ଜଗତ୍ସିଂହପୁର ଅଫିସ,୫ା୧: ଉର୍ବର ମୃତ୍ତିକା, ଜଳସମ୍ପଦ, ବନ୍ଦର, ମାନବ ସମ୍ବଳ ଆଦି ଅନେକ ଦୃଷ୍ଟିରୁ ଜଗତ୍ସିଂହପୁର ଏକ ଅଗ୍ରଣୀ ଜିଲା। ଏହି ଜିଲାରେ ଶହସ୍ରାଧିକ ମହିଳା ସ୍ବୟଂ ସହାୟକ(ଏସ୍ଏଚ୍ଜି) ଗୋଷ୍ଠୀ ଅଛି। କିନ୍ତୁ ଗୋଷ୍ଠୀଗୁଡିକରେ ଥିବା ପ୍ରତ୍ୟେକ ସଦସ୍ୟା ଯେପରି ମାସିକ ଅନ୍ୟୁନ ୨୦ ହଜାରରୁ ଅଧିକ ଟଙ୍କା ରୋଜଗାର କରିପାରିବେ ସେନେଇ ପଦକ୍ଷେପ ଗ୍ରହଣ କରାଯାଉଛି। ଡିଆର୍ଡିଏ ସମ୍ମିଳନୀ କକ୍ଷରେ ଅନୁଷ୍ଠିତ ଜିଲାସ୍ତରୀୟ ଜେଣ୍ଡର ଟ୍ରାନ୍ସଫର୍ମେଟିଭ୍ ମଡେଲ କର୍ମଶାଳାରେ ପୌରୋହିତ୍ୟ କରି ଜିଲାପାଳ ସଂଗ୍ରାମ କେଶରୀ ମହାପାତ୍ର ଏହା କହିଛନ୍ତି। ସେ କହିଥିଲେ, ଏରସମା ବ୍ଲକର ମହିଳା ଏସ୍ଏଚ୍ଜିଙ୍କୁ ବିଦ୍ୟୁତ ମିଟର ରିଡିଂ ଓ ବିଲ୍ ସଂଗ୍ରହ କାର୍ଯ୍ୟରେ ପ୍ରଥମ ଥର ପାଇଁ ନିୟୋଜିତ କରାଯାଇଛି। ଛତୁଆ ବଣ୍ଟନ, କୁକୁଡ଼ା ଓ ମାଛ ଚାଷ, ବିଦ୍ୟାଳୟ ପିଲାଙ୍କ ପୋଷାକ ତିଆରି ଆଦି ଦାୟିତ୍ୱ ମହିଳା ଏସ୍ଏଚ୍ଜିଙ୍କୁ ପ୍ରଦାନ କରାଯାଇଛି। ମଧ୍ୟାହ୍ନଭୋଜନ ପରିଚାଳନା ଦାୟିତ୍ୱ ଖୁବ ଶୀଘ୍ର ପ୍ରଦାନ କରାଯିବ। ଏହାବାଦ୍ ଜିଲାରେ ଥିବା ସମସ୍ତ ସରକାରୀ କାର୍ଯ୍ୟାଳୟ ପାଇଁ ଫିନାଇଲ ଏସ୍ଏଚ୍ଜିଙ୍କ ଠାରୁ କ୍ରୟ କରାଯିବ। ଫ୍ଲିପକାର୍ଟ ମାଧ୍ୟମରେ ମହିଳା ଏସ୍ଏଚ୍ଜିଙ୍କ ଦ୍ୱାରା ଉତ୍ପାଦିତ ଦ୍ରବ୍ୟ ବିକ୍ରି ପାଇଁ ପଦକ୍ଷେପ ଗ୍ରହଣ କରାଯିବ। ପ୍ରତି ବ୍ଲକ କାର୍ଯ୍ୟାଳୟରେ ମହିଳାଙ୍କ ପାଇଁ ସ୍ବତନ୍ତ୍ର ଶୌଚାଳୟ ନିର୍ମାଣ ହେବ ବୋଲି ଜିଲାପାଳ କହିଥିଲେ। ଆୟୋଜିତ କର୍ମଶାଳାରେ ରାଜ୍ୟ ମହିଳା କମିଶନ ଅଧ୍ୟକ୍ଷା ମିନତୀ ବେହେରା ଯୋଗଦେଇ ଦେବଗଡ଼ପରେ ଜଗତ୍ସିଂହପୁର ଜିଲାରେ ଏହି କାର୍ଯ୍ୟକ୍ରମ ଆରମ୍ଭ ହୋଇଥିବା ସୂଚନା ଦେଇଥିଲେ। ମା’ମାନଙ୍କର ସର୍ବାଙ୍ଗୀନ ଉନ୍ନତି, ସେମାନଙ୍କ ସାମାଜିକ, ଅର୍ଥନୈତିକ, ଶିକ୍ଷା ଓ ସ୍ବାସ୍ଥ୍ୟରେ ଉନ୍ନତି ପାଇଁ ରାଜ୍ୟ ସରକାର ଦାୟିତ୍ୱବାନା ଥିବା କହିଥିଲେ। ଜିଲା ପରିଷଦ ସଭାପତି ପ୍ରିୟଦର୍ଶିନୀ ବିଶ୍ୱାଳ ଯୋଗଦେଇ ମହିଳାମାନେ ସ୍ବାବଲମ୍ବୀ ହେବା ସହ ନିଜ ଅଞ୍ଚଳର ଉନ୍ନତି ପାଇଁ ପଦକ୍ଷେପ ନେଉଥିବା ମତ ରଖିଥିଲେ। ଜିଲା ଆଇନ ସେବା ପ୍ରାଧିକରଣ ସମ୍ପାଦକ କମଳାକାନ୍ତ ରାଉତ ମହିଳାଙ୍କ ଅଧିକାରର ସୁରକ୍ଷା ପାଇଁ ଜିଲା ଆଇନ ସେବା ପ୍ରାଧିକରଣପକ୍ଷରୁ ଯୋଗାଇ ଦିଆଯାଉଥିବା ଆଇନ ସହାୟତା ସମ୍ପର୍କରେ ସୂଚନା ଦେଇଥିଲେ। ଓଡ଼ିଶା ଜୀବିକା ମିଶନ ପ୍ରୋଜେକ୍ଟ ଏକ୍ଜିକ୍ୟୁଟିଭ୍ ସୁଧୀରା ରଥ ମହିଳାଙ୍କ ଆର୍ଥିକ ସ୍ବାଧୀନତା, ସାମାଜିକ ଉନ୍ନତି, ସ୍ବାସ୍ଥ୍ୟ ଓ ପରିମଳ ସଚେତନତା ଉପରେ କହିଥିଲେ। ପ୍ରାରମ୍ଭରେ ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ।
