ମୁମ୍ବାଇ: ବଲିଉଡ୍ ଅଭିନେତା କାର୍ତ୍ତିକ ଆର୍ୟନ ତାଙ୍କ କ୍ୟାରିୟରରେ ଆଗକୁ ବଢ଼ିବାରେ ଲାଗିଛନ୍ତି। ଏବେ ସେ ଅନ୍ୟମାନଙ୍କଠାରୁ କମ୍ ବଜେଟରେ କାମ କରୁଛନ୍ତି ବୋଲି କୁହାଯାଉଛି। କିନ୍ତୁ ତାଙ୍କର ସବୁ ଫିଲ୍ମ ବକ୍ସ ଅଫିସ୍ରେ ଶହେ କୋଟିରୁ ଊର୍ଦ୍ଧ୍ୱ ଆୟ କରୁଛି। କାର୍ତ୍ତିକଙ୍କ ଫିଲ୍ମକୁ ପ୍ରଶଂସକ ବେଶ୍ ପସନ୍ଦ କରିଥାନ୍ତି। ଫିଲ୍ମ ‘ପତି ପତ୍ନୀ ଔର୍ ଓ୍ବ’ ପରେ ଏବେ ସେ ଦୋସ୍ତାନା-୨ର ଶୁଟିଂ ପାଇଁ ଲାଗିପଡ଼ିଛନ୍ତି। ତେବେ ଶୁଟିଂର ଆରମ୍ଭରୁ କାର୍ତ୍ତିକଙ୍କ ଏକ ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯେଉଁଥିରେ ପ୍ରଯୋଜକ ତଥା ନିର୍ଦ୍ଦେଶକ କରଣ ଜୋହରଙ୍କ ପାଦ ଛୁଇଁ କାର୍ତ୍ତିକ ଆଶୀର୍ବାଦ ନେଉଥିବାର ଦେଖିବାକୁ ମିଳିଛି। ଏହି ଫଟୋ ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି।
କାର୍ତ୍ତିକ ଏହି ଫଟୋକୁ ଇନ୍ଷ୍ଟାଗ୍ରାମରେ ଶେୟାର କରିବା ସହ କ୍ୟାପଶନରେ ଲେଖିଛନ୍ତି, ‘ମା’ ଦା ଲାଡଲା ଚଣ୍ଡିଗଡ଼ ନିକଲା ଗୟା’। ଦୋସ୍ତାନା-୨। ଏଥିସହ ସେ ଲେଖିଛନ୍ତି, ଏହା ଧର୍ମା ପ୍ରଡକ୍ସନର ଏକ ପରମ୍ପରା, ଏହି ବ୍ୟାନରରେ ହେଉଥିବା ସମସ୍ତ ଫିଲ୍ମର ଆରମ୍ଭରୁ ସବୁ ଅଭିନେତାଙ୍କୁ ଏହା କରିବା ଉଚିତ ବୋଲି କାର୍ତ୍ତିକ କହିଛନ୍ତି। ତେବେ ତାଙ୍କର ଏହି କ୍ୟାପଶନର ପ୍ରତିଉତ୍ତର ରଖିଛନ୍ତି କରଣ। କାର୍ତ୍ତିକଙ୍କ ପୋଷ୍ଟରେ ସେ ହସିବା ସହ ଏହା ବେକାର କଥା ବୋଲି କହିଛନ୍ତି। ମୋତେ ବୃଦ୍ଧ ହେବାର ଅନୁଭବ କରାଇବା ବନ୍ଦ କର ବୋଲି କାର୍ତ୍ତିକଙ୍କୁ କରଣ କହିଛନ୍ତି।
