ଗୋପାଳପୁର/ପାତ୍ରପୁର,୨୧ା୬(ଡି.ଏନ୍.ଏ.)- ଗୋ ମାଂସ ବୋଝେଇ ଏକ କଣ୍ଟେନରକୁ ଗଞ୍ଜାମ ଜିଲା ବଜରଙ୍ଗ ଦଳର କର୍ମୀମାନେ ରବିବାର ସକାଳେ ଓଡ଼ିଶା-ଆନ୍ଧ୍ର ସୀମାନ୍ତ ପୁରୁଷୋଥମ୍ପୁରମ୍ ନିକଟରେ ଅଟକାଇ ଥିଲେ। ପରେ ଏହାକୁ ଇଚ୍ଛାପୁର ପୋଲିସକୁ ହସ୍ତାନ୍ତର କରିଛନ୍ତି। ପୋଲିସ ଚାଳକ ଓ ସହ ଚାଳକଙ୍କୁ ଗିରଫ କରି ତଦନ୍ତ ଚଳାଇଛି।
କଲିକତାରୁ ୨ଟି କଣ୍ଟେନରରେ ଗୋ ମାଂସ ଚେନ୍ନାଇ ଚାଲାଣ ହେଉଥିବା ଗଞ୍ଜାମ ଜିଲା ବଜରଙ୍ଗ ଦଳର କର୍ମୀମାନଙ୍କ ନିକଟରେ ଶନିବାର ରାତିରେ ଖବର ପହଞ୍ଚତ୍ଥିଲା। ରବିବାର ଭୋର୍ରେ କର୍ମୀମାନେ ଜାତୀୟ ରାଜପଥ ନଂ.୧୬ ହଳଦିଆପଦର ନିକଟରେ ଜଗି ରହିଥିଲେ। ଏକ କଣ୍ଟେନର (ନଂ.ଟିଏନ୍୩୬ଏପି-୭୪୦୧) ସେହି ବାଟ ଦେଇ ଯାଉଥିବାବେଳେ ତାକୁ ଅଟକାଇଥିଲେ। ମାତ୍ର ଚାଳକ ଗାଡି ନ ରଖି ଦ୍ରୁତ ଗତିରେ ଆନ୍ଧ୍ର ଅଭିମୁଖେ ପଳାଇଥିଲେ। କର୍ମୀମାନେ ଏକ ଗାଡିରେ ପିଛା କରି ପୁରୁଷୋଥମ୍ପୁରମ ଅଞ୍ଚଳରେ କଣ୍ଟେନରଟିକୁ ଅଟକାଇଥିଲେ। ଯାଞ୍ଚ ପରେ ସେଥିରେ ଗୋ ମାଂସ ଥିବା ଦେଖିବା ପରେ ଆନ୍ଧ୍ରପ୍ରଦେଶର ଇଚ୍ଛାପୁର ଥାନାକୁ ଜଣାଇଥିଲେ। ପୋଲିସ ପହଞ୍ଚତ୍ ଗାଡିକୁ ଜବତ କରିବା ସହ ଚାଳକ ତାମିଲନାଡୁ ତିରୁନାଭେଲି ଜିଲାର ଫ୍ରାନ୍ସିସି ଓ ସହ ଚାଳକ ସେଲମ୍ ଜିଲାର ଗଣପତି ଶେଖରଙ୍କୁ ଗିରଫ କରିଛି। ଏନେଇ ପୋଲିସ ନିଜଆଡୁ ମାମଲା (ନଂ.୩୨୨/୨୦) ରୁଜୁକରି ତଦନ୍ତ ଚଳାଇଛି। ଗାଡିରେ ୧୩୦୦ ପ୍ୟାକେଟ (୨୬୦ କୁଇଣ୍ଟାଲରୁ ଊର୍ଦ୍ଧ୍ୱ) ଗୋ-ମାଂସ ଥିବା ଜଣାପଡିଛି। ଜବତ ମାଂସ ଲାବରୋଟୋରିରେ ପରୀକ୍ଷା ପରେ ପ୍ୟାକେଟଗୁଡିକୁ ପୋତି ଦିଆଯିବ ବୋଲି ପୋଲିସ କହିଛି। ବଜରଙ୍ଗ ଦଳର ମହନ୍ତ ଚିନ୍ମୟାନନ୍ଦ ଦାଶ, ଅମ୍ବିକା ଦାଶ, ସୁଶାନ୍ତ ବେହେରା, ନୀଳାଞ୍ଚଳ ବିଷୋୟୀ, ଦୀପକ ମହାପାତ୍ର, ବାଲକ୍ରିଷ୍ଣା ରେଡ୍ଡୀ ପ୍ରମୁଖ ଗାଡିଟିକୁ ପିଛା କରି ଅଟକାଇଥିଲେ।
