ଭୁବନେଶ୍ୱର, ୫।୧(ବ୍ୟୁରୋ)- ରେଳ ମନ୍ତ୍ରଣାଳୟ ପକ୍ଷରୁ ରାଜ୍ୟରେ ୩୬ ପ୍ରକଳ୍ପ ଅଧୀନରେ ୪୫୬୭ କିଲୋମିଟର ରେଳପଥ କାର୍ଯ୍ୟ ଜାରି ରହିଛି। ଏହି ସମସ୍ତ ପ୍ରକଳ୍ପର ମୂଲ୍ୟ ୪୯,୯୮୪ କୋଟି ଟଙ୍କା। ଏହି ପ୍ରକଳ୍ପଗୁଡିକ ମଧ୍ୟରେ କେତେକ ସମ୍ପୂର୍ଣ୍ଣଭାବେ ଓଡ଼ିଶାର ହୋଇଥିବାବେଳେ ଅନ୍ୟ କେତେକ ପ୍ରକଳ୍ପ ଆଂଶିକ ଓଡ଼ିଶାରେ ପଡୁଛି। ଏହା ମଧ୍ୟରେ ରହିଛି ୧୦ଟି ନୂଆ ରେଳଲାଇନ, ଯାହାର ଦୈର୍ଘ୍ୟ ୧,୨୬୯ କିଲୋମିଟର। ଏହି ପ୍ରକଳ୍ପଗୁଡିକ ପାଇଁ ୧୬,୫୯୮ କୋଟି ଟଙ୍କାର ବ୍ୟୟବରାଦ ରହିଛି। ୨୦୧୯ ମାର୍ଚ୍ଚ ସୁଦ୍ଧା ଏହି ପ୍ରକଳ୍ପଗୁଡ଼ିକ ମଧ୍ୟରୁ ୮୦ କିଲୋମିଟର ଦୈର୍ଘ୍ୟ ରେଳପଥର କାର୍ଯ୍ୟ ସରିଛି। ଏଥିସହିତ ଉପରୋକ୍ତ ସମୟସୀମା ମଧ୍ୟରେ ୪୨୬୦ କୋଟି ଟଙ୍କା ଖର୍ଚ୍ଚ ହୋଇଥିବା ଜଣାପଡିଛି। ନିକଟରେ ସମାପ୍ତ ହୋଇଥିବା ଶୀତ ଅଧିବେଶନରେ ରେଳ ମନ୍ତ୍ରଣାଳୟ ପକ୍ଷରୁ ଏହି ତଥ୍ୟ ପ୍ରଦାନ କରାଯାଇଛି। ପାର୍ଲାମେଣ୍ଟର ରାଜ୍ୟ ସଭାରେ ବିଜେଡି ସଦସ୍ୟ ସସ୍ମିତ ପାତ୍ରଙ୍କ ଦ୍ୱାରା ଗତ ଡିସେମ୍ବର ୧୩ରେ ତାରକା ଚିହ୍ନିତ ପ୍ରଶ୍ନ ସଂଖ୍ୟା ୨୮୩ର ଉତ୍ତରରେ ଏହି ତଥ୍ୟ ଉଲ୍ଲେଖ କରାଯାଇଛି।
ରେଳ ମନ୍ତ୍ରଣାଳୟର ପିଙ୍କ୍ ବୁକ୍ରେ କେଉଁ ପ୍ରକଳ୍ପ ଓଡ଼ିଶାରେ କାର୍ଯ୍ୟକାରୀ ହେବା ପାଇଁ ସ୍ଥାନିତ କରାଯାଇଛି, ଏଯାବତ୍ କେଉଁଟି କାର୍ଯ୍ୟକାରୀ ହୋଇନାହିଁ, କେଉଁ ପ୍ରକଳ୍ପକୁ ପିଙ୍କ୍ ବୁକ୍ରୁ ବାଦ୍ ଦିଆଯାଇଛି, ସେ ସମ୍ପର୍କରେ ପ୍ରଶ୍ନ କରାଯାଇଥିଲା। ଏହାର ଉତ୍ତରରେ ମନ୍ତ୍ରୀ ପୀୟୂଷ ଗୋୟଲ ଉପରୋକ୍ତ ତଥ୍ୟ ଏବଂ ଆନୁଷଙ୍ଗିକ ପରିସଂଖ୍ୟାନ ପ୍ରଦାନ କରିଛନ୍ତି। କେନ୍ଦ୍ର ମନ୍ତ୍ରୀଙ୍କ ପ୍ରଦତ୍ତ ତଥ୍ୟରୁ ଜଣାପଡିଛି ଯେ, ୧ ଗଜ କନଭରସନ(ଜିସି) ପ୍ରକଳ୍ପ ଯାହା ୧୪୦ କିଲୋମିଟର ଦୈର୍ଘ୍ୟ ବିଶିଷ୍ଟ। ଏଥିପାଇଁ ୧୩୪୯ କୋଟି ଟଙ୍କାର ବ୍ୟୟବରାଦ ରହିଥିବା ବେଳେ ତନ୍ମଧ୍ୟରୁ ୯୦ କିଲୋମିଟର କାର୍ଯ୍ୟ ହେବା ସହ ୧୯୧ କୋଟି ଟଙ୍କା ଖର୍ଚ୍ଚ ହୋଇଥିବା ଜଣାପଡିଛି। ରାଜ୍ୟରେ ପ୍ରାୟ ୨୫ଟି ରେଳଲାଇନ ଦୋହରୀକରଣ ହେବାକୁ ପ୍ରକଳ୍ପ ରହିଛି। ଏହି ପ୍ରକଳ୍ପର ମୋଟ ଦୈର୍ଘ୍ୟ ୩୧୫୯ କିଲୋମିଟର ରହିଛି। ଏଥିପାଇଁ ମନ୍ତ୍ରଣାଳୟ ପକ୍ଷରୁ ୩୨,୦୩୭ କୋଟି ଟଙ୍କାର ବ୍ୟୟବରାଦ ରହିଛି। ତନ୍ମଧ୍ୟରୁ ଗତବର୍ଷ ମାର୍ଚ୍ଚ ସୁଦ୍ଧା ୪୯୪ କିଲୋମିଟର ଦୋହରୀକରଣ କାର୍ଯ୍ୟ ସମ୍ପୂର୍ଣ୍ଣ ହେବା ସହ ୮୨୪୬ କୋଟି ଟଙ୍କାର ଅର୍ଥ ଖର୍ଚ୍ଚ କରାଯାଇଛି। ପିଙ୍କ୍ ବୁକ୍ରୁ କୌଣସି ପ୍ରକଳ୍ପକୁ ବାଦ୍ ଦିଆଯାଇ ନ ଥିବା ମନ୍ତ୍ରଣାଳୟ ପକ୍ଷରୁ ଉଲ୍ଲେଖ କରାଯାଇଛି। ବିଳମ୍ବିତ ରେଳ ପ୍ରକଳ୍ପ ନେଇ ଜମି ଅଧିଗ୍ରହଣ, ପରିବେଶ ଏବଂ ଜଙ୍ଗଲ ମଞ୍ଜୁରୀ ଓ ଅନ୍ୟାନ୍ୟ କାରଣକୁ ଦାୟୀ କରାଯାଇଛି। ଏଥିପାଇଁ ଆବଶ୍ୟକ ପଦକ୍ଷେପ ନେବାକୁ ରାଜ୍ୟ ସରକାରଙ୍କୁ ରେଳ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସେହିଭଳି ରେଳପଥ ସମ୍ପର୍କିତ ଖର୍ଚ୍ଚର ରାଜ୍ୟ ଅଂଶ ବାବଦକୁ ଓଡ଼ିଶା ୧୪୪ କୋଟି ଟଙ୍କା ଦାଖଲ କରିବ ବୋଲି ଜଣାପଡିଛି।
ଉଲ୍ଲେଖଯୋଗ୍ୟ, ପୂର୍ବାପେକ୍ଷା ଓଡ଼ିଶାକୁ ରେଳପଥ ଅନୁଦାନ ବୃଦ୍ଧି ନେଇ ମଧ୍ୟ ଉଲ୍ଲେଖ କରାଯାଇଛି। ମନ୍ତ୍ରୀଙ୍କ ଉତ୍ତର ଅନୁଯାୟୀ ୨୦୧୪-୧୫ରୁ ୨୦୧୮-୧୯ ଆର୍ଥିକ ବର୍ଷରେ ୪୧୨୬ କୋଟି ଟଙ୍କାର ଅନୁଦାନ ମିଳିଛି। ଅପରପକ୍ଷରେ ୨୦୦୯-୧୦ରୁ ୨୦୧୩-୧୪ରେ ୮୩୮ କୋଟି ଟଙ୍କାର ଅନୁଦାନ ମିଳିଛି। ୨୦୧୪-୧୯ ମଧ୍ୟରେ ମିଳିଥିବା ଅନୁଦାନର ପରିମାଣ ୨୦୦୯-୧୪ ମଧ୍ୟରେ ମିଳିଥିବା ଅନୁଦାନର ପରିମାଣଠାରୁ ୪୯୨%କୁ ବୃଦ୍ଧି ପାଇଥିବା କୁହାଯାଇଛି।
