ଐତିହାସିକ କଟକ ବାଲିଯାତ୍ରାର ମଙ୍ଗଳବାର ଥିଲା ଅଷ୍ଟମ ଦିନ। ବିଭିନ୍ନ ସ୍ଥାନରୁ ଆସିଥିବା ଲୋକମାନେ ବାଲିଯାତ୍ରାରେ ବିଭିନ୍ନ ଷ୍ଟଲ ବୁଲିବା ସହ ଚାଟ୍, ଗୁପ୍ଚୁପ୍, ଠୁଙ୍କାପୁରୀ ଓ ଫାଷ୍ଟଫୁଡ ଖାଦ୍ୟର ମଜା ନେଇଥିଲେ। ତେବେ ପୂର୍ବଦିନ ଅପେକ୍ଷା ମଙ୍ଗଳବାର ଭିଡ କମ୍ ଥିବା ଦେଖିବାକୁ ମିଳିଥିଲା। ପ୍ରଥମାଷ୍ଟମୀ ନିମନ୍ତେ ପୂଜା ସାମଗ୍ରୀ କିଣିବା ପାଇଁ ଲୋକେ ବ୍ୟସ୍ତଥିବାରୁ ଯାତ୍ରାକୁ ଆସି ନ ଥିବା କୁହାଯାଉଛି। ଅନ୍ୟପକ୍ଷରେ ବୁଧବାର ସରିବ ବାଲିଯାତ୍ରା। ଲୋକଙ୍କୁ ଅପେକ୍ଷା କରିବା ପଡିବ ଆଉ ଗୋଟିଏ ବର୍ଷ। ଶେଷ ଦିନରେ ଅଧିକ ସଂଖ୍ୟକ ଲୋକଙ୍କ ସମାଗମ ହେବ ବୋଲି ଆଶା କରାଯାଉଛି।
ଷ୍ଟଲରେ ଶିଙ୍ଗ ତିଆରି ସାମଗ୍ରୀ
ବାଲିଯାତ୍ରାର କଟକ ଜିଲା ଶିଳ୍ପ କେନ୍ଦ୍ରଠାରେ ଥିବା ଷ୍ଟଲ୍ରେ ଶିଙ୍ଗରେ ତିଆରି ବିଭିନ୍ନ ଜିନିଷ ଦେଖିବାକୁ ମିଳିଥିଲା। ଯେପରି କି ଶିଙ୍ଗ ପାନିଆ, ପକ୍ଷୀ, ଶିଙ୍ଗବାଡ଼ି, ଚାବି ଲକେଟ୍ ଭଳି ଅନ୍ୟାନ୍ୟ ଜିନିଷ। ଏହାର ମୂଲ୍ୟ ୫୦ଟଙ୍କାରୁ ଆରମ୍ଭ କରି ୧୫୦୦ ଟଙ୍କା ପର୍ଯ୍ୟନ୍ତ ରହିଛି। ଚଳିତବର୍ଷ ଜିଲା ପ୍ରଶାସନର ଖାମଖିଆଲ ମନୋବୃତ୍ତି ଯୋଗୁ ଷ୍ଟଲ୍ଟି ପଡ଼ିଆର ଦୂରରେ ରହିଛି। ଫଳରେ ଲୋକେ ଆସୁନାହାନ୍ତି। ଗତବର୍ଷଠାରୁ ଚଳିତବର୍ଷ କମ୍ ବ୍ୟବସାୟ ହୋଇଛି। ଗତବର୍ଷ ବ୍ୟବସାୟ ୧ ଲକ୍ଷ ହୋଇଥିବା ବେଳେ ଚଳିତବର୍ଷ ୪୦ହଜାର ଟଙ୍କା ପର୍ଯ୍ୟନ୍ତ ବ୍ୟବସାୟ ହୋଇପାରିଛି ବୋଲି ବ୍ୟବସାୟୀ ଅଶୋକ ବେହେରା କହିଛନ୍ତି।
ଚାଷ ସମ୍ପର୍କରେ ଲୋକଙ୍କୁ ସଚେତନ
ବାଲିଯାତ୍ରାର କୃଷି ବିଭାଗର ଷ୍ଟଲ୍ରେ ବିଭିନ୍ନ ଚାଷ ସମ୍ପର୍କରେ ଲୋକଙ୍କୁ ସଚେତନ କରାଯାଇଥିଲା। ବିନା ରାସାୟନିକ ସାର ବ୍ୟବହାର କରି କିପରି ଚାଷ କରାଯାଇପାରିବ ସେ ନେଇ ଏକ ମଡେଲ କରାଯାଇ ଲୋକଙ୍କୁ ଅବଗତ କରାଯାଇଥିଲା। ପ୍ୟାଡେଲ ପମ୍ପ, ବୁନ୍ଦା ଜଳସେଚନ ଯାହାକୁ ଆଫ୍ରିକାରେ ବ୍ୟବହାର କରାଯାଇ ଚାଷ କରାଯାଉଛି ସେ ଉପରେ ଲୋକଙ୍କୁ ବୁଝାଯାଉଥିବା କ୍ଲଷ୍ଟର ମ୍ୟାନେଜର ବିରଞ୍ଚତ୍ ଦଳବେହେରା କହିଛନ୍ତି। ଏହି ଷ୍ଟଲ୍ରେ ମାଣ୍ଡିଆ, ବାଜରା, ଅଟା, କୋନ ତିଆରି ବିଭିନ୍ନ ପ୍ରକାର ସାମଗ୍ରୀ ବିକ୍ରି କରାଯାଉଥିଲା। ଯାହାରକି ମୂଲ୍ୟ ପାଖାପାଖି ୨୦ରୁ ୧୦୦ ଟଙ୍କା ପର୍ଯ୍ୟନ୍ତ ରହିଛି। ସେହିଭଳି ମତ୍ସ୍ୟ ବିଭାଗ ପକ୍ଷରୁ ଏକ ଷ୍ଟଲ୍ ଖୋଲାଯାଇ ଲୋକଙ୍କୁ ସଚେତନ କରାଯାଉଛି।
ଦିବ୍ୟାଙ୍ଗଙ୍କ ପାଇଁ ସ୍ବତନ୍ତ୍ର କର୍ମଶାଳା
ବାଲିଯାତ୍ରା ପଡିଆର ମୋ କଟକ ପାଭିଲିୟନରେ ଦିବ୍ୟାଙ୍ଗଙ୍କ ପାଇଁ ଏକ କର୍ମଶାଳା ଅନୁଷ୍ଠିତ ହୋଇଥିଲା। ଏହାକୁ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ଉଦ୍ଘାଟନ କରିଥିଲେ। ଜିଲାପାଳ ଭବାନୀ ଶଙ୍କର ଚୟନୀ, ଜୀବନ ବିନ୍ଦୁ ରାଜ୍ୟ ସଂଯୋଜକ ଦେବାଶିଷ ସାମନ୍ତରାୟ, ରାଜ୍ୟ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ସୁବାସ ସିଂହ, ଯୁବ କଲ୍ୟାଣ ବିଭାଗ ଅଧ୍ୟକ୍ଷ ବିଜୟ ନାୟକ, ପୂର୍ବତନ ବିଧାୟକ ପ୍ରଭାତ ରଜ୍ଞନ ବିଶ୍ୱାଳ ପ୍ରମୁଖ ଯୋଗଦେଇ ଭିନ୍ନକ୍ଷମମାନଙ୍କ ପାଇଁ ଥିବା ବିଭିନ୍ନ ସୁବିଧା ସୁଯୋଗ ସମ୍ପର୍କରେ ଆଲୋକପାତ କରିଥିଲେ। ଅଧ୍ୟାପକ ଡ. ସଞ୍ଜୟ ଶତପଥୀ କାର୍ଯ୍ୟକ୍ରମ ପରିଚାଳନା କରିଥିଲେ। ଜିଲା ସମାଜ କଲ୍ୟାଣ ଅଧିକାରୀ ନିରୁପମା ବେହେରା, ଜିଲା ସାମାଜିକ ସୁରକ୍ଷା ଅଧିକାରୀ ଅଶୋକ କୁମାର ମିଶ୍ର ଯୋଗଦେଇ ଭିନ୍ନକ୍ଷମଙ୍କ ପାଇଁ ସରକାରଙ୍କ ପକ୍ଷରୁ ଯୋଗାଇ ଦିଆଯାଉଥିବା ସୁବିଧା ବିଷୟରେ ଆଲୋଚନା କରିଥିଲେ।
https://www.facebook.com/DharitriNews/videos/504363727089170/
