୩ ମାସହେଲା ମିଳିନି ବିଦ୍ୟୁତ୍‌ ବିଲ୍‌: ଉପଭୋକ୍ତାଙ୍କ ମଧ୍ୟରେ ଅସନ୍ତୋଷ
7:25 amJune 11, 2019

ରାୟଗଡ଼(ଗଜପତି), ୧୧ା୬- ଗଜପତି ଜିଲା ରାୟଗଡ଼ ବ୍ଲକ୍‌ରେ ଉପଭୋକ୍ତାମାନେ ୩ ମାସହେଲା ବିଦ୍ୟୁତ୍‌ ବିଲ୍‌ ପାଇ ନ ଥିବା ଅଭିଯୋଗ ହୋଇଛି। ଦୀର୍ଘଦିନ ଧରି ବିଲ୍‌ ଦିଆଯାଉନଥିବାରୁ ବକେୟା ବଢ଼ୁଛି। ତେଣୁ ଏକାଥରକେ ଏତେ ଟଙ୍କା କିଭଳିି ପୈଠ କରିବେ ଉପଭୋକ୍ତା ଚିନ୍ତାରେ ପଡ଼ିଛନ୍ତି।
ପ୍ରକାଶଯେ, ରାୟଗଡ଼ ଏକ ଆଦିବାସୀ ଅଧ୍ୟ୍ୟୁଷିତ ଅଞ୍ଚଳ। ଏଠାରେ ଅଧିକାଂଶ ଦିନ ମଜୁରିଆ ଶ୍ରେଣୀର ଲୋକେ ବସବାସ କରୁଛନ୍ତି। ରାୟଗଡ଼ ସବ୍‌ଷ୍ଟେଶନ୍‌ ଅଧୀନରେ ବ୍ଲକ୍‌ର ୨୧ ଟି ପଞ୍ଚାୟତର ୨୭୦ ଗ୍ରାମର ୧୫ ହଜାର ବିଦ୍ୟୁତ୍‌ ଉପଭୋକ୍ତା ରହିଛନ୍ତି। ମାତ୍ର ଏଠାରେ ଦୀର୍ଘଦିନ ହେଲା ବିଲ୍‌ ମିଳିନଥିବାରୁ ଅସନ୍ତୋଷ ପ୍ରକାଶ ପାଇଛି। ଗରିବ ଶ୍ରେଣୀର ଲୋକେ ଏକାଥରକେ ବହୁ ପରିମାଣର ଅର୍ଥ ଜମା କରିବା ସମ୍ଭବ ନୁହେଁ। ତେଣୁ ତୁରନ୍ତ ସମସ୍ୟାର ସମାଧାନ କରି ଶୀଘ୍ର ବିଲ୍‌ ଦେବା ପାଇଁ ଅଞ୍ଚଳବାସୀ ଦାବି କରିଛନ୍ତି। ଏନେଇ ଜୁନିୟର ମ୍ୟାନେଜର ଦେବବ୍ରତ ସାହୁଙ୍କ ସହ ଯୋଗାଯୋଗ କରିବାରେ ସେ କହିଛନ୍ତି ଯେ, ଯେଉଁମାନେ ବିଦ୍ୟୁତ୍‌ ବିଲ୍‌ ପ୍ରଦାନ କରୁଥିଲେ ସେମାନେ ବିଭିନ୍ନ ଦାବି ନେଇ କାର୍ଯ୍ୟ ବନ୍ଦ ରଖିଥିଲେ। ଏବେ ଦାବିଗୁଡ଼ିକ ପୂରଣ ହୋଇଥିବାବେଳେ ଏହି ମାସରୁ ବିଲ୍‌ ଦିଆଯିବ ବୋଲି କହିଛନ୍ତି।