ନୂଆଦିଲ୍ଲୀ,୧୩-୯: ‘ଅଯୋଧ୍ୟାରେ ରାମମନ୍ଦିର ନିର୍ମାଣ ହେବ, କାରଣ ସୁପ୍ରିମକୋର୍ଟ ଆମର। ଏ ଦେଶ, ନ୍ୟାୟପାଳିକା ଓ ମନ୍ଦିର ସବୁ ଆମର।’ ୨୦୧୮ ସେପ୍ଟେମ୍ବରରେ ଉତ୍ତରପ୍ରଦେଶର ମନ୍ତ୍ରୀ ମୁକୁଟ ବିହାରୀ ବର୍ମା ଦେଇଥିବା ଏଭଳି ମନ୍ତବ୍ୟକୁ ସୁପ୍ରିମକୋର୍ଟର ପ୍ରଧାନ ବିଚାରପତି ରଞ୍ଜନ ଗୋଗୋଇ ନିନ୍ଦା କରିଛନ୍ତି। ଗୁରୁବାର ରାମ ଜନ୍ମଭୂମି ମାମଲା ଶୁଣାଣିର ୨୨ତମ ଦିନରେ ସୁନ୍ନି ଓ୍ବାକ୍ଫ ବୋର୍ଡ ପାଇଁ ମାମଲା ଲଢ଼ୁଥିବା ବରିଷ୍ଠ ଆଇନଜୀବୀ ରାଜୀବ ଧାଓ୍ବନ ମନ୍ତ୍ରୀଙ୍କ ଉପରୋକ୍ତ ମନ୍ତବ୍ୟ ସମ୍ପର୍କରେ ଅଦାଲତଙ୍କ ଦୃଷ୍ଟି ଆକର୍ଷଣ କରିଥିଲେ। ମାମଲା ସମ୍ପର୍କରେ ଯୁକ୍ତି ଉପସ୍ଥାପନ ପାଇଁ ବାତାବରଣ ଅନୁକୂଳ ନୁହେଁ ବୋଲି ସେ ୫ ଜଣିଆ ଖଣ୍ଡପୀଠରେ ଅଭିଯାଗ କରିଥିଲେ। ତାଙ୍କ ପାଖକୁ ଫେସ୍ବୁକ୍ରେ ଧମକପୂର୍ଣ୍ଣ ବାର୍ତ୍ତା ଆସୁଥିବା ଏବଂ ବୁଧବାର ତାଙ୍କ କିରାଣିଙ୍କୁ କେତେଜଣ ସୁପ୍ରିମକୋର୍ଟ ପରିସରରେ ମାଡ଼ ମାରିଥିବା ଧାଓ୍ବନ କହିଥିଲେ। ଏହା ଉପରେ ପ୍ରତିକ୍ରିୟା ପ୍ରକାଶ କରି ପ୍ରଧାନ ବିଚାରପତି କହିଥିଲେ, ଏଭଳି ମନ୍ତବ୍ୟ ନିନ୍ଦନୀୟ।
