ଅନୁଗୋଳ ଅଫିସ, ୧୫।୭: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ସୋମବାର ଜେରିଆଟିକ୍ ଓ ଚକ୍ଷୁ ବିଭାଗର ଦୁଇଟି ୱାର୍ଡ ଉଦ୍ଘାଟନ ହେବ। ଏନେଇ ସମସ୍ତ ପ୍ରସ୍ତୁତି ଶେଷ ହୋଇଛି। ବିଧାନସଭା ଉପବାଚସ୍ପତି ରଜନୀକାନ୍ତ ସିଂହ ଏହାର ଉଦ୍ଘାଟନ କରିବେ। ତେବେ ନାମ ଫଳକରେ ଢେଙ୍କାନାଳ-ଅନୁଗୋଳ ଏମ୍ପି ମହେଶ ସାହୁଙ୍କ ନାଁ ନ ଥିବାରୁ ଶନିବାର ରାତିରେ ସେଠାରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା। ଏମ୍ପିଙ୍କ ସମର୍ଥକମାନେ ହୋ ହଲ୍ଲା କରିବାରୁ ଫଳକ ଲଗାଯିବା କାର୍ଯ୍ୟ ଅଧାରୁ ବନ୍ଦ ରହିଥିଲା। ପରେ ନୂଆ ଫଳକ ନିର୍ମାଣ ହୋଇ ଆସି ଦୁଇଟି ୱାର୍ଡ଼ର ମୁଖ୍ୟ ଫାଟକ କାନ୍ଥରେ ଲଗାଯାଇଛି। ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ହୃଦାନନ୍ଦ ଶତପଥୀ ଘଟଣାସ୍ଥଳକୁ ଆସିଥିଲେ। ଏ ନେଇ ପୂର୍ତ୍ତ ବିଭାଗ ଅଧିକାରୀ ଶତପଥୀ କହିଛନ୍ତି, ଏମ୍ପିଙ୍କ ନାମ ନ ଥିବା ଫଳକ ଆସିଥିଲା। କିନ୍ତୁ ଲଗାଯାଇ ନ ଥିଲା। ପରବର୍ତ୍ତୀ ସମୟରେ ଏହାକୁ ବଦଳା ଯାଇଛି। ଏମ୍ପି ନାମ ଥିବା ଫଳକ ଆସିବା ପରେ ତାଙ୍କ ସମର୍ଥକମାନେ ଶାନ୍ତ ପଡିଥିଲେ। ଏ ସମ୍ପର୍କରେ ଏମ୍ପି ସାହୁ କହିଛନ୍ତି, କୌଣସି ରାଜନୈତିକ ଦ୍ୱନ୍ଦ୍ୱ ନାହିଁ। ଓ୍ବାର୍ଡ ଉଦ୍ଘାଟନ ବିଷୟରେ ତାଙ୍କୁ ପୂର୍ତ୍ତ ବିଭାଗ ପକ୍ଷରୁ ସୂଚନା ଦିଆଯାଇ ନ ଥିଲା। ସମର୍ଥକଙ୍କଠାରୁ ଖବର ପାଇଛି। ଦିଲ୍ଲୀରୁ ଫେରିଲେ ଘଟଣା ବିଷୟରେ ବୁଝିବି।
