ଦାର ଏସ୍ ସଲାମ,୪।୫: ଆଫ୍ରିକୀୟ ଦେଶ ତାଞ୍ଜାନିଆରେ କରୋନା ଟେଷ୍ଟ ପାଇଁ ବ୍ୟବହାର କରାଯାଉଥିବା କିଟ୍ ଗୁଡିକର ଯାଞ୍ଚ ନିର୍ଦ୍ଦେଶ ଦେଇଛନ୍ତି ରାଷ୍ଟ୍ରପତି ଜନ ମଗୁଫୁଲି। ସୂଚନାଯୋଗ୍ୟ, ରବିବାର ତାଞ୍ଜାନିଆରେ ଗୋଟିଏ ଛେଳି ଓ ଏକ ଫଳ ପଓ ପଓ(pawpaw) କରୋନା ପଜିଟିଭ ମିଳିବା ଫଳରେ ସେଠାରେ ବ୍ୟବହାର କରାଯାଉଥିବା ଟେଷ୍ଟ କିଟ୍ରେ ତ୍ରୁଟି ଦର୍ଶାଇ ରାଷ୍ଟ୍ରପତି ଜନ ମଗୁଫୁଲି ଏହାର ଯାଞ୍ଚ ନିର୍ଦ୍ଦେଶ ଦେଇଛନ୍ତି। ବିଦେଶରୁ ଆସିଥିବା ଟେଷ୍ଟ କିଟ୍କୁ ପରୀକ୍ଷା କରିବାକୁ ଛେଳି ଓ ପଓ ପଓ ଫଳର ନମୁନାକୁ ନେଇ ସେଥିରେ ମଣିଷ ପରି ନାଁ ଓ ବୟସ ଲେଖାଯାଇଥିଲା। ଏହାପରେ ତାକୁ ତାଞ୍ଜାନିଆର ଲାବୋରୋଟୋରିକୁ ପରୀକ୍ଷା ପାଇଁ ପଠାଯାଇଥିଲା। ପରେ ଏହାର ରିପୋର୍ଟ ପଜିଟିଭ ଆସିବାରୁ ରାଷ୍ଟ୍ରପତି କହିଥିଲେ କିଟ୍ ଗୁଡିକର ଯାଞ୍ଚ କରାଯାଉ। ଏବେ ରାଷ୍ଟ୍ରପତି କହିଛନ୍ତି ଏହି ରିପୋର୍ଟକୁ ଦେଖି ଲାଗୁଛି ଦେଶରେ ଆହୁରି ଅଧିକ ସଂକ୍ରମିତ ରହିଛନ୍ତି ତେଣୁ ଏହାର ସଠିକ୍ ଯାଞ୍ଚ ହେବା ଦରକାର। କାରଣ ପୂର୍ବରୁ ରାଷ୍ଟ୍ରପତି ମଗୁଫୁଲିଙ୍କ ନାଁରେ ଦିନେ ତାଞ୍ଜାନିଆରେ କରୋନା ସଂକ୍ରମିତଙ୍କ ସଂଖ୍ୟା ଲୁଚାଉଥିବା ଅଭିଯୋଗ ଆସିଥିବା ବେଳେ ଏହାକୁ ନେଇ ସେ ସମାଲୋଚନାର ଶିକାର ମଧ୍ୟ ହୋଇଥିଲେ। ଏମିତିକି ସେ ତାଙ୍କ ଦେଶବାସୀଙ୍କୁ କହିଥିଲେ ପ୍ରାର୍ଥନା କର ଯେମିତି କରୋନା ଆମ ପାଖ ନ ମାଡୁ। ସୂଚନାଯୋଗ୍ୟ, ରବିବାର ସୁଦ୍ଧା ତାଞ୍ଜାନିଆରେ ୪୮୦ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଥିବା ବେଳେ ଏମାନଙ୍କ ମଧ୍ୟରୁ ୧୭ ଜଣଙ୍କ ମୃତ୍ୟୁ ହୋଇଛି। ରାଷ୍ଟ୍ରପତି ଆହୁରି ମଧ୍ୟ କହିଛନ୍ତି ସେ ଏକ ବିମାନ ମାଡାଗାସ୍କର ପଠାଇଛନ୍ତି ଯେଉଁଥିରେ କରୋନା ଭାଇରସର ଚିକିତ୍ସା ପାଇଁ ହର୍ବାଲ ଔଷଧ ଆସିବ। ହେଲେ ଏହି ଔଷଧ ଦ୍ୱାରା କରୋନା ଠିକ୍ ହେବାର ଦାବି କରାଯାଇ ନାହିଁ। ଏବେ ଆମେରିକା, ୟୁରୋପ ଅପେକ୍ଷା ଆଫ୍ରିକୀୟ ଦେଶରେ କରୋନା ସଂକ୍ରମିତଙ୍କ ସଂଖ୍ୟା କମ୍ ରହିଛି ସତ ହେଲେ ଏଠାରେ କମ୍ ସଂଖ୍ୟାରେ ଟେଷ୍ଟ କରାଯାଉଥିବାରୁ ସଂକ୍ରମିତଙ୍କ ଅସଲ ତଥ୍ୟ ବାହାରକୁ ଆସିପାରୁ ନାହିଁ ବୋଲି କୁହାଯାଉଛି।
