ନୂଆଦିଲ୍ଲୀ,୨୧।୪ (ପି.ଟି.): କୋଭିଡ୍-୧୯ ମୁକାବିଲା ପାଇଁ ଯୁବ ଗଲ୍ଫର ଅର୍ଜୁନ ଭଟ୍ଟି ପ୍ରୟାସ ଜାରି ରଖିଛନ୍ତି। ସେ ୩.୩ ଲକ୍ଷ ଟଙ୍କାର ପାଣ୍ଠି ସଂଗ୍ରହ କରିଛନ୍ତି। ନିଜର ଫଟା ବା ଛିଣ୍ଡା ଜୋତା ବିକ୍ରି କରି ସେ ଏହି ପରିମାଣର ଅର୍ଥ ସଂଗ୍ରହ କରିଛନ୍ତି। ୨୦୧୮ ଜୁନିୟର ବିଶ୍ୱ ଚାମ୍ପିୟନଶିପ୍ ଖେଳିବା ଅବସରରେ ସେ ଏହି ଜୋତା ପିନ୍ଧିଥିଲେ ଓ ଚାମ୍ପିୟନ ହେବାର ଗୌରବ ଅର୍ଜନ କରିଥିଲେ। ଗ୍ରେଟର ନୋଏଡାର ଏହି ୧୫ ବର୍ଷୀୟ ଗଲ୍ଫର ପୂର୍ବରୁ ମଧ୍ୟ ନିଜର ୧୦୨ଟି ଟ୍ରଫି ବିକ୍ରି କରି ୪.୩୦ ଲକ୍ଷ ଟଙ୍କା ସଂଗ୍ରହ କରିଥିଲେ ଓ ଏହାକୁ ପ୍ରଧାନମନ୍ତ୍ରୀଙ୍କ କେୟାର୍ସ ଫଣ୍ଡକୁ ପ୍ରଦାନ କରିଥିଲେ। ଛିଣ୍ଡା ଯୋତା ବିକ୍ରି କରି ସେ ସଂଗ୍ରହ କରିଥିବା ୩,୩୦, ୦୦୦ ଟଙ୍କାକୁ ପ୍ରଧାନମନ୍ତ୍ରୀ କେୟାର୍ସ ଫଣ୍ଡକୁ ଦାନ କରିଛନ୍ତି ବୋଲି ଅର୍ଜୁନ କହିଛନ୍ତି। ଆମେ ରହୁ କି ନ ରହୁ ଆମ ଦେଶ ରହୁ। କରୋନା ଭାଇରସ ସଂକ୍ରମଣରୁ ସମସ୍ତଙ୍କୁ ବଞ୍ଚିବାକୁ ହେବ ବୋଲି ସେ ଟୁଇଟ୍ କରି ଜଣାଇଛନ୍ତି। ଅର୍ଜୁନ ପୂର୍ବରୁ ତାଙ୍କର ୩ଟି ଜୁନିୟର ଗଲ୍ଫ ଚାମ୍ପିୟନଶିପ୍ ଟାଇଟଲ ସହ ସବୁ ଟ୍ରଫି ବିକ୍ରି କରିଦେଇଥିଲେ। ଅବଶ୍ୟ ଏହି ଟ୍ରଫି ସବୁ ତାଙ୍କ ସମ୍ପର୍କୀୟ, ବନ୍ଧୁ ଓ ମାତାପିତା କ୍ରୟ କରିଥିଲେ। ପୂର୍ବରୁ ସଚିନ ତେନ୍ଦୁଲକର, ବିରାଟ କୋହଲି, ସୁନୀଲ ଗାଭାସ୍କର, ସୁରେଶ ରାଇନା, ମେରୀକମ୍, ପି.ଭି. ସିନ୍ଧୁ, ସୁଶୀଲ କୁମାର ଓ ଯୋଗେଶ୍ୱର ଦତ୍ତଙ୍କ ଭଳି ଖେଳାଳି ପ୍ରଧାନମନ୍ତ୍ରୀ କେୟାର୍ସ ଫଣ୍ଡକୁ ଅର୍ଥ ଦାନ କରିଛନ୍ତି।
