ଆରଡ଼ି,୬।୯(ଡି.ଏନ୍.ଏ.) : ଭଦ୍ରକ ଜିଲା ଆରଡ଼ି ଫାଣ୍ଡି ଅନ୍ତର୍ଗତ କୁଳେଇପଦା ଛକରେ ଗୁରୁବାର ରାତିରେ ୨ଟି କ୍ୟାବିନ୍ରୁ ଚୋରି ହୋଇଥିବା ଅଭିଯୋଗ ହୋଇଛି। ସୂଚନା ଅନୁସାରେ କୁଳେଇପଦା ଗାଁର ଜୟନ୍ତ ନାୟକ ଓ ସୁବାସ ବିଶ୍ବାଳ ରାତି ପ୍ରାୟ ୯ଟାରେ ଦୋକାନ ବନ୍ଦ କରି ଘରକୁ ଫେରିଥିଲେ । ଶୁକ୍ରବାର ସକାଳୁ ତାଙ୍କ କ୍ୟାବିନ୍ ଭାଙ୍ଗି ନଗଦ ୧୦ ହଜାର ଟଙ୍କା ଓ ପ୍ରାୟ ୫ ହଜାର ଟଙ୍କାର ଜିନିଷପତ୍ର କେହି ନେଇ ଯାଇଥିବା ଜୟନ୍ତ କହିଛନ୍ତି। ସେହିଭଳି ସୁବାସଙ୍କ ଦୋକାନରୁ ନଗଦ ଅର୍ଥରାଶି ସହ ବହୁ ସାମଗ୍ରୀ ଚୋରି ହୋଇଥିବା ସେ ପ୍ରକାଶ କରିଛନ୍ତି। ଉଭୟେ ଏ ସଂକ୍ରାନ୍ତରେ ଆରଡ଼ି ଫାଣ୍ଡିରେ ଏତଲା ଦେଇଛନ୍ତି। ଆରଡ଼ି ଫାଣ୍ଡି ହାବିଲଦାର ରମେଶ ଚନ୍ଦ୍ର ମଲ୍ଲିକ ଘଟଣାସ୍ଥଳରେ ପହଞ୍ଚି ଚୋରିର ତଦନ୍ତ କରିଛନ୍ତି।
