ମୁମ୍ବାଇ,୭।୬(ପି.ଟି.): ଭାରତୀୟ ଅଧିନାୟକ ବିରାଟ କୋହଲିଙ୍କ ପ୍ରଶଂସାରେ ଶତମୁଖ ହୋଇଛନ୍ତି ନ୍ୟୁଜିଲାଣ୍ଡ ଅଧିନାୟକ କେନ୍ ଓ୍ବିଲିୟମସନ। କୋହଲିଙ୍କ ସହିତ ଖେଳିଥିବାରୁ ନିଜକୁ ଭାଗ୍ୟବାନ ମନେ କରୁଛି ବୋଲି ସେ କହିଛନ୍ତି। ଜଣେ ଯୁବରୁ ପରିପକ୍ୱ କ୍ରିକେଟର ହୋଇଥିବା କୋହଲିଙ୍କୁ ଆରମ୍ଭରୁ ଅତି ନିକଟରୁ ଲକ୍ଷ୍ୟ କରିଆସିଛି ବୋଲି ସେ କୁହନ୍ତି।
କୋହଲି ଓ ଓ୍ବିଲିୟମସନ ମାଲେସିଆରେ ଅନୁଷ୍ଠିତ ୨୦୦୮ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ୧୯ ବର୍ଷରୁ କମ୍ରେ ଅଂଶଗ୍ରହଣ କରିଥିଲେ। ଏଥିରେ ଭାରତ ଚାମ୍ପିୟନ ହୋଇଥିଲା। ଏହାପରେ ଏହି ଦୁଇ କ୍ରିକେଟର ବିଶ୍ୱର ମହାନ୍ ବ୍ୟାଟ୍ସମ୍ୟାନରେ ପରିଣତ ହୋଇଛନ୍ତି। ପରସ୍ପର ବିପକ୍ଷରେ ଖେଳୁଥିବାରୁ ଆମେ ନିଜକୁ ଭାଗ୍ୟବାନ ମନେ କରୁଛୁ। କୋହଲି ଇତିମଧ୍ୟରେ ବହୁତ ଉନ୍ନତି କରି ଦୃଷ୍ଟାନ୍ତ ସୃଷ୍ଟି କରିଛନ୍ତି ବୋଲି ଷ୍ଟାର ସ୍ପୋଟର୍ସ ଶୋ ‘କ୍ରିକେଟ କନେକ୍ଟେଡ’ରେ ଅଂଶଗ୍ରହଣ କରି ସେ କହିଛନ୍ତି। ୨୦୦୮ ୧୯ ବର୍ଷରୁ କମ୍ ବିଶ୍ୱକପ୍ରେ ଭାରତ ଓ ନ୍ୟୁଜିଲାଣ୍ଡ ପରସ୍ପରକୁ ଭେଟିଥିଲେ। ରବୀନ୍ଦ୍ର ଜାଡେଜା, ଟ୍ରେଣ୍ଟ ବୋଲ୍ଟ ଓ ଟିମ୍ ସୌଦିଙ୍କ ଭଳି ଖେଳାଳି ମଧ୍ୟ ଏହି ମ୍ୟାଚ୍ ଖେଳିଥିଲେ।
ଓ୍ବିଲିୟମସନଙ୍କ ନେତୃତ୍ୱରେ ନ୍ୟୁଜିଲାଣ୍ଡ ୨୦୧୯ ଆଇସିସି ବିଶ୍ୱକପ୍ ଫାଇନାଲରେ ପ୍ରବେଶ କରିଥିଲା। କ୍ରିକେଟ ସମ୍ପର୍କରେ କୋହଲିଙ୍କ ସହିତ ମୋର ଏକାଧିକବାର ଆଲୋଚନା ହୋଇଛି। ଦୀର୍ଘଦିନ ଧରି ଆମେ ପରସ୍ପର ବିପକ୍ଷରେ ଖେଳି ଆସିଛୁ। ତାଙ୍କ ସହିତ ଖେଳି ବହୁତ କିଛି ଜାଣିବାକୁ ସକ୍ଷମ ହୋଇଛି ଓ ଏଥିପାଇଁ ନିଜକୁ ଭାଗ୍ୟବାନ ମନେ କରୁଛି।
