ଭୁବନେଶ୍ୱର, ୧୭।୬(ବ୍ୟୁରୋ): ରାଜ୍ୟର ସମସ୍ତ କଲେଜ ଓ ବିଶ୍ୱବିଦ୍ୟାଳୟ ବୁଧବାରଠାରୁ ଖୋଲିବ। ଅଧ୍ୟାପକ ଓ କର୍ମଚାରୀମାନେ ଅଫିସ ଆସିବେ। କିନ୍ତୁ ପାଠପଢ଼ା ହେବ ନାହିଁ। ଏନେଇ ଗତ ୧୨ ତାରିଖରେ ଉଚ୍ଚଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। ହେଲେ ସରକାରଙ୍କ ଏହି ନିଷ୍ପତ୍ତିକୁ ଦୃଢ଼ ବିରୋଧ କରିଛି ସରକାରୀ ଓ ବେସରକାରୀ ଅଧ୍ୟାପକ କର୍ମଚାରୀ କ୍ରିୟାନୁଷ୍ଠାନ କମିଟି। ଏବେ କଲେଜ ନ ଖୋଲି ଜୁଲାଇ ୩୧ ପରେ ୩୦% ଅଧ୍ୟାପକଙ୍କୁ ନେଇ ଶିକ୍ଷାନୁଷ୍ଠାନ ଖୋଲିବାକୁ ଅଧ୍ୟାପକମାନେ ଦାବି କରୁଛନ୍ତି। ମଙ୍ଗଳବାର କମିଟି ପକ୍ଷରୁ ଉଚ୍ଚଶିକ୍ଷା ମନ୍ତ୍ରୀ ଅରୁଣ କୁମାର ସାହୁଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି।
କମିଟିର କହିବାନୁଯାୟୀ, ଛାତ୍ରୀଛାତ୍ରଙ୍କ ପାଇଁ ରାଜ୍ୟ ସରକାର ଜୁଲାଇ ୩୧ ଓ କେନ୍ଦ୍ର ସରକାର ଅଗଷ୍ଟ ୧୫ ପର୍ଯ୍ୟନ୍ତ ଛୁଟି ଘୋଷଣା କରିଛନ୍ତି। ରାଜ୍ୟରେ ୪୦୦ରୁ ଊର୍ଦ୍ଧ୍ୱ କଲେଜରେ କ୍ୱାରାଣ୍ଟାଇନ ସେଣ୍ଟର କରାଯାଇଛି। ବର୍ତ୍ତମାନ ସୁଦ୍ଧା ବସ୍ ଚଳାଚଳ ସ୍ବାଭାବିକ ହୋଇ ନ ଥିବାରୁ କର୍ମଚାରୀମାନେ କିପରି କଲେଜ ଆସିବେ ତାହା ଚିନ୍ତାର କାରଣ ହୋଇଛି। ସେହିପରି ଯେଉଁମାନେ ଘରଭଡ଼ା ନେଇ ରହୁଥିଲେ ସେମାନଙ୍କୁ ମଧ୍ୟ ମାଲିକମାନେ ରହିବାକୁ ଅନୁମତି ଦେଉନାହାନ୍ତି। ଏହାଛଡ଼ା ଅଧ୍ୟାପକ, କର୍ମଚାରୀମାନେ ମୂଲ୍ୟାୟନ କାର୍ଯ୍ୟ, କୋଭିଡ୍-୧୯ କାର୍ଯ୍ୟ ଓ ଅନ୍ଲାଇନ ମାଧ୍ୟମରେ ଶିକ୍ଷାଦାନ ଓ ଅନ୍ୟାନ୍ୟ ଅଫିସ କାର୍ଯ୍ୟରେ ନିୟୋଜିତ ହୋଇଛନ୍ତି। ଯଦି ଏହା ପରେ ବି ଛାତ୍ରୀଛାତ୍ରଙ୍କ ଅନୁପସ୍ଥିତିରେ ଶିକ୍ଷାନୁଷ୍ଠାନ ଖୋଲିବ ତେବେ ଅଧ୍ୟାପକମାନେ କ’ଣ କରିବେ ବୋଲି ସେମାନେ ପ୍ରଶ୍ନ କରିଛନ୍ତି।
୬୬୨ବର୍ଗ କଲେଜ ସଭାପତି ତଥା କ୍ରିୟାନୁଷ୍ଠାନ କମିଟି ଆବାହକ ଗୋଲକ ନାୟକ କହିଛନ୍ତି, ଅନେକ ଅଧ୍ୟାପକ କଲେଜ ଯାଇପାରିବେ ନାହିଁ। ମୁଖ୍ୟମନ୍ତ୍ରୀ ତୁରନ୍ତ ଏ ଦିଗରେ ପଦକ୍ଷେପ ନିଅନ୍ତୁ। କମିଟି ଆବାହକ ପବିତ୍ର ମହଲା କହିଛନ୍ତି, ବିଶେଷକରି ଅଧ୍ୟାପିକାମାନେ କଲେଜ ଯିବାରେ ବହୁ ସମସ୍ୟାର ସମ୍ମୁଖୀନ ହେବେ। ଏଥି ସହିତ ସମସ୍ତ ଅଧ୍ୟାପକ ଓ କର୍ମଚାରୀ କଲେଜ ଗଲେ ସେମାନେ କମନ ରୁମ୍ରେ ବସିବା ଉଚିତ ହେବ ନାହିଁ। ଏହିଭଳି ଅନେକ ସମସ୍ୟା ନେଇ ଆମେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛୁ। ସେପଟେ ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା କରିବା ପରେ ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ କହିଥିବା ଗୋଲକ କହିଛନ୍ତି।
