ଧର୍ମଶାଳା,୨୪ା୬(ଡି.ଏନ୍.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅଞ୍ଚଳର ବହୁ ଚାଷୀ ଏବେ ଚାଷ ପ୍ରତି ବିମୁଖ ହେଉଛନ୍ତି। ଏହି ଅଞ୍ଚଳରେ ୭୦ ପ୍ରତିଶତ ଲୋକେ ଚାଷ ଉପରେ ନିର୍ଭର କରିଥାନ୍ତି। ମାତ୍ର ଚାଷରୁ ପୂର୍ବଭଳି ଲାଭ ହେଉ ନ ଥିବାରୁ ଚାଷୀ ଚାଷ କରିବାକୁ ମନ ବଳାଉ ନାହାନ୍ତି। ଏଥିପାଇଁ କୃଷି, ସମବାୟ ବିଭାଗ, ସାର ଓ ଔଷଧ ବ୍ୟବସାୟୀ ଏକ ପ୍ରକାର ଦାୟୀ ବୋଲି ଚାଷୀମାନେ ଅଭିଯୋଗ କରିଛନ୍ତି। ଅପରପକ୍ଷେ ବାତ୍ୟା ଓ ମରୁଡିରେ କ୍ଷତିଗ୍ରସ୍ତ ଚାଷୀଙ୍କୁ କୃଷି ବିଭାଗ କିମ୍ବା ବୀମା କମ୍ପାନୀ ପକ୍ଷରୁ ଆର୍ଥତ୍କ ସହାୟତା ଠିକ୍ ଭାବେ ମିଳିପାରି ନାହଁ। ମୁଲିଆ ମଜୁରୀ ମଧ୍ୟ ବଢିବାରେ ଲାଗଥିବାରୁ ଉତ୍ପାଦିତ ଦ୍ରବ୍ୟର ଉପଯୁକ୍ତ ମୂଲ୍ୟ ଚାଷୀ ପାଉ ନାହାନ୍ତି। ଏହା ମଧ୍ୟ ଚାଷରୁ ବିମୁଖ ହେବାର ଅନ୍ୟଏକ କାରଣ କୁହାଯାଉଛି। ଉଦାହରଣ ସ୍ବରୂପ ଧର୍ମଶାଳା ବ୍ଲକରେ ବିଗତ ବର୍ଷଗୁଡିକରେ ୧୩ହଜାର ୬୫ ହେକ୍ଟର ଜମିରେ ଧାନଚାଷ କରାଯାଉଥିଲା। କିନ୍ତୁ ଚଳିତ ବର୍ଷ ୧୨ହଜାର ୮ଶହ ହେକ୍ଟର ଜମିରେ ଚାଷ ପାଇଁ କୃଷି ବିଭାଗ ପକ୍ଷରୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ବ୍ଲକରେ ଏବେ ୧୩ଟି ସମବାୟ ସମିତିି ସହ ୩୩ଟି ଲାଇସେନ୍ସ୍ ପ୍ରାପ୍ତ ଦୋକାନ ମାଧ୍ୟମରେ ସାର ଓ ଔଷଧ ବିକ୍ରି କରିବା ପାଇଁ ସ୍ତିର କରାଯାଇଛି। ବିଲରେ ଧାନ ବୁଣିବା ପରେ ପଟାସ ଓ ଗ୍ରୋମୋର ବ୍ୟବହାର କରାଯାଇ ଥାଏ। ଏହି ସାର ଏବେ ଲାଇସେନ୍ସପ୍ରାପ୍ତ ଦୋକାନରେ ମିଳୁ ନ ଥିବା କୃଷକ ନେତା ବସନ୍ତ ପରିଡାଙ୍କ ସହିତ ଚାଷୀ ଲୋକନାଥ ପଲେଇ, ନେତ୍ରାନନ୍ଦ ଦାସ, ଲକ୍ଷ୍ମୀଧର ରାଉତ, ନିତ୍ୟାନନ୍ଦ ଦାସ ପ୍ରମୁଖ କୃଷି ବିଭାଗେ ନିକଟରେ ଅଭିଯୋଗ କରଥିବା ଜଣାପଡିଛି। ଏ ନେଇ ଧର୍ମଶାଳା ଅତିରିକ୍ତ କୃଷି ଅଧିକାରୀ ପଲ୍ଲବୀ ନାୟକଙ୍କୁ ପଚାରିବାରୁ, ବର୍ତ୍ତମାନ ସୁଦ୍ଧା ୬ଶହ ହେକ୍ଟର ବିଅଳି ଓ ଶାରଦ ବିଲରେ ଧାନ ବୁଣା ସରିଛି। ଏବେ ମୌସୁମୀ ବାୟୁ ସକ୍ରିୟ ଥିବାରୁ ଚାଷୀ ଧାନ ବୁଣିବା ପ୍ରକ୍ରିୟା ଆରମ୍ଭ କରିଛନ୍ତି। ମୂଲିଆ ଉପରେ ନିର୍ଭର କରି ଚାଷ କରୁଥିବା ଚାଷୀ ଅନେକ ସମୟରେ କ୍ଷତିର ସମ୍ମୁଖୀନ ହେଉଛନ୍ତି। ତେଣୁ ଚାଷର ଉନ୍ନତୀକରଣ ପାଇଁ ବିଭିନ୍ନ ଯୋଜନା ସହ ଅଧିକ ଅମଳ କ୍ଷମ ନୂତନ ବିହନ ବ୍ୟବହାର କରିବା ପାଇଁ ଚାଷୀଙ୍କୁ ପରାମର୍ଶ ଦିଆଯାଇଛି ବୋଲି ସେ କହିଛନ୍ତି।
