ଝାଡ଼ଖଣ୍ଡର ଜଣେ ଆଇଏଏସ୍ ଅଫିସରଙ୍କ ଉଦ୍ୟମରେ ଖୁଣ୍ଟି ଜିଲାରେ ଓ୍ବାର୍ଟର ହାର୍ଭେଷ୍ଟିଂ ମଡେଲ ଦ୍ୱାରା ୮,୦୦୦ ଚାଷୀ ଉପକୃତ ହୋଇପାରିଛନ୍ତିି। ଏହି ଜିଲାରେ ପ୍ରବାହିତ ଛୋଟ ବଡ ୧୦ଟି ନଦୀ ପାଣିକୁ ଘେରି ବନ୍ଧ ମାଧ୍ୟମରେ ଅଟକାଇବାକୁ ସକ୍ଷମ ହୋଇଛନ୍ତି ସେଠାକାର ପୂର୍ବତନ ଡେପୁଟି କମିଶନର ସୁରଜ କୁମାର। ତାଙ୍କ ଟିମ୍ ସଓ୍ବୋ ଓ୍ବେଲଫେୟାର ସୋସାଇଟି ନାମକ ଏକ ଏନ୍ଜିଓ ସାହାଯ୍ୟରେ ୨୦୧୯ରେ ଘେରି ବନ୍ଧ ନିର୍ମାଣ କରିବା ଆରମ୍ଭ କରିଥିଲେ। ସେ ସିମେଣ୍ଟ ବସ୍ତାରେ ବାଲି ଓ କାଦୁଅ ଭର୍ତ୍ତି କରି ୨୫୦ଟି ଘେରି ବନ୍ଧ ନିର୍ମାଣ କରିସାରିଛନ୍ତି। ଗୋଟିଏ ଛୋଟ ଘେରି ବନ୍ଧରେ ୨୦ ଜଣ କୃଷକ ଓ ଗୋଟିଏ ବଡ଼ ଘେରି ବନ୍ଧରେ ୪୦ରୁ ୫୦ ଜଣ କୃଷକ ଉପକୃତ ହେଉଛନ୍ତି। ସେ ମଧ୍ୟ ଘେରି ବନ୍ଧରେ ସୋଲାର ପମ୍ପ୍ର ବ୍ୟବସ୍ଥା କରିଛନ୍ତି ଯାହାଦ୍ୱାରା ୨.୫କି.ମି .ଯାଏ ପାଣି ମଡ଼ାଯାଇପାରୁଛି। ଗୋଟିଏ ବନ୍ଧ ନିର୍ମାଣ କରିବାରେ ମାତ୍ର ୨,୦୦୦ ଟଙ୍କା ଖର୍ଚ୍ଚ ହେଉଛି। ଚଳିତ ବର୍ଷ ସୁଦ୍ଧା ଜିଲାର ଆଉ ୩୦ରୁ ୩୫ଟି ପଞ୍ଚାୟତରେ ଏଭଳି ବନ୍ଧ ନିର୍ମାଣ କରାଯିବାର ଯୋଜନା କରାଯାଇଛି। ତେବେ ସୁରଜଙ୍କ ବଦଳି ହେବା ପରେ ତାଙ୍କ କାର୍ଯ୍ୟକୁ ଏବକାର ଡେପୁଟି କମିଶନର ଶଶୀ ରଞ୍ଜନ ଆଗେଇ ନେଇଛନ୍ତି।
