ଭୁବନେଶ୍ୱର,୧୬।୧୨(ବ୍ୟୁରୋ): ଆଇଓସିଏଲ୍ କମ୍ପାନୀରେ ଚାକିରି କରାଇ ଦେବାକୁ କହି ୮ଲକ୍ଷ ଟଙ୍କା ଠକେଇ ହୋଇଥିବା ଖଣ୍ଡଗିରି ଥାନାରେ ରବିବାର ରାତିରେ ଅଭିଯୋଗ ହୋଇଛି। ଠକେଇର ଶିକାର ହୋଇଛନ୍ତି ଏହି ଥାନା ଅଧୀନ ଜଗମୋହନ ନଗରରେ ରହୁଥିବା ସାଗର ପାଢ଼ି। ଏ ନେଇ ପୋଲିସ ତଦନ୍ତ ଆରମ୍ଭ କରିଦେଇଛି। ମିଳିଥିବା ସୂଚନା ଅନୁଯାୟୀ, ନୟାଗଡର ଜଣେ ଦଲାଲ ରାଜଧାନୀରେ ରହୁଥିବାବେଳେ ସେ ବେକାର ଯୁବକ ଯୁବତୀଙ୍କୁ ଆଇଓସିଏଲରେ ଚାକିରି କରାଇ ଦେବାକୁ ପ୍ରତିଶ୍ରୁତି ଦେଉଥିଲା। ଏପରିକି ଟଙ୍କା ନେବା ପରେ ଯୁବତୀ ଯୁବକଙ୍କୁ ଆଇଓସିଏଲର ଜାଲ୍ ଚିଠି ଦେଉଥିଲା। ଅଭିଯୋଗକାରୀ ସାଗର ନୟାଗଡ଼ରୁ ଆସି ଭୁବନେଶ୍ୱରରେ ରହି ଚାକିରି ଖୋଜୁଥିବାବେଳେ ଅଭିଯୁକ୍ତ ସହ ତାଙ୍କର ଭେଟ ହୋଇଥିଲା। ଅଭିଯୁକ୍ତ ଜଣଙ୍କ ତାଙ୍କୁ ଆଇଓସିଏଲରେ ପିଅନ ଚାକିରି କରାଇଦେବାକୁ ପ୍ରତିଶ୍ରୁତି ଦେଇଥିଲା। ଏ ବାବଦରେ ୮ଲକ୍ଷ ଟଙ୍କା ମାଗିଥିଲା। ସାଗର ୨୦୧୮ ମସିହାରେ ୮ଲକ୍ଷ ଟଙ୍କା ଦେଇଥିଲେ। ଟଙ୍କା ନେବା ପରେ ଅଭିଯୁକ୍ତ ଜଣଙ୍କ ଚାକିରିରେ ଯୋଗ ଦେବା ପାଇଁ ଏକ ସମୟ ଦେଇଥିଲା। ହେଲେ ଦିନ ପରେ ଦିନ ଗଡାଇ ଚାଲିବାରୁ ସାଗରଙ୍କ ସନ୍ଦେହ ହୋଇଥିଲା। ପରେ ଅଭିଯୁକ୍ତଙ୍କୁ ଟଙ୍କା ମାଗିବାରୁ ମଧ୍ୟ ସେ ଧରାଛୁଆଁ ଦେଇ ନ ଥିଲେ। ଶେଷରେ ସାଗର ନିରାଶ ହୋଇ ଥାନାର ଦ୍ୱାରସ୍ଥ ହୋଇଥିଲେ। ଦଲାଲ ଜଣଙ୍କ କେବଳ ସାଗର ନୁହନ୍ତି ଅନୁଗୋଳ, ତାଳଚେର, ସୁନ୍ଦରଗଡ଼ ଆଦି ଅଞ୍ଚଳର ଏକାଧିକ ପିଲାଙ୍କ ଠାରୁ ଚାକିରି କରାଇ ଦେବାକୁ ଟଙ୍କା ନେଇଥିବା ଜଣାପଡିଛି।
