ଖୋର୍ଦ୍ଧା ଅଫିସ,୧ା୪: ଲକଡାଉନକୁ ଅଧିକ କଡ଼ାକଡି କରିବା ଉପରେ ସରକାର ଗୁରୁତ୍ୱ ଦେଉଛନ୍ତି। ମଙ୍ଗଳବାର ଠାରୁ ଖୋର୍ଦ୍ଧା ଜିଲା ପ୍ରଶାସନ ପକ୍ଷରୁ ଜିଲା ସୀମାକୁ ସିଲ କରାଯାଇଛି। ବିନା କାରଣରେ କୌଣସି ବ୍ୟକ୍ତିଙ୍କୁ ଜିଲା ମଧ୍ୟକୁ ପ୍ରବେଶ ଅନୁମତି ଦିଆଯିବ ନାହିଁ ବୋଲି କୁହାଯାଇଛି।
ପୋଲିସ ମହାନିର୍ଦ୍ଦେଶକ ଅଭୟ ସୋମବାର ଖୋର୍ଦ୍ଧା ଜିଲା ଗସ୍ତରେ ଆସିଥିବାବେଳେ ଡିଆଇଜି ଆଶିଷ କୁମାର ସିଂ ଏବଂ ଏସ୍ପି ଅଜୟ ପ୍ରତାପ ସ୍ବାଇଁଙ୍କ ସହ ଆଲୋଚନା କରି ଏହି ନିର୍ଦ୍ଦେଶ ଦେଇଥିଲେ। ଜିଲାର ୩ ପ୍ରବେଶ ପଥ ଯଥା ନୂଆ ବସଷ୍ଟାଣ୍ଡ, ଚଣ୍ଡିଚୁଆ ଛକ ଏବଂ ମୁକୁନ୍ଦପ୍ରସାଦ ରାସ୍ତାକୁ ସିଲ କରାଯାଇଛି। ସହରରେ ୩୦ଟି ଛକ ସ୍ଥାନରେ କ୍ରସ ବ୍ୟାରିକେଡ ଦେଇ ଯାତାୟତ ବନ୍ଦ କରାଯାଇଛି। କେବଳ ନୟାଗଡ ରୋଡ, ନୂଆ ବସଷ୍ଟାଣ୍ଡକୁ ସଂଯୋଗ କରୁଥିବା ରାସ୍ତା ଖୋଲା ରହିଛି। ଏସ୍ପି ଅଜୟ ପ୍ରତାପ ସ୍ବାଇଁ କହିଛନ୍ତି, କାର ଓ ବାଇକ ଚାଳକ କେଉଁ ଉଦ୍ଦେଶ୍ୟରେ ଯାଉଛନ୍ତି, ତାହାର ଠିକ ପ୍ରମାଣ ନ ଦେଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ଅତ୍ୟାବଶ୍ୟକ ସାମଗ୍ରୀ ନେଇ ଯାତାୟତ କରୁଥିବା ଗାଡ଼ି ମଧ୍ୟ ଅନୁମତି ପତ୍ର ରଖିଥିବା ଆବଶ୍ୟକ। ଏଣିକି ଲକଡାଉନ ସମୟରେ ରାସ୍ତାରେ ବାଇକ ଏବଂ କାର ଯାତାୟାତକୁ ଅନୁମତି ଦିଆଯିବ ନାହିଁ। ପନିପରିବା, ଫଳମୂଳ ଏବଂ ଔଷଧ କିଣିବା ଲାଗି ଆସୁଥିବା ବ୍ୟକ୍ତି ଚାଲିକି ଆସନ୍ତୁ। ବାଇକରେ ଆସିଲେ କାର୍ଯ୍ୟାନୁଷ୍ଠାନ ନିଆଯିବ। ଅନ୍ୟପକ୍ଷରେ ସନ୍ଧ୍ୟାରେ ଗଳିକନ୍ଦିରେ ଏକାଠି ହୋଇ ଗୁଲିଖଟି କରୁଥିବା ବ୍ୟକ୍ତିଙ୍କୁ ପୋଲିସ ଗୋଡ଼ାଇ ଗୋଡାଇ ପିଟୁଥିବା ଦେଖିବାକୁ ମିଳିଛି।
