ପାରାଦୀପ,୧୨ା୧୨(ସ୍ବ.ପ୍ର.): ୨୦୨୦ ଜାନୁୟାରୀ ପହିଲାରୁ ପାରାଦୀପ ପୌରପାଳିକାରେ ମୋ ସରକାର ଯୋଜନା ଲାଗୁହେବ। ଏହା ଜାନୁୟାରୀ ୧୦ ପର୍ଯ୍ୟନ୍ତ ପରୀକ୍ଷାମୂଳକ ଭାବେ ଚାଲିବ। ତା’ପରଠାରୁ ପୂର୍ଣ୍ଣାଙ୍ଗଭାବେ ମୋ ସରକାର ନୀତି ନିୟମ ଲାଗୁ ହେବ। ଏନେଇ ରାଜ୍ୟର ୧୧୪ ପୌରସଂସ୍ଥା ମଧ୍ୟରୁ ପାରାଦୀପ ପୌର ସଂସ୍ଥା ପକ୍ଷରୁ ପ୍ରଥମ ବୈଠକ ଅନୁଷ୍ଠିତ ହୋଇଛି। ବୈଠକରେ ପାରାଦୀପ ବିଧାୟକ ସମ୍ବିତ ରାଉତରାୟ, ପୌରାଧ୍ୟକ୍ଷ ବସନ୍ତ ବିଶ୍ୱାଳ, ଉପାଧ୍ୟକ୍ଷ ପ୍ରଭାତୀ ନାୟକ, ପୌର ନିର୍ବାହୀ ଅଧିକାରୀ ଦିଲୀପ କୁମାର ମହାନ୍ତିଙ୍କ ସମତେ ସମସ୍ତ କାଉନସିଲର ଓ ପୌର କର୍ମଚାରୀ ଉପସ୍ଥିତ ଥିଲେ। ଗଣତନ୍ତ୍ରରେ ଲୋକମତ ହେଉଛନ୍ତି ଜନତା। ସେମାନଙ୍କ ପ୍ରତ୍ୟେକ କାମ କରିବା ପାଇଁ ସରକାରୀ କର୍ମଚାରୀ ବାଧ୍ୟ। ଜାନୁୟାରୀ ୧ରୁ ପୌର କାର୍ଯ୍ୟାଳୟକୁ ଆସୁଥିବା ପ୍ରତ୍ୟେକ ବ୍ୟକ୍ତିଙ୍କ ସମସ୍ତ କଥାକୁ ସହୃଦୟତାର ସହ ଶୁଣିବାକୁ ହେବ। ଏଥିରେ କେହି ଅସନ୍ତୋଷ ପ୍ରକଟ କଲେ ସରକାରଙ୍କ ପ୍ରଦତ୍ତ ନମ୍ବର ୧୪୫୪୫କୁ ଅଭିଯୋଗକାରୀ ଜଣାଇବେ। ଏହାପରେ ନିରପେକ୍ଷ ତଦନ୍ତ କରାଯାଇ ଅଭିଯୋଗ ଶୁଣି ନ ଥିବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପୂର୍ବରୁ ପ୍ରଚଳିତ ଥିବା ଯଥା: ବାବୁ ନାହାନ୍ତି, ଫାଇଲ କାମ ଅମୁକ ବାବୁଙ୍କ ପାଖରେ ଅଛି ଆଦି ମୋ ସରକାରରେ ଚଳିବ ନାହିଁ ବୋଲି କୁହାଯାଇଛି। ବିଧାୟକ ସମ୍ବିତ କହିଥିଲେ, ଏବେ ମୋ ସରକାରରେ ସମସ୍ତ ଜନପ୍ରତିନିଧିଙ୍କ ସୂଚନା ଉପର ମହଲରେ ରେକର୍ଡ ହେଉଛି। ଆମକୁ ମଧ୍ୟ ପ୍ରତିଦିନ ହ୍ବାଟ୍ସଆପ୍ ଗ୍ରୁପ୍ରେ ସୂଚନା ଦେବାକୁ ପଡ଼ୁଛି। ୭ ଦିନର ରିପୋର୍ଟ କାର୍ଡ ଆମେ ସରକାରଙ୍କୁ ଜଣାଉଛୁ। ଏପରିସ୍ଥଳେ ନୂଆ ବ୍ୟବସ୍ଥାରେ ସମସ୍ତେ ଲୋକଙ୍କ ପାଇଁ କାମ କରନ୍ତୁ। ଏବେଠାରୁ କାମ ଲେ ଆସନ୍ତା ନିର୍ବାଚନବେଳେକୁ ଲୋକେ ତୁମକୁ ଗ୍ରହଣ କରିବେ ବୋଲି ସେ ଜନପ୍ରତିନିଧିଙ୍କ ଉଦ୍ଦେଶ୍ୟରେ କହିଥିଲେ। ଏଥିସହ ଆଗାମୀ ଦିନରେ ହୋଲ୍ଡିଂ ଟିକସ, ଟ୍ରେଡ୍ ଲାଇସେନ୍ସ, ବିଲ୍ଡିଂ ପ୍ଲାନ ଆଦି କାମ ଅନ୍ଲାଇନରେ କରାଯିବ ବୋଲି କୁହାଯାଇଥିଲା। ପରେ ପୌର ପାଳିକାର କାଉନସିଲ ବୈଠକ ଓ ବିଭିନ୍ନ ନୂତନ ପ୍ରକଳ୍ପର ଶିଳାନ୍ୟାସ କରାଯାଇଥିଲା।
