ଏଫଆଇଏଚ୍‌ ହକି ଅଲିମ୍ପିକ୍‌ କ୍ୱାଲିଫାୟର୍ସ: ଅନ୍‌ଲାଇନ୍‌ ଟିକେଟ ବିକ୍ରି ଆରମ୍ଭ
8:00 amSeptember 19, 2019 / 21

ଭୁବନେଶ୍ୱର, ୧୯।୯(କ୍ରୀଡ଼ା ପ୍ରତିନିଧି)- ସ୍ଥାନୀୟ କଳିଙ୍ଗ ଷ୍ଟାଡିୟମରେ ନଭେମ୍ବର ୧ ଓ ୨ ତାରିଖରେ ଏଫଆଇଏଚ୍‌ ହକି ଅଲିମ୍ପିକ୍‌ କ୍ୱାଲିଫାୟର୍ସ ଅନୁଷ୍ଠିତ ହେବ। ଏହାର ମହିଳା ବିଭାଗରେ ଭାରତ ଓ ଆମେରିକା ଏବଂ ପୁରୁଷରେ ଭାରତ ଓ ରୁଷିଆ ମଧ୍ୟରେ ମୁକାବିଲା ହେବ। ଏହି ୨ ମ୍ୟାଚରେ ଭଲ ପ୍ରଦର୍ଶନ କରି ଭାରତୀୟ ମହିଳା ଓ ପୁରୁଷ ଦଳ ୨୦୨୦ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ ଲକ୍ଷ୍ୟରେ ରହିଛି। ଏହି ସମ୍ମାନଜନକ ପ୍ରତିଯୋଗିତା ପାଇଁ ଅନ୍ତର୍ଜାତୀୟ ହକି ଫେଡେରେଶନ ଓ ହକି ଇଣ୍ଡିଆ ପକ୍ଷରୁ ବୁଧବାରଠାରୁ ଅନ୍‌ଲାଇନ୍‌ ଟିକେଟ ବିକ୍ରି ଆରମ୍ଭ ହୋଇଛି। ଟିକେଟ https://in.ticketgenie.in/Tickets/FIH-Hockey-Olympic-Qualifiers-Odisha ରେ ଉପଲବ୍ଧ। ଅଲିମ୍ପିକ୍‌ କ୍ୱାଲିଫାୟର୍ସ ପାଇଁ ସାଉଥ୍‌ ଓ ନର୍ଥ ଷ୍ଟାଣ୍ଡର ମୂଲ୍ୟ ୨୦୦ଟଙ୍କା ଲେଖାଏ ଏବଂ ଇଷ୍ଟ ଷ୍ଟାଣ୍ଡର ମୂଲ୍ୟ ୩୦୦ ଟଙ୍କା ଧାର୍ଯ୍ୟ କରାଯାଇଛି। ଓ୍ବେଷ୍ଟଷ୍ଟାଣ୍ଡ ଗ୍ୟାଲେରୀର ମୂଲ୍ୟ ବର୍ତ୍ତମାନ ଉପଲବ୍ଧ ନାହିଁ ବୋଲି ଦର୍ଶା ଯାଉଛି।
ଭାରତୀୟ ପୁରୁଷ ଦଳ ସମ୍ପ୍ରତି ବିଶ୍ୱ ର଼୍ୟାଙ୍କିଙ୍ଗ୍‌ର ୫ମ ସ୍ଥାନରେ ଥିବାବେଳେ ରୁଷିଆ ୨୨ତମ ସ୍ଥାନରେ ରହିଛି। ସେହିପରି ଭାରତୀୟ ମହିଳା ଦଳ ୯ମ ସ୍ଥାନରେ ଥିବାସ୍ଥଳେ ପ୍ରତିଦ୍ୱନ୍ଦ୍ୱୀ ଆମେରିକା ୧୩ତମ ସ୍ଥାନରେ ଅଛି। ୨ଟି ମ୍ୟାଚର ଗୋଲ ସ୍କୋର ଭିତ୍ତିରେ ବିଜେତା ନିର୍ଣ୍ଣିତ ହେବ ଏବଂ ସେହି ଦଳ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିବ। ଦୁଇ ଦିନଯାକ ମ୍ୟାଚ ସମାନ ସମୟରେ ଅନୁଷ୍ଠିତ ହେବ। ମହିଳା ବିଭାଗ ମ୍ୟାଚ ସନ୍ଧ୍ୟା ୬ଟା ଏବଂ ପୁରୁଷ ବିଭାଗ ମ୍ୟାଚ ରାତି ୮ଟାରେ ଅନୁଷ୍ଠିତ ହେବ। ଅନ୍‌ଲାଇନ୍‌ ଟିକେଟ ରିଡମ୍ପଶନ ତାରିଖ ପରେ ଘୋଷଣା କରାଯିବ ବୋଲି ହକି ଇଣ୍ଡିଆ ପକ୍ଷରୁ ପ୍ରକାଶ କରାଯାଇଛି।
ଅନ୍‌ଲାଇନ୍‌ ଟିକେଟ ଶୁଭାରମ୍ଭ ଅବସରରେ ହକି ଇଣ୍ଡିଆ ସଭାପତି ମହମ୍ମଦ ମୁସ୍ତାକ କହିଲେ ଯେ, ”ଏଫଆଇଏଚ୍‌ ହକି ଅଲିମ୍ପିକ୍‌ କ୍ୱାଲିଫାୟର୍ସ ଆମ ସିନିୟର ମହିଳା ଓ ପୁରୁଷ ଦଳପାଇଁ ଏକ ଗୁରୁତ୍ୱପୂର୍ଣ୍ଣ ଟୁର୍ନାମେଣ୍ଟ। ତେଣୁ ଦେଶର କ୍ରୀଡ଼ାପ୍ରେମୀମାନେ ଅନ୍‌ଲାଇନ୍‌ ଟିକେଟ କ୍ରୟ କରି ଭୁବନେଶ୍ୱରସ୍ଥିତ କଳିଙ୍ଗ ଷ୍ଟାଡିୟମରେ ଉପସ୍ଥିତ ରହିବା ସହ ଆମ ଦଳକୁ ଉତ୍ସାହିତ କରିବେ ବୋଲି ମୁଁ ଆଶା କରୁଛି। ଭାରତୀୟ ଦଳକୁ ସ୍ଥାନୀୟ ଦର୍ଶକଙ୍କ ସମର୍ଥନ ଯେ ମିଳିବ ଏଥିରେ ଦ୍ୱିମତ ନାହିଁ। ମାତ୍ର ଅନ୍‌ଲାଇନ୍‌ରେ ଟିକେଟ କ୍ରୟ କରି ଦେଶର ବିଭିନ୍ନ ଭାଗରେ ଥିବା କ୍ରୀଡ଼ାପ୍ରେମୀମାନେ ମଧ୍ୟ ଏହି ଗୁରୁତ୍ୱପୂର୍ଣ୍ଣ ମ୍ୟାଚ ସମୟରେ କଳିଙ୍ଗ ଷ୍ଟାଡିୟମରେ ଉପଲବ୍ଧ ହେବାନେଇ ଆଶା ରହିଛି“।

ଟିକେଟ ମୂଲ୍ୟ
ନର୍ଥ ଷ୍ଟାଣ୍ଡ: ୨୦୦ ଟଙ୍କା
ସାଉଥ ଷ୍ଟାଣ୍ଡ: ୨୦୦ ଟଙ୍କା
ଇଷ୍ଟ ଷ୍ଟାଣ୍ଡ: ୩୦୦ ଟଙ୍କା

କାର୍ଯ୍ୟସୂଚୀ
ନଭେମ୍ବର ୧(ମହିଳା ବିଭାଗ) ଭାରତ ବନାମ ଆମେରିକା, ସମୟ: ସନ୍ଧ୍ୟା ୬ଟା
ନଭେମ୍ବର ୧(ପୁରୁଷ ବିଭାଗ) ଭାରତ ବନାମ ରୁଷିଆ, ସମୟ: ରାତି ୮ଟା
ନଭେମ୍ବର ୨(ମହିଳା ବିଭାଗ) ଭାରତ ବନାମ ଆମେରିକା, ସମୟ: ସନ୍ଧ୍ୟା ୬ଟା
ନଭେମ୍ବର ୨(ପୁରୁଷ ବିଭାଗ) ଭାରତ ବନାମ ରୁଷିଆ, ସମୟ: ରାତି ୮ଟା