ପରଜଙ୍ଗ, ୨୮।୪(ଡି.ଏନ.ଏ.)-ଜୀବନ ଏତେ ସହଜ ନୁହେଁ, କଅଁଳ ବୟସରୁ ଏକଥାକୁ ବୁଝିସାରିଲେଣି ଶୁଭଲକ୍ଷ୍ମୀ। ଯେଉଁ ବୟସରେ ସାଙ୍ଗସାଥୀଙ୍କ ମେଳରେ ଖେଳିବୁଲିବା କଥା, ସେହି ସମୟରେ ସିକିଲ୍ସେଲ୍ ଭଳି ଜଟିଳ ରୋଗରେ ପଡ଼ିଛନ୍ତି ସେ। ଝିଅର ଚିକିତ୍ସା କରିବାକୁ ଯାଇ ସର୍ବସ୍ବାନ୍ତ ହୋଇପଡ଼ିଥିବା ପରିବାର ଏବେ ଚାହିଁଛି ସହାୟତାକୁ।
ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁମୁସୀ ପଞ୍ଚାୟତ ବସନ୍ତପଡ଼ା ଗ୍ରାମର ସଞ୍ଜୟ ବେହେରାଙ୍କ ୬ବର୍ଷର ଝିଅ ହେଉଛନ୍ତି ଶୁଭଲକ୍ଷ୍ମୀ। ସେ ଏବେ ଗଁା ସ୍କୁଲରେ ଦ୍ୱିତୀୟ ଶ୍ରେଣୀରେ ପଢୁଛନ୍ତି। ବାରମ୍ବାର ଦେହ ଅସୁସ୍ଥ ରହିବାରୁ ସଞ୍ଜୟ ଝିଅର ଚିକିତ୍ସା କରାଇଥିଲେ। ପରୀକ୍ଷାରୁ ଶୁଭଲକ୍ଷ୍ମୀଙ୍କୁ ସିକିଲସେଲ ହୋଇଥିବା ଜଣାପଡ଼ିଥିଲା। ଏପରି ରୋଗ ସମ୍ପର୍କରେ ଜାଣିବା ପରେ ପରିବାର ଲୋକଙ୍କ ପାଦ ତଳୁ ମାଟି ଖସିଯାଇଛି। ଝିଅ ଜୀବନ ବଞ୍ଚାଇବାକୁ ପ୍ରତି ୧୫ଦିନରେ ଥରେ ରକ୍ତ ଦେବାକୁ ପଡୁଛି। ଛୋଟମୋଟ ପରିବା ବ୍ୟବସାୟ କରୁଥିବା ସଞ୍ଜୟଙ୍କ ପକ୍ଷେ ଏହା ଏବେ କାଠିକର ପାଠ ହୋଇଯାଇଛି।
ଏ ନେଇ ସଞ୍ଜୟ କୁହନ୍ତି, ପ୍ରଥମେ ଝିଅ ଜନ୍ମ ହୋଇଥିବାରୁ ପରିବାରରେ ଖୁସିର ଲହରି ଖେଳିଯାଇଥିଲା। ହେଲେ ଏହି ସୁଖ ବେଶିଦିନ ରହିଲାନି। ବାରମ୍ବାର ଝିଅ ଦେହ ଖରାପ ହେଉଛି। ଡାକ୍ତରଖାନାକୁ ଧଁା ଦୌଡ଼ ମଧ୍ୟରେ ବ୍ୟବସାୟ କରିହେଉନାହିଁ। ଯାହା କିଛି ଥିଲା ସବୁ ସରିଗଲାଣି। ପରିବାର ଚଳାଇବା ବି କଷ୍ଟକର ହୋଇଗଲାଣି। ଏବେ ୧୫ଦିନରେ ଥରେ ଝିଅକୁ ରକ୍ତ ଦେବାକୁ ପଡୁଛି। ଔଷଧ ଖର୍ଚ୍ଚ ବି ବଢ଼ିଲାଣି। ଅଭାବରୁ ଔଷଧ କିଣିବା ମୁସ୍କିଲ ହୋଇଗଲାଣି। ଝିଅର ଏପରି ଅବସ୍ଥା ଦେଖିହେଉନାହିଁ ବୋଲି ସେ କହିଛନ୍ତି। ଶୁଭଲକ୍ଷ୍ମୀଙ୍କ ଚିକିତ୍ସା ଲାଗି ସହାୟତାର ହାତ ବଢ଼ାଇବାକୁ ସଞ୍ଜୟ ଏବଂ ତାଙ୍କ ସ୍ତ୍ରୀ ଦୁଲ୍ଲଣା ପ୍ରଶାସନ, ସ୍ବେଚ୍ଛାସେବୀ ଅନୁଷ୍ଠାନ ଏବଂ ସହୃଦୟ ବ୍ୟକ୍ତିଙ୍କୁ ନିବେଦନ କରିଛନ୍ତି।
