୩ମାସ ଧରି ଅନ୍ଧାରରେ ୯ ଆଦିବାସୀ ଗାଁ
8:17 amNovember 19, 2019

ଗଣିଆ,୧୯ା୧୧(ଡି.ଏନ.ଏ.): ପ୍ରତି ଗାଁର ସମସ୍ତ ପରିବାର ଯେପରି ବିଦ୍ୟୁତ୍‌ ସେବା ପାଇପାରିବେ ସେଥିପାଇଁ ସରକାର ସମସ୍ତ ବ୍ୟବସ୍ଥା କରୁଥିବା କହୁଛନ୍ତି। ନୟାଗଡ଼ ଜିଲା ଗଣିଆ ବ୍ଲକର ଆଦିବାସୀ ଅଞ୍ଚଳ ବଡଶିଲିଙ୍ଗା ପଞ୍ଚାୟତରେ ଏହାର ବାସ୍ତବ ଚିତ୍ର କିନ୍ତୁ ଅଲଗା। ଅଧଘଣ୍ଟା ବିଜୁଳି ଆଲୋକ ଦେଖିବା ପରେ ୩ମାସ ହେଲା ଏହି ପଞ୍ଚାୟତର ୯ ଆଦିବାସୀ ଗାଁ ଅନ୍ଧାରରେ ଅଛନ୍ତି।
ବିଦ୍ୟୁତ୍‌ ସେବା ପାଇଁ ଏହି ପଞ୍ଚାୟତର ଆଦିବାସୀମାନେ ଦାବି ଉପସ୍ଥାପନ କରିବା ସହ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବା ପରେ ଗତବର୍ଷ କାର୍ଯ୍ୟ ଆରମ୍ଭ ହୋଇଥିଲା। ଦୀନଦୟାଲ ଉପାଧ୍ୟାୟ ବିଦ୍ୟୁତ୍‌କରଣ ଯୋଜନାରେ ଓପିସିଏଲ ଜରିଆରେ ଗୁପ୍ତା କମ୍ପାନୀକୁ କାର୍ଯ୍ୟ କରିବା ପାଇଁ ଅନୁମତି ଦିଆଯାଇଥିଲା। ଗୁପ୍ତା କମ୍ପାନୀ ଦ୍ୱାରା ଏହି ପଞ୍ଚାୟତର ମଳାସପଦର, ଶଗଡଭଙ୍ଗା, ଗୋଛାବାରି, କୁଚୁମରା, ଇନ୍ଦାଗାଡୁ, ସେକେଟାପଲ୍ଲୀ, ବୁରିଆପାଜୁ, ଇଡେଇ, ଜାନକାଝୋଲା, ଢିପିସାହି, ବାଙ୍କଝରି ଓ ଡୁଇସିଂ ଆଦି ଗ୍ରାମରେ ବିଦ୍ୟୁତ୍‌ ଯୋଗାଣ କାର୍ଯ୍ୟ ଆରମ୍ଭ ହୋଇଥିଲା ା ଏଥି ମଧ୍ୟରୁ କେତେକ ଗ୍ରାମରେ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ ଆଉ କେତେକ ଗ୍ରାମରେ ଅଧାପନ୍ତରିଆ ଭାବେ ପଡିରହିଛି। ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ଗ୍ରାମଗୁଡିକ ମଧ୍ୟରୁ ୯ଟି ଗାଁ ୩ମାସ ହେଲା ଅନ୍ଧାରରେ ରହିଛନ୍ତି। ସଂଯୋଗ ପରେ ଡୁଇସିଂ ଓ ବାଙ୍କଝରି ଗ୍ରାମର ଲୋକେ କେବଳ ଅଧଘଣ୍ଟା ପାଇଁ ବିଦ୍ୟୁତ୍‌ ଆଲୋକ ଦେଖିଥିଲେ ା ପରେ କିଛି ତ୍ରୁଟି ଯୋଗୁ ଆଜି ପର୍ଯ୍ୟନ୍ତ ବିଦ୍ୟୁତ୍‌ ଆଲୋକ ଦେଖିବାରୁ ଏହି ୨ ଗ୍ରାମବାସୀ ବଞ୍ଚତ୍ତ ହୋଇଛନ୍ତି। ସେହିପରି ନିମ୍ନମାନର କେବୁଲ୍‌ରେ ବିଦ୍ୟୁତ୍‌ ଯୋଗାଣ ଯୋଗୁ ବାରମ୍ବାର ବିଭ୍ରାଟ ଦେଖାଦେଉଛି। ଏହାର ସ୍ଥାୟୀ ମରାମତି ପାଇଁ ସ୍ଥାନୀୟ ଜନସାଧାରଣ ବିଭାଗୀୟ ଅଧିକାରୀଙ୍କ ଦ୍ୱାରସ୍ଥ ହେବା ସହ ଜିଲାପାଳଙ୍କ ଜନଶୁଣାଣି ଶିବିରରେ ଅଭିଯୋଗ କରିଥିଲେ। ତୁରନ୍ତ ମରାମତି କାର୍ଯ୍ୟ କରିବା ପାଇଁ ଜିଲାପାଳ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ ମଧ୍ୟ ସୁଫଳ ମିଳିନି। ତୁରନ୍ତ ବିଦ୍ୟୁତ୍‌ ସେବା ଯୋଗାଇ ଦିଆ ନ ଗଲେ ଆଦିବାସୀଙ୍କ ଅସନ୍ତୋଷ ଆନ୍ଦୋଳନ ରୂପ ନେବ ବୋଲି ପୂର୍ବତନ ସରପଞ୍ଚ ପ୍ରଫୁଲ୍ଲ କୁମାର ନାୟକ, ନାଏବ ସରପଞ୍ଚ ବିପ୍ରଚରଣ ମଳିକ, ଉପେନ୍ଦ୍ର ପ୍ରଧାନ ଓ ଅକ୍ରୁର ମଳିକ ପ୍ରମୁଖ କହିଛନ୍ତି। ଏ ସମ୍ପର୍କରେ ଦଶପଲ୍ଲା ବିଦ୍ୟୁତ୍‌ ସବ୍‌ଡିଭିଜନ ଏସ୍‌ଡିଓ ଚିତ୍ତରଞ୍ଜନ ବେହେରାଙ୍କୁ ପଚାରିବାରୁ ସେ କହିଥିଲେ, ଗୁପ୍ତା କମ୍ପାନୀ ବର୍ତ୍ତମାନ ସୁଦ୍ଧା କାର୍ଯ୍ୟ ଶେଷ କରି ସେସୁ ବିଭାଗକୁ ହସ୍ତାନ୍ତର କରିନାହିଁ। କେବୁଲରେ ତ୍ରୁଟି ଯୋଗୁ ବାରମ୍ବାର ବିଦ୍ୟୁତ୍‌ ବିଭ୍ରାଟ ଘଟୁଛି। ଏ ନେଇ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି।