ଛେଣ୍ଡିପଦା,୧୨ା୧୦(ସ୍ବ.ପ୍ର.) – ବ୍ରେନ ଷ୍ଟ୍ରୋକ, ପରେ ଗଳା ପାରାଲିସିସ୍। ମେଡିକାଲ ଦୌଡି ଦୌଡି ଲକ୍ଷାଧିକ ଟଙ୍କା ଖର୍ଚ୍ଚ ପରେ ବି ସୁସ୍ଥ ହୋଇପାରିଲେନି। ଶେଷରେ ଅର୍ଥାଭାବରୁ ଅଧିକ ଚିକିତ୍ସା ନ ପାଇ ଘରକୁ ଫେରିଆସିଛନ୍ତି ଅନୁଗୋଳ ଜିଲା ଛେଣ୍ଡିପଦା ବ୍ଲକ ଛେଣ୍ଡିପଦା ଖଜୁରିଆସାହିର ରାଜୁ ବେହେରା(୨୮)। ଏବେ ଡାକ୍ତର ଲେଖିଥିବା ଔଷଧ କିଣିବା ପାଇଁ ତାଙ୍କ ପରିବାର ନିକଟରେ ଅର୍ଥ ନାହିଁ। ଫଳରେ ଯନ୍ତ୍ରଣାମୟ ଜୀବନ ନେଇ ରାଜୁ ଘରେ ପଡ଼ି ରହିଥିବା ବେଳେ ସରକାରୀ ସହାୟତାକୁ ଚାହିଁ ବସିଛନ୍ତି ତାଙ୍କ ମା’ ବାପା।
ପୂର୍ଣ୍ଣଚନ୍ଦ୍ର ବେହେରା ଓ ନୁନୁ ବେହେରାଙ୍କ ପୁଅ ରାଜୁ ପ୍ରାୟ ୮ ମାସ ପୂର୍ବେ ଅସୁସ୍ଥ ହୋଇପଡିଥିଲେ। ତାଙ୍କୁ ଛେଣ୍ଡିପଦା, ଜିଲା ମୁଖ୍ୟ ଚିକିତ୍ସାଳୟ ଓ ପରେ କଟକ ବଡ ମେଡିକାଲରେ ଭର୍ତ୍ତି କରାଯାଇଥିଲା। ବ୍ରେନ ଷ୍ଟ୍ରୋକ ଯୋଗୁ ତାଙ୍କ ଗଳାରେ ପାରାଲିସିସ୍ ହୋଇଥିବା ଜଣାପଡିବା ପରେ ପରିବାର ଲୋକଙ୍କ ଚିନ୍ତା ବଢ଼ିଯାଇଥିଲା। ସେମାନେ କଟକ ମେଡିକାଲରୁ ରାଜୁଙ୍କୁ ନେଇ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ କିଛି ଦିନର ଚିକିତ୍ସାରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଗଲା। ଏମିତି କି ଜମିବାଡି ବିକି, ଧାର ଉଦ୍ଧାର କରି ପ୍ରାୟ ୭ରୁ ୮ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ମା’ ନୁନୁ କୁହନ୍ତି। ଏହାପରେ ଅଧିକ ଚିକିତ୍ସା ପାଇଁ ସମ୍ବଳ ନ ଥିବାରୁ ପୁଅକୁ ଘରକୁ ନେଇ ପଳାଇ ଆସିଥିଲେ। ଦୀର୍ଘ ଦିନ ପର୍ଯ୍ୟନ୍ତ ଚିକିତ୍ସା କରା ନ ଗଲେ ରାଜୁଙ୍କ ପୂରା ଶରୀର ପାରାଲିସିସ୍ ହୋଇଯିବାର ଆଶଙ୍କା ଥିବା ଡାକ୍ତର କହିଥିବା ନୁନୁ କୁହନ୍ତି। ରୋଜଗାରର ପନ୍ଥା ନ ଥିବାବେଳେ ଦୈନିକ ଔଷଧ ଖର୍ଚ୍ଚ ବାବଦ ୫ଶହରୁ ୭ଶହ ଟଙ୍କା ଦରକାର ହେଉଥିବାରୁ ତାହା କିଣିବା ଏବେ କଷ୍ଟକର ହୋଇପଡିଛି। ଏଥିପାଇଁ ଜିଲାପାଳଙ୍କ ଦ୍ୱାରସ୍ଥ ହେବା ପରେ ଚିକିତ୍ସା ବାବଦକୁ ୧୦ ହଜାର ଟଙ୍କା ସହାୟତା ମିଳିଥିଲା। ହେଲେ ତାହା ସମୁଦ୍ରକୁ ଶଙ୍ଖେ ଭଳି ହୋଇଥିବାରୁ ସରକାର ତାଙ୍କ ପୁଅକୁ ଭଲ କରିବାକୁ ଅଧିକ ସହାୟତା ଯୋଗାଇଦେବାକୁ ନୁନୁ ନେହୁରା ହୋଇଛନ୍ତି।
ଏ ସମ୍ପର୍କରେ ଛେଣ୍ଡିପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ମହାମିଳନ ମୁର୍ମୁ କୁହନ୍ତି, ରାଜୁଙ୍କ ମୁଣ୍ଡରେ ରକ୍ତ ସଞ୍ଚାଳନ ଠିକ୍ ଭାବେ ହୋଇପାରୁନାହିଁ। ଏଥିଯୋଗୁ ସମ୍ପୂର୍ଣ୍ଣ ଶରୀର ପାରାଲିସିସ ହୋଇଯିବା ସମ୍ଭାବନା ରହିଛି। ଏଥିପାଇଁ ଦୀର୍ଘଦିନ ଧରି ଚିକିତ୍ସାରେ ରହିବା ଜରୁରୀ। ହେଲେ ସେ ସୁବିଧା ସ୍ବାସ୍ଥ୍ୟକେନ୍ଦ୍ରରେ ନାହିଁ। ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଏ ନେଇ ଜଣାଇବାକୁ ସେ ପରାମର୍ଶ ଦେଇଛନ୍ତି। ବିଡିଓ ସୁନୀଲ କେରକେଟା କୁହନ୍ତି, ବ୍ଲକ ପ୍ରଶାସନ ପକ୍ଷରୁ ଯେତିକି ସହଯୋଗ କରାଯିବା କଥା ତାହା କରାଯାଇଛି।
