ଅନୁଗୋଳ ଅଫିସ, ୩୦।୬ – ବିଳମ୍ବରେ ହେଲେ ବି ଚେତିଛନ୍ତି ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷ। ଡାକ୍ତରଖାନାରେ ଲାଗିଥିବା ୮୧ଟି ଅଗ୍ନି ନିର୍ବାପକ ସିଲିଣ୍ଡରକୁ ରିଫିଲିଂ ପାଇଁ ଶନିବାର ଭୁବନେଶ୍ୱର ପଠାଇଛନ୍ତି। ସପ୍ତାହକ ମଧ୍ୟରେ ସିଲିଣ୍ଡର ଗୁଡ଼ିକରେ ଗ୍ୟାସ୍ ଓ ପାଉଡର ଫିଲିଂ କରାଯାଇ ଅଣାଯିବ ବୋଲି ଜିଲା ମୁଖ୍ୟ ଚିକିତ୍ସାଳୟ ମ୍ୟାନେଜର ଦେବାଶିଷ ଦାସ ସୂଚନା ଦେଇଛନ୍ତି।
ଜିଲା ମୁଖ୍ୟ ଚିକିତ୍ସାଳୟରେ ଥିବା ବିଭିନ୍ନ ବିଭାଗ ଓ ଓ୍ବାର୍ଡରେ ଅଗ୍ନି ନିରାପତ୍ତା ବ୍ୟବସ୍ଥା ପାଇଁ ଉକ୍ତ ସିଲିଣ୍ଡରଗୁଡ଼ିକୁ ରଖାଯାଇଥିଲା। ହେଲେ ତାହା କାର୍ଯ୍ୟ କରୁଛି କି ନାହିଁ ଏପରି କି ସମୟସୀମା ରହିଛି କିମ୍ବା ସରିଗଲାଣି ତାହା କର୍ତ୍ତୃପକ୍ଷଙ୍କୁ ଜଣା ନ ଥିଲା। ଏ ନେଇ ‘ଧରିତ୍ରୀ’ରେ ଖବର ପ୍ରକାଶ ପରେ ମେଡିକାଲ କର୍ତ୍ତୃପକ୍ଷ ସିଲିଣ୍ଡରଗୁଡ଼ିକର ଯାଞ୍ଚ କରିଥିଲେ। ସେଥିରେ ଗ୍ୟାସ ଓ ପ୍ରେସର କମ୍ ରହିଥିବାରୁ ଏହାକୁ ନେଇ ବିଭିନ୍ନ ମହଲରେ ଅସନ୍ତୋଷ ଦେଖିବାକୁ ମିଳିଥିଲା। ଶନିବାର ଭୁବନେଶ୍ୱରର ଏକ ଘରୋଇ କମ୍ପାନୀକୁ ଉକ୍ତ ସିଲିଣ୍ଡରଗୁଡ଼ିକୁ ରିଫିଲିଂ ପାଇଁ ପଠାଯାଇଛି। ହେଲେ ସ୍ତ୍ରୀ ଓ ପ୍ରସୂତି ବିଭାଗରେ ଲାଗିଥିବା କେତେକ ସିଲିଣ୍ଡରର ଅବଧି ଶେଷ ହୋଇଯାଇଥିଲେ ବି ତାହାକୁ ପଠାଯାଇ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ଏ ନେଇ ମେଡିକାଲ ମ୍ୟାନେଜର ଦାସ କହିଛନ୍ତି, ପ୍ରସୂତି ବିଭାଗ ଥିବା ୫ ମହଲା ଅଟ୍ଟାଳିକା ଆରଆଣ୍ଡବି ଅଧୀନରେ ରହିଛି। ତେଣୁ ସେଠାରେ କିଏ ଅଗ୍ନି ନିରାପତ୍ତା ବ୍ୟବସ୍ଥା ବୁଝିବ ଜାଣି ନାହୁଁ। ତଥାପି ସେଠାରେ ବିଭିନ୍ନ ଗୁରୁତ୍ୱପୂର୍ଣ୍ଣ ୱାର୍ଡ ଥିବାରୁ ଅଗ୍ନି ନିରାପତ୍ତା ସମ୍ପର୍କରେ ଯାଞ୍ଚ କରିବୁ। ଆବଶ୍ୟକ ପଡ଼ିଲେ ଏ ନେଇ ଆରଆଣ୍ଡବି ବିଭାଗକୁ ଅବଗତ କରାଯିବ ବୋଲି ମ୍ୟାନେଜର ଦାସ ପ୍ରକାଶ କରିଛନ୍ତି।
