ଦାରିଙ୍ଗବାଡ଼ି,୧୬।୩(ଡି.ଏନ୍.ଏ.)
ସାରା ପୃଥିବୀରେ ଏବେ କରୋନା ଭୟ। ରାଜ୍ୟ ବିପର୍ଯ୍ୟୟ ଘୋଷଣା ପରେ କନ୍ଧମାଳ ଜିଲାପାଳ ଡ. ବୃନ୍ଦା ଡି ସମସ୍ତ ନିର୍ଦ୍ଦେଶକୁ କଡାକଡି ପାଳନ କରିବାକୁ ନିର୍ଦ୍ଦେଶନାମା ଜାରି କରିଥିଲେ। ନିର୍ଦ୍ଦେଶ ପ୍ରକାରେ ଦାରିଙ୍ଗବାଡ଼ିର ସମସ୍ତ ପାର୍କ ବନ୍ଦ କରିଦିଆଯାଇଥିଛି। ମାତ୍ର କଫି ବଗିଚା ଏବଂ ମିଡ଼ିୟୁବାନ୍ଦା ଜଳପ୍ରପାତକୁ ଦୈନିକ ଶହଶହ ପର୍ଯ୍ୟଟକ ଆସୁଛନ୍ତି। କଫି ବଗିଚା ଦାୟିତ୍ୱରେ ରହିଥିବା ମୃତ୍ତିକା ସଂରକ୍ଷଣ ଓ ଜଳ ବିଭାଜିକା ବିଭାଗ ପକ୍ଷରୁ ଜିଲାପାଳଙ୍କ ନିର୍ଦ୍ଦେଶକୁ ଅବମାନନା କରି ଟିକେଟ ବିକ୍ରି ସହ ପର୍ଯ୍ୟଟକଙ୍କୁ ଭିତରକୁ ଛଡାଯାଉଛି। ସେହିଭିତରେ ସମସ୍ତ ପ୍ରକାର ଖୁଚୁରା ଦୋକାନ ମଧ୍ୟ ଖୋଲାରହିଛି। ସେହିପରି ଦାସିଂବାଡ଼ିଠାରେ ଥିବା ମିଡ଼ିୟୁବାନ୍ଦା ଜଳପ୍ରପାତଠାରେ ମଧ୍ୟ ପର୍ଯ୍ୟଟକଙ୍କଠାରୁ ପାର୍କିଂ ଫି ଆଦାୟ କରି ଭିତରକୁ ଛଡାଯାଉଛି।
ଭୁବନେଶ୍ୱରରୁ ଆସିଥିବା କେତେଜଣ ପର୍ଯ୍ୟଟକ କହିଛନ୍ତି ଯେ, ସେମାନଙ୍କୁ ଏହି ପାର୍କ ଏବଂ ଜଳ ପ୍ରପାତ ଭିତରକୁ ଯିବାକୁ ଅନୁମତି ଦିଆଯିବା ସହ ଶୀଘ୍ର ବାହାରି ଯିବାକୁ କୁହାଯାଉଛି। ଚଞ୍ଚକତା କରି ଫି’ ଆଦାୟ କରିବା ସହ ପର୍ଯ୍ୟଟକଙ୍କୁ କଫି ବଗିଚା ଏବଂ ଜଳପ୍ରପାତ ଭିତରୁ ବାହାରିବା କୁହାଯିବା ନେଇ ପର୍ଯ୍ୟଟକଙ୍କ ଭିତରେ ଅସନ୍ତୋଷ ଦେଖାଯାଇଛି।
ପ୍ରଶାସନ ନିର୍ଦ୍ଦେଶକୁ କାହିଁକି ଅବମାନନା କରାଯାଇଛି ବୋଲି ବିଭାଗର ପ୍ରକଳ୍ପ ନିର୍ଦ୍ଦେଶକ ଶୈଳେନ୍ଦ୍ର ନାୟକଙ୍କୁ ପଚାରିବାରୁ, ସେ କହିଛନ୍ତି ଯେ, ଜିଲାପାଳଙ୍କ ନିର୍ଦ୍ଦେଶ ସମ୍ପର୍କରେ ସେ ରବିବାର ଶୁଣିଲେ। ସୋମବାର ଦାରିଙ୍ଗବାଡ଼ି ଗସ୍ତ କରି କଫିବଗିଚା ବନ୍ଦ ରଖିବାକୁ ପରାମର୍ଶ ଦେଇଛନ୍ତି। ମଙ୍ଗଳବାରଠାରୁ ଏହା ବନ୍ଦ ରଖାଯିବ ବୋଲି ସେ କହିଛନ୍ତି। ମିଡ଼ିୟୁବାନ୍ଦା ଜଳପ୍ରପାତକୁ ପର୍ଯ୍ୟଟକଙ୍କ ପ୍ରବେଶ ବନ୍ଦ ପାଇଁ କୁହାଯାଇଥିଲା, କାହିଁକି ଖୋଲାଯାଇଛି ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବାଲିଗୁଡ଼ା ଡିଏଫ୍ଓ ବିଶ୍ୱନାଥନ୍ ନିଲନଭର କହିଛନ୍ତି।
