ବଡବିଲ, ୨୪।୯(ସ୍ବ.ପ୍ର.)-କେନ୍ଦୁଝର ଜିଲା ବଡବିଲ ଥାନା ଅନ୍ତର୍ଗତ ଦାମୁହଟିଂରେ ସୋମବାର ଦେବକୀ ନାମ୍ନୀ ଜଣେ ମହିଳାଙ୍କ ସହ ତାଙ୍କ ସ୍ବାମୀ କାଳିଆ ଗୋପଙ୍କ ମଧ୍ୟରେ କୌଣସି କାରଣ ନେଇ ପାଟିତୁଣ୍ଡ ହୋଇଥିଲା। ଏଥିରେ କାଳିଆ ଉତ୍କ୍ଷିପ୍ତ ହୋଇ ଏକ ଏକ ପ୍ଲାଷ୍ଟିକ ପାଇପ୍ରେ ସ୍ତ୍ରୀଙ୍କୁ ପିଟିବାରୁ ତାଙ୍କର ମୃତ୍ୟୁ ଘଟିଥିବା ଅଭିଯୋଗ ହୋଇଛି। ପୋଲିସ ଘଟଣାର ତଦନ୍ତ କରି ଅଭିଯୁକ୍ତ କାଳିଆଙ୍କୁ ଗିରଫ କରିଛି। ଦେବକୀଙ୍କ ମୃତ୍ୟୁ ଓ ତାଙ୍କ ସ୍ବାମୀ ଗିରଫ ହେବାପରେ ସେମାନଙ୍କ ୪ ଜଣ ସନ୍ତାନ ଅସହାୟ ହୋଇପଡିଛନ୍ତି।
ବଡବିଲ ଥାନା ଇନ୍ସପେକ୍ଟର ସୁଶାନ୍ତ ଦାଶ ଏହି ହତ୍ୟାକାଣ୍ଡ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ପୋଲିସ ଘଟଣାସ୍ଥଳକୁ ଯାଇ ଅଭିଯୁକ୍ତ କାଳିଆଙ୍କୁ କାବୁ କରିଛି। କେନ୍ଦୁଝରରୁ ସାଇଣ୍ଟିଫିକ ଟିମ୍ ଆସି ତଦନ୍ତ କରିବା ପରେ ମୃତଦେହକୁ ବ୍ୟବଚ୍ଛେଦ ଲାଗି ପଠାଯାଇଛି। ଏନେଇ ଥାନାରେ ଆଇପିସି ୩୦୨ ଦଫାରେ ଏକ ମାମଲା(ନଂ୧୮୪/୨୦୧୯) ରୁଜୁ କରାଯାଇଛି। ଅସହାୟ ହୋଇପଡ଼ିଥିବା ୪ ଶିଶୁଙ୍କୁ ଚାଇଲ୍ଡଲାଇନର ସହାୟତାରେ ଥାଇଥାନ ନିମନ୍ତେ ବ୍ୟବସ୍ଥା କରାଯିବ।
ଦେବକୀଙ୍କ ବଡ ଝିଅ ରିନୁ(୧୨) ପୋଲିସକୁ ଦେଇଥିବା ସୂଚନା ଅନୁଯାୟୀ ଗତ ୩ ବର୍ଷ ତଳେ ତାଙ୍କର ଗୋଡ ଭାଙ୍ଗିଯିବା ପରଠାରୁ ସେ ଆଉ ସ୍କୁଲ ଯାଇପାରୁ ନ ଥିଲେ। ତାଙ୍କ ସାନ ଭଉଣୀ ମିନୁ ମାମୁ ଘରେ ରହି ପାଠ ପଢୁଥିଲାବେଳେ ୩ ସାନ ଭାଇ ରବୀନ୍ଦ୍ର(୪), ବାଦଲ(୩) ଓ ଆକାଶ (୨) ଘରେ ରହୁଥିଲେ। ମା’ ବାପାଙ୍କ କଳି ସେମାନଙ୍କ ଜୀବନରେ ଦୁଃଖ ଆଣିଦେଇଛି ବୋଲି ରୀନୁ କହିଥିଲେ।
