ଢେଙ୍କାନାଳ ଅଫିସ, ୩୦।୮-ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କଣ୍ଟାବଣିଆ ଥାନା ନିକଟ ଓଭରବ୍ରିଜ୍ରୁ ଟ୍ରକ୍ ଚାଳକଙ୍କଠାରୁ ଆକ୍ରମଣ କରି ଲୁଟ୍ ମାମଲାରେ ପୋଲିସ ୩ଜଣଙ୍କୁ ଗିରଫ କରିଛି। ସେମାନେ ହେଲେ ପରଜଙ୍ଗ ଥାନା ଲୋଧଣି ଗ୍ରାମର ଅନିଲ ନାଏକ (୧୯), ପରଜଙ୍ଗ ଥାନା ଦଦରାଘାଟି ୩ନଂ. କଲୋନୀର ସୁନୀଲ ନାଏକ (୨୦) ଏବଂ ଅନୁଗୋଳ ଜିଲା ତାଳଚେର ଥାନା କୁକୁଡୁଲା ଅଞ୍ଚଳର ଚନ୍ଦନ ନାଏକ। ସେମାନଙ୍କ ନିକଟରୁ
୧୬ ମୋବାଇଲ, ଏକ ବାଇକ୍, ବହୁ ପ୍ୟାନକାର୍ଡ, ଡ୍ରାଇଭିଂ ଲାଇସେନ୍ସ ଜବତ କରାଯାଇଛି।
ସଦର ଏସ୍ଡିପିଓଙ୍କ କାର୍ଯ୍ୟାଳୟରେ ଗୁରୁବାର ଅପରାହ୍ନରେ ଆୟୋଜିତ ଖବରଦାତା ସମ୍ମିଳନୀରେ ଲୁଟେରା ଗ୍ୟାଙ୍ଗ୍ ସମ୍ପର୍କରେ ସବିଶେଷ ସୂଚନା ଦିଆଯାଇଛି।
ଗଣମାଧ୍ୟମକୁ ସୂଚନା ଦେଇ ଏସ୍ଡିପିଓ ଶ୍ରୀହର୍ଷ ମିଶ୍ର କହିଲେ, ଗତ ୨୭ ତାରିଖରେ କଣ୍ଟାବଣିଆ ଓଭରବ୍ରିଜ୍ ନିକଟରେ ଟ୍ରାନ୍ସପୋର୍ଟ ସାମଗ୍ରୀ ନେଇ ଆସିଥିବା ଟ୍ରକ୍କୁ ଗାଡ଼ି ଚାଳକ ରବୀନ୍ଦ୍ର ସିଂ ପାର୍କିଂ କରିଥିଲେ। ରାତି ପ୍ରାୟ ୧୧ଟାରେ ସମ୍ପୃକ୍ତ ଅଭିଯୁକ୍ତମାନେ ତାଙ୍କୁ ମରଣାନ୍ତକ ଆକ୍ରମଣ କରି ମୋବାଇଲ, ଡ୍ରାଇଭିଂ ଲାଇସେନ୍ସ, ପ୍ୟାନକାର୍ଡ ଲୁଟି ନେଇଥିଲେ। ରବୀନ୍ଦ୍ରଙ୍କ ଅଭିଯୋଗକ୍ରମେ ନଂ. ୫୦/୧୯, ଦଫା ୩୯୨ ଆଇପିସିରେ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲା। କୌଣସି ସୂତ୍ରରୁ ସୂଚନା ପାଇ ବୁଧବାର ରାତିରେ ପୋଲିସ ଓଭରବ୍ରିଜ୍ ଅଞ୍ଚଳରେ ଚଢ଼ାଉ କରି ଅଭିଯୁକ୍ତଙ୍କୁ ଗିରଫ କରିଥିଲା। ଘଟଣାରେ ସମ୍ପୃକ୍ତ ଅନ୍ୟଜଣେ ଫେରାର ଅଛନ୍ତି। ଅନିଲଙ୍କ ଘର ଲୋଧଣି ଗ୍ରାମରେ। ସେ ଅନୁଗୋଳ ଜିଲା କଲିୟାରି ଥାନା ଟିଟିପିଏସ୍ ନାୟକ ସାହି ଅଞ୍ଚଳରେ ରହି ବିଭିନ୍ନ ଅସାମାଜିକ କାର୍ଯ୍ୟରେ ଲିପ୍ତ ଥିବା ଏସ୍ଡିପିଓ କହିଛନ୍ତି। କଣ୍ଟାବଣିଆ ଥାନାଧିକାରୀ ବିଜୟ ହାଇବ୍ରୁ, ଏସ୍ଆଇ ପ୍ରଦୀପ ନାୟକ ପ୍ରମୁଖ ଚଢ଼ାଉରେ ସାମିଲ ଥିଲେ।
