ସମ୍ବଲପୁର,୧୦।୪(ବ୍ୟୁରୋ): ସମ୍ବଲପୁରର ବିଭିନ୍ନ ସ୍କୁଲର ଶିକ୍ଷୟିତ୍ରୀ, ଶିକ୍ଷକମାନଙ୍କୁ କରୋନା ମୁକାବିଲା ପାଇଁ ନିୟୋଜିତ କରାଯିବ । ଏ ନେଇ ଶୁକ୍ରବାର ସହରର ୧୫ଟି ସ୍କୁଲରେ ଦୁଇ ଦିନିଆ ତାଲିମ ଶିବିର ଅନୁଷ୍ଠିତ ହୋଇଯାଇଛି । ପ୍ରାୟ ୭୫୦ ଜଣ ଶିକ୍ଷୟିତ୍ରୀ, ଶିକ୍ଷକ ଏଥିରେ ତାଲିମ ନେଇଛନ୍ତି। ସେମାନଙ୍କୁ ନେଇ ୨୫ରୁ ୩୦ଟି ଗ୍ରୁପ୍ କରାଯିବ। ବିଭିନ୍ନ ସ୍ଥାନରେ ଏମାନେ କରୋନା ମୁକାବିଲା ପାଇଁ ସଚେତନ କରିବେ ବୋଲି ନିର୍ଦ୍ଦେଶ ଦିଆଯାଇଛି । ଘର ଘର ଯାଇ ସ୍ଥାନୀୟ ଆଶା ଓ ଅଙ୍ଗନୱାଡି କର୍ମୀଙ୍କ ସହ ଆଲୋଚନା କରି ଜନସାଧାରଣଙ୍କୁ ସଚେତନ କରି ରିପୋର୍ଟ ସଂଗ୍ରହ କରିବେ।
ଏହି ମହାମାରୀର ମୁକାବିଲା ପାଇଁ କିନ୍ତୁ ଶିକ୍ଷୟିତ୍ରୀ, ଶିକ୍ଷକଙ୍କୁ ନିୟୋଜିତ କରିବା ନେଇ ବିଭିନ୍ନ ମହଲରେ ଅଭିଯୋଗ କରିବା ସହ ଅସନ୍ତୋଷ ପ୍ରକାଶ ପାଇଛି । ଏପରି ସ୍ଥିତିରେ ଘରୁ ବାହାରିବା ପାଇଁ ମନା କରାଯାଇଥିବା ବେଳେ ପୁଣି ଶିକ୍ଷୟିତ୍ରୀ ଶିକ୍ଷକମାନଙ୍କୁ ବାହାରକୁ ଆସି କାମ କରିବା ଯୁକ୍ତିଯୁକ୍ତ ନୁହେଁ ବୋଲି ଅଭିଯୋଗ ହୋଇଛି। ଏ ନେଇ ମହେନ୍ଦ୍ର ମିଶ୍ର ନାମକ ଜଣେ ବ୍ୟକ୍ତି ମୁଖ୍ୟମନ୍ତ୍ରୀଙ୍କୁ ମଧ୍ୟ ଅଭିଯୋଗ କରିଛନ୍ତି । ରାଜ୍ୟରେ ଦିନକୁ ଦିନ ସଂକ୍ରମଣ ସଂଖ୍ୟା ବୃଦ୍ଧି ପାଉଛି । ଘରେ ରହନ୍ତୁ ସୁରକ୍ଷିତ ରୁହନ୍ତୁ ବୋଲି ରାଜ୍ୟ ଓ କେନ୍ଦ୍ର ସରକାର ଜନସାଧାରଣଙ୍କୁ ବାର୍ତ୍ତା ଦେଉଛନ୍ତି । କରୋନା ମୁକାବିଲା ପାଇଁ ଜିଲାର ସମସ୍ତ ଜନସାଧାରଣ ଏବେ ସଚେତନ ହୋଇ ସାରିଛନ୍ତି । ଏଥିପାଇଁ ପୋଲିସ, ସ୍ବାସ୍ଥ୍ୟ ବିଭାଗ, ଆଶା ଓ ଅଙ୍ଗନୱାଡି କର୍ମୀ ଦୃଷ୍ଟାନ୍ତମୂଳକ କାର୍ଯ୍ୟ କରି ସଚେତନ କରିଛନ୍ତି । ବିଭିନ୍ନ ସୋସିଆଲ ମିଡିଆ ଓ ଟିଭି ମାଧ୍ୟମରେ ଜନସାଧାରଣ ସଚେତନ ହୋଇସାରିଛନ୍ତି । ସ୍ବାସ୍ଥ୍ୟ ବିଭାଗରୁ ମଧ୍ୟ ସମସ୍ତ ରିପୋର୍ଟ ସଂଗ୍ରହ କରାଯାଉଛି । ଏ ପରିପ୍ରେକ୍ଷୀରେ ପୁଣି ଶିକ୍ଷୟିତ୍ରୀ, ଶିକ୍ଷକଙ୍କୁ ଏହି କାର୍ଯ୍ୟରେ ନିୟୋଜିତ କରି ଜୀବନ ବିପଦକୁ ଠେଲି ଦିଆଯାଉଛି ବୋଲି ସେ ଅଭିଯୋଗ କରିଛନ୍ତି । ସେହିପରି କଳା ପରିଷଦ ସଦସ୍ୟ ସଞ୍ଜୀବ ମିଶ୍ର ମଧ୍ୟ ଅଭିଯୋଗ କରିଛନ୍ତି । ଶିକ୍ଷୟିତ୍ରୀ, ଶିକ୍ଷକଙ୍କ ପରିବାର ପରିଜନ ମଧ୍ୟ ଏଭଳି ନିଷ୍ପତ୍ତିକୁ ଭୟରେ ନିନ୍ଦା କରିଛନ୍ତି।
