ନୂଆଦିଲ୍ଲୀ,୭।୬: କରୋନା ସଂକ୍ରମଣ ଏବେ ସାରା ବିଶ୍ୱରେ କାୟା ବିସ୍ତାର କରି ଚାଲିଥିବା ବେଳେ ଭାରତରେ ମଧ୍ୟ ବେଳକୁ ବେଳ ସ୍ଥିତି ଅଣାୟତ ହେବାରେ ଲାଗିଛି। ମହାରାଷ୍ଟ୍ର ଓ ରାଜଧାନୀ ଦିଲ୍ଲୀରେ ବେଳକୁ ବେଳ ସଂକ୍ରମିତଙ୍କ ସଂଖ୍ୟାରେ ବହୁ ପରିମାଣରେ ବୃଦ୍ଧି ଘଟୁଛି। ଏହାକୁ ଦେଖିବା ପରେ ଅନୁମାନ କରାଯାଉଛି କି ଜୁନ୍ ମାସ ଶେଷ ବେଳକୁ ରାଜଧାନୀ ଦିଲ୍ଲୀରେ କରୋନା ସଂକ୍ରମଣ ସଂଖ୍ୟା ୧ ଲକ୍ଷ ଅତିକ୍ରମ କରିଯାଇପାରେ। ଏକଥା କହୁଛି ଦିଲ୍ଲୀ ସରକାରଙ୍କଦ୍ୱାରା ଗଠନ କରାଯାଇଥିବା କୋଭିଡ-୧୯ କମିଟି। ତେଣୁ ଏହାକୁ ନଜରରେ ରଖି ଏହି କମିଟି ଦିଲ୍ଲୀ ସରକାରଙ୍କୁ ଆଉ ୧୫,୦୦୦ ବେଡ୍ ପ୍ରସ୍ତୁତ ରଖିବାକୁ କହିଛନ୍ତି। ନ୍ୟୁଜ ଏଜେନ୍ସି ଏଏନ୍ଆଇର ଏକ ରିପୋର୍ଟରେ ମଧ୍ୟ କୁହାଯାଇଛି ୧୫ ଜୁଲାଇ ବେଳକୁ ରାଜଧାନୀ ଦିଲ୍ଲୀରେ ୪୨,୦୦୦ ବେଡ୍ର ଆବଶ୍ୟକତା ପଡିପାରେ।
