପିଟାଲକୁ କରୋନା ଆକ୍ରାନ୍ତଙ୍କୁ ପଠାଯାଇଛି ବୋଲି ସେ କହିଥିଲେ।
ପ୍ରକାଶ ଯେ, ଝାରସୁଗୁଡା ସହର ମଙ୍ଗଳ ବଜାର ସ୍ଥିତ ପୁରୁଣା ଜିଲା ମୁଖ୍ୟ ଚିକିତ୍ସାଳୟଠାରେ ଗତ ୨୨ ତାରିଖ ବୁଧବାର ଦିନ ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମନ୍ତ୍ରୀ ନବ କିଶୋର ଦାସ ମଖ୍ୟ ଅତିଥି ଭାବେ ଯୋଗ ଦେଇ କୋଭିଡ୍ ହସ୍ପିଟାଲକୁ ଉଦ୍ଘାଟନ କରିଥିଲେ। ଏହି ହସ୍ପିଟାଲରେ ମୋଟ ୧୧୦ ଶଯ୍ୟା ବିଶିଷ୍ଟ ଥିବା ବେଳେ ଏଥିରେ ୯୩ ଟି ସାଧାରଣ ଶଯ୍ୟା, ୧୦ ଟି ଆଇସିୟୁ ଓ ୭ ଟି ଏଚ୍ଡିୟୁ ୟୁନିଟ ଅନ୍ତଭୁକ୍ତ। ରୋଗୀଙ୍କ ଚିକିତ୍ସା ନିମନ୍ତେ ୧୦ଟି ଭେଣ୍ଟିଲେଟର, ବହୁଗୁଣିତ ଅମ୍ଳଜାନ ଯୋଗାଣ ବ୍ୟବସ୍ଥା, ଅମ୍ଳଜାନ ସିଲିଣ୍ଡର, କମ୍ପ୍ରେସର ଅଦିର ବ୍ୟବସ୍ଥା କରାଯାଇଛି। ଏହି ହସ୍ପିଟାଲକୁ ହାଇଟେକ୍ ମେଡିକାଲ କଲେଜ ଓ ହସ୍ପିଟାଲ୍ ଦ୍ୱାରା ପରିଚାଳିତ ହେବାନେଇ ଜିଲା ପ୍ରଶାସନ ପକ୍ଷରୁ ଚୁକ୍ତି କରାଯାଇଛି। ଏହି ହସ୍ପିଟାଲ ପ୍ରତିଷ୍ଠା ପାଇଁ ଜିଲା ଖଣିଜ ପାଣ୍ଠିରୁ ୧୦ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ କରାଯାଇଥିବା ବେଳେ ଝାରସୁଗୁଡା ସ୍ଥିତ ବେଦାନ୍ତ କମ୍ପାନି ପ୍ରାୟ ୨ କୋଟି ଟଙ୍କାର ଯନ୍ତ୍ରପାତି ଯୋଗାଇ ଦେଇଛି।
