ଲାଠୋର, ୨୨।୨ (ଡି.ଏନ୍.ଏ.)-
ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର ଗୋଷ୍ଠୀ କେନ୍ଦ୍ରରେ ଅନେକ ମାସ ହେଲା ଥାନୀଅ ହାଟପଦାପଡ଼ା ପ୍ରାଥମିକ ସ୍କୁଲର ଛାତ୍ରୀଛାତ୍ରକଁର ପାଠ୍ପଢ଼ା ଚାଲିଛେ। ଏନ୍ତାଥି ଗୋଷ୍ଠୀ କେନ୍ଦ୍ରରେ ହେବାକେ ଥିବାର ଉନିଅଁା କାଯ୍ରେ ଅସ୍ବିଧା ହେଉଛେ। ଇଆଡ଼େ ସରକାର ପ୍ରାଥମିକ ଶିକ୍ଷାର ବିକାଶ ଲାଗି ରାଜକୋଷରୁ ପାଏନ୍ ଲେଖେଁ ଟଁକା ଖରଚ୍ କରୁଛନ୍। ହେଲେ କେନ୍ ସ୍କୁଲରେ ପଢ଼ାକୁଠି ନାଇଁ ତ ଆର କେନ୍ନେ ଶିକ୍ଷକ ଅଭାବୁ ପାଠ୍ପଢ଼ା ନାଇଁ ହେବାର।
ସୂଚନା ଅନ୍ସାରେ ୧୯୭୯ ସାଲେ ଲାଠୋର ହାଟପଦାପଡ଼ାରେ ଗୁଟେ ସରକାରୀ ପ୍ରାଥମିକ ସ୍କୁଲର ଥାପନା କରାଯାଇଥିଲା। ସ୍କୁଲର ନିଜର ଜାଗାବାଡ଼ି ରହିଥିଲେ ବି ସେଠାନେ ପଢ଼ାକୁଠିର ଅଭାବ ରହିଛେ। ସେନ୍ତା ସ୍କୁଲର ବାଡ଼ାକେ ଲାଗି ବିପଦ୍ ଅବସ୍ତାରେ ବିଦ୍ୟୁତ୍ ଟ୍ରାନ୍ସଫର୍ମର ରହିଛେ। ଇ ବାବ୍ଦେ ଧରିତ୍ରୀ ସମ୍ବଲପୁର ସଂସ୍କରଣରେ ଟିକିନିଖିନୁ ଖବର ବାହାରିଥିଲା। ଖବର ବାହାରଲା ଉତାରୁ ଖପ୍ରାଖୋଲ ବ୍ଲକ ଶିକ୍ଷା ଅଧ୍କାରୀ ଚିଠି ସଂଖ୍ୟା ୧୦୧୩, ତା.୧୨ା୭ା୨୦୧୯ରେ ସ୍କୁଲର ପ୍ରଧାନ ଶିକ୍ଷୟିତ୍ରୀକୁଁ ସେଠାନେ ଛାତ୍ରୀଛାତ୍ରକୁଁ ପାଠ୍ ନାଇଁ ପଢ଼େଇ କରି ପାସର ଗୋଷ୍ଠୀ କେନ୍ଦ୍ରରେ ପଢ଼ାବାକେ ନିରଦେଶ ଦେଇଥିଲେ। ସେନ୍ତା ଚିଠି ସଂଖ୍ୟା ୧୦୧୪, ତା.୧୨ା୭ା୨୦୧୯ରେ ବିଇଓ ଲାଠୋର ସରପଁଚ୍କୁଁ ଚିଠି କରି ଗୋଷ୍ଠୀ କେନ୍ଦ୍ରରେ ପିଲାମାନକର ପାଠ୍ ପଢ଼ବାର ବେବସ୍ତା କରବାକେ ଅନୁରୋଧ କରିଥିଲେ। ବିଇଓକଁର ଅନୁରୋଧ୍ ହିସାବେ ଲାଠୋର ସରପଁଚ୍ ବି ଲକ୍ଷାଧିକ୍ ଟଁକା ଖରଚ୍ କରି ଗୋଷ୍ଠୀ କେନ୍ଦ୍ରରେ ଛାତ୍ରୀଛାତ୍ରକଁର ପାଠ୍ପଢ଼ବାର ସୁବିଧା କଲେ। ଇ ଭିତରେ ରାଜନେତା, ଜିଲା ଯୋଜନା ବୋର୍ଡ ସଦସିଅ ସତ୍ୟନାରାୟଣ ଭୋଇ ଆର ବିଭାଗୀୟ ଅଧ୍କାରୀମାନେ ପରିଦରଶନରେ ଆସି ସବୁ ସମସିଆ ଉପରେ ପଚାରି ବୁଝିଥିଲେ। ହେଲେ ଆଏଜ୍ତକ ଇ ଦିଗେ ଆଏଁଖ୍ ଦୁର୍ଶିଆ ପଦକ୍ଷେପ ନାଇଁ ନେଇ। ସେନ୍ତା ୧୮ା୨ା୨୦୨୦ରେ ଜିଲା ମନିଟରିଂ ଟିମ ସ୍କୁଲରେ ପୁହୁଁଚି ଥିଲେ। ଜିଲା ମନିଟରିଂ ଟିମ୍କେ ପ୍ରଧାନ ଶିକ୍ଷୟିତ୍ରୀ ସୁକାନ୍ତୀ ଶବର ଆର ସିଆର୍ସିସି କୁଞ୍ଜ ବିହାରୀ ସରାପ ସ୍କୁଲର ସମସିଆ ବାବ୍ଦେ କହିଥିଲେ। ଉନିଅଁା ଅଧ୍କାରୀମାନକୁ ସ୍କୁଲ ତରଫୁ ସମସିଆର ସମାଧାନ ଲାଗି ଅନୁରୋଧ କଲେ ଆମେ ପଦକ୍ଷେପ ନେଇଛୁଁ। ଦିନୁ ଦିନ୍କେ ସମସିଆର ସମାଧାନ ହେବା ବଲି କଥାଟାକେ କିଁଦ୍ରଉଛନ୍। ଇଆଡ଼େ ସ୍କୁଲର କେତେ ଜମି ରହିଛେ ସେଟାକେ ମପାଜୁଖା କରାଯାଉ। ସେଠାନେ ସ୍କୁଲର ନୂତନ କୁଠା ବନେଇ ଗୋଷ୍ଠୀ କେନ୍ଦ୍ରରୁ ଛାତ୍ରୀଛାତ୍ରକୁଁ ସେଠାନ୍କେ ନିଆଯାଉ ବଲି ସାଧାରନରେ ଦାବି ହେଉଛେ।
