ଭୁବନେଶ୍ୱର,୧୭।୧୧(ବ୍ୟୁରୋ): ରାଜ୍ୟ ସରକାରଙ୍କ ଦେବୋତ୍ତର ବିଭାଗ ଅଧୀନରୁ ପୁରୀସ୍ଥିତ ଗୋବର୍ଦ୍ଧନ ପୀଠ ମୁକ୍ତ ହୋଇଛି। ଗୋବର୍ଦ୍ଧନ ମଠର ଧାର୍ମିକ ଅଗ୍ରଗଣ୍ୟତା ଓ ଗୁରୁତ୍ୱ ଦୃଷ୍ଟିରୁ ଏହାକୁ ହିନ୍ଦୁ ଦେବୋତ୍ତର ଅଧିନିୟମ-୧୯୫୧ର ପରିସରରୁ ବାଦ୍ ପାଇଁ ବିଭିନ୍ନ ମହଲରୁ ଅନୁରୋଧ କରାଯାଇଥିଲା। ଏହି ଅନୁରୋଧକୁ ବିଚାର କରି ରାଜ୍ୟ ସରକାର ପ୍ରଥମେ କ୍ୟାବିନେଟ୍ରେ ପ୍ରସ୍ତାବ ଆଣିବା ସହ ମଞ୍ଜୁର କରାଇଥିଲେ। ଏହା ପରେ ବିଧାନସଭାରେ ଆଇନ ଅନୁସାରେ ଆବଶ୍ୟକ ସଂଶୋଧନ ଆଣି ଶନିବାର ଗୃହୀତ କରାଇଛନ୍ତି। ଆଇନ ମନ୍ତ୍ରୀ ପ୍ରତାପ ଜେନାଙ୍କ ଦ୍ୱାରା ଶୁକ୍ରବାର ଓଡ଼ିଶା ହିନ୍ଦୁ ଦେବୋତ୍ତର(ସଂଶୋଧନ) ବିଧେୟକ-୨୦୧୯ ଆଗତ କରାଯାଇଥିଲା। ଏହି ବିଲ୍ ଆଗତ ହେବାର ଗୋଟିଏ ଦିନ ପରେ ଗୃହର ମଞ୍ଜୁରୀ ମିଳିଛି। ଏବେ ଏହି ସଂଶୋଧନକୁ ରାଜ୍ୟପାଳଙ୍କ ଅନୁମୋଦନ ପାଇଁ ପଠାଯିବ। ସଂଶୋଧନ ସମ୍ପର୍କିତ ଆଲୋଚନା ସମୟରେ ଶାସକ ବିଜେଡି ଏବଂ କଂଗ୍ରେସ ଦଳ ବିଧାୟକମାନେ ଉପସ୍ଥିତ ରହିଥିଲେ। ଅପରପକ୍ଷରେ ଭାଜପା ବିଧାୟକମାନେ ଅନୁପସ୍ଥିତ ରହିଥିଲେ। ଏହି ସଂଶୋଧନକୁ ଅଣାଯିବା ଏବଂ ଗୃହୀତ କରିବା ପ୍ରକ୍ରିୟାର କେତେକ ଆଇନଗତ ଦିଗ ଉପରେ କଂଗ୍ରେସ ନେତା ନରସିଂହ ମିଶ୍ର ପ୍ରଶ୍ନ ଉଠାଇଥିଲେ।
ଉଲ୍ଲେଖଯୋଗ୍ୟ, ଅନ୍ୟ ୩ ମଠ ଯଥା- ଯୋଷୀ ମଠ, ଦ୍ୱାରକା ମଠ, ଶ୍ରୀଙ୍ଗେରୀ ମଠକୁ ସମ୍ପୃକ୍ତ ରାଜ୍ୟର ଦେବୋତ୍ତର ଅଧିନିୟମ ପରିସରରୁ ବାଦ୍ ଦିଆଯାଇ ସେଗୁଡିକର ପରିଚାଳନା ଭାର ସେହି ମଠର ଶଙ୍କରାଚାର୍ଯ୍ୟଙ୍କ ଉପରେ ନ୍ୟସ୍ତ କରାଯାଇଛି। ଏହି ସଂଶୋଧନ ହେବା ପୂର୍ବରୁ ଗୋବର୍ଦ୍ଧନ ମଠ ଅଧିନିୟମର ଧାରା ୩ର ଖଣ୍ଡ(୧୩) ଅନୁସାରେ ଧାର୍ମିକ ଅନୁଷ୍ଠାନ ଭାବେ ପରିଗଣିତ ହେଉଥିଲା। ଏହି ସଂଶୋଧନ ସମ୍ପର୍କରେ ଗଣମାଧ୍ୟମକୁ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଥିଲେ ଯେ, ଅଣାଯାଇଥିବା ବିଧେୟକ ଏକ ଅର୍ଥ ବିଲ୍। ତେଣୁ ଆଲୋଚନା ପାଇଁ ରାଜ୍ୟପାଳଙ୍କ ଅନୁମୋଦନ ଦରକାର। ନଚେତ ଆଲୋଚନା ହୋଇପାରିବ ନାହିଁ। ମଠଗୁଡିକ ଆଇନ ଅନୁଯାୟୀ ଆକାଉଣ୍ଟର ବିବରଣୀ ଦେବା ଆବଶ୍ୟକ। ସେହିପରି ମଠ ନିଜ ଆୟର ୫ ପ୍ରତିଶତ ସରକାରଙ୍କୁ ଦେବା କଥା। ହେଲେ ତାହା କେହି ଦେଉନାହାନ୍ତି। ଶଙ୍କରାଚାର୍ଯ୍ୟଙ୍କ କାର୍ଯ୍ୟ ଆଫିଡେଭିଟ୍ ଅନୁଯାୟୀ ହେଉନାହିଁ। ସରକାର ଉଚିତ ପଦକ୍ଷେପ ନେଉନାହାନ୍ତି। ଆଇନ ଥାଇ ଏବେ ଦେଉ ନାହାନ୍ତି, ଆଇନ ନ ରହିଲେ ଭକ୍ତ ଯାହା ଭାବିବେ ବୋଲି ନରସିଂହ କହିଛନ୍ତି। ଅପରପକ୍ଷରେ ନରସିଂହଙ୍କ ଏହି ବୟାନ ଉପରେ ଆଇନ ମନ୍ତ୍ରୀ ପ୍ରତାପ ଜେନା ପ୍ରତିକ୍ରିୟା ରଖିଛନ୍ତି। ପ୍ରତାପ କହିଛନ୍ତି ଯେ, ଏହା କୌଣସି ଅର୍ଥ ବିଲ୍ ନୁହେଁ। ତେଣୁ ରାଜ୍ୟପାଳଙ୍କ ଅନୁମୋଦନ ଆବଶ୍ୟକ ନାହିଁ। ଗୋବର୍ଦ୍ଧନ ମଠ ସରକାରଙ୍କ ନୀତିନିୟମରେ ପରିଚାଳିତ ହେବ । ହେଲେ ପୂର୍ବ ଭଳି ଦେବୋତ୍ତର ବିଭାଗକୁ ଆଉ ହିସାବ ଦେବ ନାହିଁ। ସରକାରୀ ନୀତିନିୟମ ଲାଗୁ ହେବ, ମାତ୍ର ପୀଠାଧୀଶ ଶଙ୍କରାଚାର୍ଯ୍ୟ ମଠ ପରିଚାଳନା କରିବେ। ସେହିପରି ଗୃହରେ ହୋଇଥିବା ଆଲୋଚନାରେ ନରସିଂହଙ୍କ ସମେତ ବିଜେଡି ସଭ୍ୟ ଅମର ପ୍ରସାଦ ଶତପଥୀ, ପ୍ରଫୁଲ୍ଲ ସାମଲ. କଂଗ୍ରେସ ନେତା ତାରାପ୍ରସାଦ ବାହିନୀପତି ପ୍ରମୁଖ ଅଂଶ ଗ୍ରହଣ କରିଥିଲେ।
