ବଲାଙ୍ଗୀର ଅଫିସ, ୬ା୧୨: ୭୭ ବର୍ଷ ପୁରୁଣା ପଶ୍ଚିମ ଓଡ଼ିଶାର ସର୍ବପୁରାତନ ଉଚ୍ଚ ଶିକ୍ଷାନୁଷ୍ଠାନ ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟ ନାମରେ ଇଞ୍ଚେ ଜମିର ମାଲିକାନା ସ୍ବତ୍ୱ ନାହିଁ। ଏଭଳିକି ବିଶ୍ୱବିଦ୍ୟାଳୟର ଦଖଲଭୁକ୍ତ ଜମିର ମାଲିକାନା ସ୍ବତ୍ୱ ମଧ୍ୟ ଏହି ଶିକ୍ଷାନୁଷ୍ଠାନ ନଁାରେ ନାହିଁ। ରାଜେନ୍ଦ୍ର କଲେଜକୁ ଅପ୍ଗ୍ରେଡ କରି ବିଶ୍ୱବିଦ୍ୟାଳୟ ଘୋଷଣା କରାଯିବା ପରେ ମଧ୍ୟ ଜମି ମାଲିକାନା ସ୍ବତ୍ୱକୁ ନେଇ ଲାଗିରହିଥିବା ଅବ୍ୟବସ୍ଥାର କୌଣସି ସମାଧାନ ହୋଇ ନ ଥିଲା। ଏ ସଂକ୍ରାନ୍ତରେ ଧରିତ୍ରୀରେ କ୍ରମାଗତ ଖବର ପରିବେଷଣ ପରେ ଜିଲା ପ୍ରଶାସନ ଓ ରାଜ୍ୟ ସରକାର ରାଜେନ୍ଦ୍ର ବିଶ୍ୱବିଦ୍ୟାଳୟ ଜମି ସମସ୍ୟାର ସମାଧାନ କରିବାକୁ ଆଗଭର ହୋଇଥିଲେ। ପ୍ରଥମ ପର୍ଯ୍ୟାୟରେ ଏହି ବିଶ୍ୱବିଦ୍ୟାଳୟର ଦଖଲଭୁକ୍ତ ଜମିର ମାଲିକାନା ସ୍ବତ୍ୱ ବା ଜମିପଟ୍ଟା ବିଶ୍ୱବିଦ୍ୟାଳୟ ନଁାରେ କରିବାକୁ ଜିଲା ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ କରାଯାଇଥିଲା ଯାହାକି ଏବେ ଚୂଡାନ୍ତସ୍ତରରେ ପହଞ୍ଚତ୍ଛି। ବୋର୍ଡ ଅଫ୍ ରେଭିନ୍ୟୁରୁ ଜମି ସଂକ୍ରାନ୍ତୀୟ ଫାଇଲ ରାଜ୍ୟ ସରକାରଙ୍କ ଅନୁମୋଦନ ପାଇଁ ପଠାଯାଇଛି। ଫଳରେ ଡିସେମ୍ବର ଶେଷସୁଦ୍ଧା ଏହି ବିଶ୍ୱବିଦ୍ୟାଳୟ ନଁାରେ ଜମିପଟ୍ଟା (ଆର୍ଓଆର୍) ମିଳିବା ଆଶା ଉଜ୍ଜୀବିତ ହୋଇଥିବା ଜିଲା ପ୍ରଶାସନ ସୂତ୍ରରୁ ଜଣାପଡିିଛି। ମିଳିଥିବା ସୂଚନା ମୁତାବକ, ରାଜେନ୍ଦ୍ର ବିଶ୍ୱବିଦ୍ୟାଳୟର କିଛି କୋଠାଘର, ହଷ୍ଟେଲ ଓ ଷ୍ଟାଫ୍ କ୍ୱାର୍ଟର୍ସ ଥିବା ଜମି ପୂର୍ତ୍ତ ବିଭାଗ ନଁାରେ ରହିଥିଲା। ପ୍ରାୟ ୬ ଏକର ପରିମିତ ଉକ୍ତ ଜମିକୁ ବିଶ୍ୱବିଦ୍ୟାଳୟ ନଁାକୁ ଫେରାଇବା ପାଇଁ ପ୍ରଥମେ ପ୍ରକ୍ରିୟା ଆରମ୍ଭ ହୋଇଥିଲା। ଏହାବାଦ୍ ବିଶ୍ୱବିଦ୍ୟାଳୟର ପ୍ରାୟ ୨୦.୬୧୬ ଏକର ଜମିକୁ ଜିଲା ପ୍ରଶାସନ ପକ୍ଷରୁ ଚିହ୍ନଟ କରାଯାଇ ଏହାକୁ ବିଶ୍ୱବିଦ୍ୟାଳୟ ନଁାରେ ପଟ୍ଟା କରିବାକୁ ଉଦ୍ୟମ ଆରମ୍ଭ ହୋଇଥିଲା। ଉକ୍ତ ଜମିର ପ୍ରକ୍ରିୟାକରଣ ପାଇଁ ପ୍ରଥମେ ଉତ୍ତରାଞ୍ଚଳ ରାଜସ୍ବ ଆୟୁକ୍ତ (ଆରଡିସି) ଓ ପରେ ବୋର୍ଡ ଅଫ୍ ରେଭିନ୍ୟୁକୁ ପଠାଯାଇଥିଲା। ସେଠାରେ ଯାଞ୍ଚ ପରେ ଏହାକୁ ବିଧିବଦ୍ଧ ଅନୁମୋଦନ ପାଇଁ ରାଜ୍ୟ ସରକାରଙ୍କ ପାଖକୁ ପଠାଯାଇଛି। ରାଜ୍ୟ ସରକାରଙ୍କ ଅନୁମୋଦନ ପରେ ଖୁବ୍ଶୀଘ୍ର ଚିହ୍ନଟ ଜମିର ପଟ୍ଟା(ଆରଓଆର) ରାଜେନ୍ଦ୍ର ବିଶ୍ୱବିଦ୍ୟାଳୟ ନଁାରେ କରାଯିବ। ଏହାବାଦ୍ ଜିଲା ପ୍ରଶାସନ ପକ୍ଷରୁ ଶିକ୍ଷାନୁଷ୍ଠାନ ପରିସରରେ ଚିହ୍ନଟ ହୋଇଥିବା ଆହୁରି ପ୍ରାୟ ୩୫ଏକର ଜମି ବିଶ୍ୱ ବିଦ୍ୟାଳୟ ନଁାରେ କରାଯିବା ପ୍ରକ୍ରିୟା ଚାଲିଛି। ଏହାକୁ ମଧ୍ୟ ସରକାରଙ୍କ ଅନୁମୋଦନ ପାଇଁ ଆରଡିସି ଓ ବୋର୍ଡ ଅଫ୍ ରେଭିନ୍ୟୁ ଜରିଆରେ ପଠାଯିବ। ଏସବୁ କାମ ଏବେ ଜୋରସୋର ଚାଲିଛି। ଜିଲା ପ୍ରଶାସନ ପକ୍ଷରୁ ମିଳିଥିବା ସୂଚନା ମୁତାବକ ଡିସେମ୍ବର ଶେଷସୁଦ୍ଧା ପ୍ରାୟ ୨୭ ଏକର ଜମିର ପଟ୍ଟା (ଆରଓଆର) ରାଜେନ୍ଦ୍ର ବିଶ୍ୱବିଦ୍ୟାଳୟ ନଁାରେ ହୋଇଯିବ ବୋଲି ଆଶା କରାଯାଇଛି। ଏହାବାଦ୍ ଦ୍ୱିତୀୟ ପର୍ଯ୍ୟାୟରେ ଶିକ୍ଷାନୁଷ୍ଠାନ ନଁାରେ ଆହୁରି ପ୍ରାୟ ୩୫ଏକର ଜମିର ପଟ୍ଟା କରାଯାଇପାରିବ ବୋଲି ଜଣାପଡିଛି। ଉକ୍ତ ପରିମିତ ଜମି ମଧ୍ୟ ପ୍ରଶାସନ ପକ୍ଷରୁ ଚିହ୍ନଟ ହୋଇଛି। ଏସବୁ ପ୍ରକ୍ରିୟା ସରିଲେ ୭୭ ବର୍ଷ ପୁରୁଣା ରାଜେନ୍ଦ୍ର ବିଶ୍ୱବିଦ୍ୟାଳୟ ନଁାରେ ପ୍ରାୟ ୬୨ଏକରରୁ ଊର୍ଦ୍ଧ୍ୱ ଜମି ବ୍ୟବସ୍ଥା ହୋଇପାରିବ। ଜିଲାପାଳ ଚଞ୍ଚଳ ରାଣାଙ୍କ ନିର୍ଦ୍ଦେଶକ୍ରମେ ଅତିରିକ୍ତ ଜିଲାପାଳ ଅନନ୍ତ ନାରାୟଣ ସିଂ ଲାଗୁରୀ, ଅତିରିକ୍ତ ଜିଲାପାଳ (ରାଜସ୍ବ) ମହେନ୍ଦ୍ର ମହାପାତ୍ର ଓ ତହସିଲଦାର ମଘବନ ବାଗଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରାଜେନ୍ଦ୍ର ବିଶ୍ୱବିଦ୍ୟାଳୟ ଜମି ଚିହ୍ନଟ ପ୍ରକ୍ରିୟାକରଣ ତଥା ଡକ୍ୟୁମେଣ୍ଟେଶନ୍ ଚାଲିଛି। ତେବେ ରାଜେନ୍ଦ୍ର ବିଶ୍ୱବିଦ୍ୟାଳୟ ପାଇଁ ଅତିକମ୍ରେ ୧୦୦ ଏକର ଜମି ଦିଆଯିବାକୁ ରାଜ୍ୟ ସରକାରଙ୍କଠାରେ ଦାବି କରାଯାଇଛି। ରାଜେନ୍ଦ୍ର କଲେଜ ନଁାରେ ତତ୍କାଳୀନ କଲେଜ ପ୍ରତିଷ୍ଠାତା ମହାରାଜ ରାଜେନ୍ଦ୍ର ନାରାୟଣ ସିଂଦେଓ ପ୍ରାୟ ୨୫୦ଏକର ଜମି ବ୍ୟବସ୍ଥା କରିଥିବା କୁହାଯାଉଥିଲେ ମଧ୍ୟ ଏହି ଶିକ୍ଷାନୁଷ୍ଠାନର ଏତେ ପରିମାଣ ଜମି କୁଆଡେ ଗଲା ତାହା ଏବେ ଚର୍ଚ୍ଚାର ବିଷୟ ହୋଇଛି।
