ନୂଆଦିଲ୍ଲୀ,୨୬।୩: କରୋନା, କ୍ୱାରାଣ୍ଟାଇନ୍, ଆଇସୋଲେଶନ। ଏବେ ଏହି ଶବ୍ଦର ବହୁଳ ବ୍ୟବହାର କରାଯାଉଛି। ଆଉ ଏହି ଶବ୍ଦ ଗୁଡିକ ସାଧାରଣ ଜନତା ପାଇଁ ସୃଷ୍ଟି କରିଛି ଭୟ। କରୋନା ଭାଇରସ ଏବେ ବିଶ୍ୱର ମୁଣ୍ଡ ବିଗାଡି ଥିବା ବେଳେ ଭାରତୀୟ ମଧ୍ୟ ଏଥିରୁ ମୁକୁଳିବାକୁ ଯୁଦ୍ଧ କରିବା ଭଳି ଲଢି ଚାଲିଛନ୍ତି। ଏହା ପରେ ବି ଭାରତରେ ବଢୁଥିବା କରୋନା ସଂକ୍ରମଣ ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ରାଜଧାନୀ ଦିଲ୍ଲୀରେ ଏବେ କରୋନା ସଂକ୍ରମଣଙ୍କ ସଂଖ୍ୟା ପହଞ୍ଚିଛି ୩୬ରେ। ମୋହଲା କ୍ଲିନକର ଜଣେ ଡାକ୍ତର ଓ ଅନ୍ୟ ୪ କରୋନା ପଜିଟିଭ ମିଳିବା ପରେ ଏବେ ଏହି ସଂଖ୍ୟା ବୃଦ୍ଧି ପାଇ ୩୬ ଛୁଇଁଛି। ଏମାନେ ସମସ୍ତେ ଜଣେ କରୋନା ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ଜଣାପଡିଛି। ସୌଦି ଆରବରୁ ଜଣେ ମହିଳା ଫେରିବା ପରେ ସେ କରୋନା ସଂକ୍ରମିତ ଥିବା ଜଣାପଡିଥିଲା। ଏହାପରେ ତାଙ୍କୁ ଚିକିତ୍ସା କରୁଥିବା ଡାକ୍ତର ପ୍ରଥମେ କରୋନାରେ ସଂକ୍ରମିତ ହେଲେ ଓ ପରେ ଉକ୍ତ ଡାକ୍ତରଙ୍କ ପତ୍ନୀ ଓ ଝିଅ ମଧ୍ୟ କରୋନାରେ ସଂକ୍ରମିତ ହୋଇଥିବା କହିଛନ୍ତି ଦିଲ୍ଲୀର ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ। ତେବେ ସଂକ୍ରମିତ ଡାକ୍ତରଙ୍କ ସଂସ୍ପର୍ଶରେ ଆସିଥିବା ପ୍ରାୟ ୮୦୦ ଲୋକଙ୍କୁ ୧୪ ଦିନ ପାଇଁ କ୍ୱାରାଣ୍ଟାଇନରେ ରଖାଯିବ ବୋଲି ଘୋଷଣା କରାଯାଇଛି।
