ମାୟାମି, ୨୪ା୫ (ଏଏଫ୍ପି)-ସାଉଥ୍ କାରୋଲିନାର ଚାର୍ଲଷ୍ଟନଠାରେ ଜୁନ୍ରେ ଏକ ଆମନ୍ତ୍ରଣୀୟ ମହିଳା ଟେନିସ୍ ଟୁର୍ନାମେଣ୍ଟ ହେବ। ଏଥିରେ ଗ୍ରାଣ୍ଡସ୍ଲାମ ବିଜୟିନୀ ବାଏଙ୍କା ଆଣ୍ଡ୍ରେସ୍କୁ ଓ ସୋଫିଆ କେନିନ୍ ଆକର୍ଷଣ କେନ୍ଦ୍ର ବିନ୍ଦୁ ହେବେ। ଟେନିସ ଚ୍ୟାନେଲ ଇଭେଣ୍ଟର ସିଧାପ୍ରସାରଣ କରିବ। ଏଥିରେ ମୋଡ ୧୬ଜଣ ଡବ୍ଲ୍ୟୁଟିଏ ଖେଳାଳି ଭାଗ ନେବେ। ସେମାନଙ୍କୁ ଦୁଇଟି ଦଳରେ ବିଭକ୍ତ କରାଯିବ। ଇଭେଣ୍ଟରେ ମୋଟ ୧୬ ସିଙ୍ଗଲ୍ସ ମ୍ୟାଚ ଓ ୮ଟି ଡବଲ୍ସ ଖେଳାଯିବ। ଟୁର୍ନାମେଣ୍ଟ ଜୁନ୍ ୨୩ରୁ ଆରମ୍ଭ ହେବ। କରୋନାଭାଇରସ୍ ମହାମାରୀ ଯୋଗୁ ଫ୍ରେଞ୍ଚ୍ ଓପନ ସସ୍ପେଣ୍ଡ ହୋଇଛି। ଓ୍ବିମ୍ବେଲଡନ ବାତିଲ ହୋଇଛି। ଏଟିପି ଓ ଡବଲ୍ୟୁଟିଏ ଟୁର୍ ଶଟ୍ ଡାଉନ୍ ପରେ ଏହା ସବୁଠାରୁ ବଡ଼ ଟେନିସ ଇଭେଣ୍ଟ ବୋଲି କୁହାଯାଉଛି। କାନାଡାର ଆଣ୍ଡ୍ରେସ୍କୁ ହେଉଛନ୍ତି ୟୁଏସ୍ ଓପନ ଚାମ୍ପିୟନ। ଅନ୍ୟପକ୍ଷରେ କେନିନ୍ ହେଉଛନ୍ତି ଅଷ୍ଟ୍ରେଲିଆନ ଓପନ ବିଜୟିନୀ। ଆମେରିକାର ମାଡିସନ କିଜ୍ ଓ ବେଥାନି ମ୍ୟାଟେକ୍-ସ୍ୟାଣ୍ଡ୍ସ ଦୁଇ ଦଳ ଅଧିନାୟିକା ରହିବେ। ବିଶ୍ୱର ପୂର୍ବତନ ନମ୍ବର ଓ୍ବାନ ଭିକ୍ଟୋରିଆ ଆଜାରେଙ୍କା, ୨୦୧୭ ୟୁଏସ୍ ଓପନ୍ ଚାମ୍ପିୟନ ସ୍ଲୋଏନ୍ ଷ୍ଟିଫେନ୍ସ ଏବଂ ୨୦୧୬ ଅଲିମ୍ପିକ ସ୍ବର୍ଣ୍ଣ ବିଜୟିନୀ ମୋନିକା ପୁଇଗ୍ ମଧ୍ୟ ଏହି ପ୍ରତିଯୋଗିତାରେ ଅବତୀର୍ଣ୍ଣ ହେବେ। ଚାର୍ଲଷ୍ଟନ ବହୁଦିନ ହେଲା ଏକ ଡବ୍ଲ୍ୟୁଟିଏ ଇଭେଣ୍ଟ ଆୟୋଜନ କରିଆସୁଛି। ଚଳିତ ବର୍ଷ ଏହି ଇଭେଣ୍ଟ ଏପ୍ରିଲ ୬ରୁ ୧୨ ପର୍ଯ୍ୟନ୍ତ ଖେଳାଯାଇଥାନ୍ତା। ମାତ୍ର କୋଭିଡ୍-୧୯ ଯୋଗୁ ଏହାକୁ ବାତିଲ କରିବାକୁ ପଡ଼ିଥିଲା।
