କଟକ ଅଫିସ, ୨୦-୧୧:‘ୟାରୋ ଦୋସ୍ତି ବଡିହି ହସିନ୍ ହେ, ୟେ ନା ହୋ ତୋ କ୍ୟା ଫିର ବୋଲୋ ୟେ ଜିନ୍ଦେଗି ହେ’ ଗୀତରେ ମତୁଆଲା ହୋଇଛନ୍ତି ଦର୍ଶକ। ବାଲିଯାତ୍ରା ପଡିଆର ଗଣକବି ବୈଷ୍ଣବ ପାଣି ମଞ୍ଚରେ ବଲିଉଡ କଣ୍ଠଶିଳ୍ପୀ କ୍ରିଷ୍ଣାକୁମାର କୁନାଥ(କେକେ)ଙ୍କ ସଙ୍ଗୀତରେ ମତୁଆଲା ହୋଇଥିଲେ ଦର୍ଶକ। କେକେଙ୍କ ଗୀତ ଶୁଣିବା ପାଇଁ ମଙ୍ଗଳବାର ମଞ୍ଚ ନିକଟରେ ଦର୍ଶକଙ୍କ ଭିଡ ହୋଇଥିଲା। ପ୍ରାୟ ୨ଘଣ୍ଟା ଧରି କେକେଙ୍କ ଗୀତରେ ଦର୍ଶକମାନେ ଝୁମିଥିଲେ। ବେଜାନ ଦିଲକୋ ତେରେ ଇସ୍କ ନେ ଜିନ୍ଦା କିୟା, କିୟୁଁ ଆଜ୍ କଲ୍ ହମ ନିନ୍ଦ କମ ଖ୍ବାଓ୍ବ ଜ୍ୟାଦା ହେ ଆଦି ରୋମାଣ୍ଟିକ ଗୀତ ତାଳେ ତାଳେ ଯୁବପିଢ଼ି ଷ୍ଟେଜ ସମ୍ମୁଖରେ ନାଚିଥିଲେ। ସେହିପରି ବାଲିଯାତ୍ରା ପଡିଆର ମହାନଦୀ ମଞ୍ଚରେ ନଟରାଜ ଡ୍ୟାନ୍ସ ଗ୍ରୁପର କଳାକାରମାନେ ଶିବ ତାଣ୍ଡବ ନୃତ୍ୟ ପରିବେଷଣ କରିଥିଲେ। କଳାତୀର୍ଥ ଅନୁଷ୍ଠାନ ପକ୍ଷରୁ ପରିବେଷଣ କରାଯାଇଥିବା ପାରମ୍ପରିକ ଲୋକ ନୃତ୍ୟରେ ଦର୍ଶକ ଆନମନା ହୋଇଥିଲେ। ଏଥିସହିତ ବିଭିନ୍ନ ଅନୁଷ୍ଠାନ ପକ୍ଷରୁ ଲୋକନୃତ୍ୟ ପରିବେଷଣ କରାଯାଇଥିଲା। ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ସୁବାସ ସିଂ, ସମ୍ମାନିତ ଅତିଥି ଭାବେ ଜିଲାପାଳ ଭବାନୀ ଶଙ୍କର ଚୟନୀ, ଅତିରିକ୍ତ ଜିଲାପାଳ ବିଜୟ କୁମାର ଖଣ୍ଡାୟତରାୟ, ଉପ ଜିଲାପାଳ ଶୁଭ୍ରାଂଶୁ ମିଶ୍ର, ଅତିରିକ୍ତ ପୋଲିସ ଡିଜି ପ୍ରାଣବିନ୍ଦୁ ଆଚାର୍ଯ୍ୟ, ସିଏମ୍ସି କମିଶନର ଅନନ୍ୟା ଦାସ, ଟ୍ରାଫିକ ଡିସିପି ସାଗରିକା ନାଥ ପ୍ରମୁଖ ଉପସ୍ଥିତ ଥିଲେ। ସୁଲଗ୍ନା ଓ ଶୁଭମ କୁମାର ବେହେରା କାର୍ଯ୍ୟକ୍ରମ ସଂଯୋଜନା କରିଥିଲେ।
