ନୂଆପଡା ଅଫିସ,୧୧ା୮
ନୂଆପଡା ଭଳି ଉପାନ୍ତ ଜିଲାରେ ମାଓବାଦୀମାନେ ବିଭିନ୍ନ ସମୟରେ ଉପଦ୍ରବ ଚଳାଇଥିବାବେଳେ ଯୁବ ଗୋଷ୍ଠୀଙ୍କୁ ମୁଖ୍ୟ ସୋ୍ରତରେ ସାମିଲ କରିବାକୁ ଏଠାରେ ଅବସ୍ଥାପିତ ସିଆରପିଏଫ ୨୧୬ ବାଟାଲିୟନ ମୁଖ୍ୟ ଅଭିନବ ପ୍ରୟାସ ଚଳାଇଛନ୍ତି । ଜିଲାରୁ ସେନା ବାହିନୀରେ ଅଧିକରୁ ଅଧିକ ସଂଖ୍ୟାରେ ଯୁବବର୍ଗ ଉତ୍ସାହିତ ହୋଇ ଦେଶ ସେବାରେ ବ୍ରତୀ ହେବାକୁ ତାଲିମ ପ୍ରଦାନ କରାଯାଉଛି । ଜିଲାରୁ ନିକଟରେ ସିଏପିଏଫ ସିପାହୀରେ ସାମିଲ ହେବାକୁ ୧୩୦୦ ଯୁବକଙ୍କୁ ପରୀକ୍ଷା ପାଇଁ ଆବେଦନ କରାଇଥିଲେ । ତନ୍ମଧ୍ୟରୁ ବହୁ ଯୁବକ ଲିଖିତ ପରୀକ୍ଷାରେ ପାସ କରିଛନ୍ତି । ସେମାନଙ୍କ ଆଗକୁ ଶାରିରୀକ ପରୀକ୍ଷା ରହିଛି । ଏଥିରେ କିପରି ଅଧିକ ସଂଖ୍ୟକ ଯୁବକ ଉତ୍ତୀର୍ଣ୍ଣ କରିପାରିବେ ସେଥିପାଇଁ ତାଲିମ ପ୍ରଦାନ କରାଯାଇଛି । ସ୍ଥାନୀୟ ଏରୋଡ୍ରମ ପଡିଆରେ ଦିନକର ତାଲିମ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏଥିରେ କମାଣ୍ଡାଣ୍ଟ ରାଜେଶ ବତ୍ସ, ଆସିଣ୍ଟାଣ୍ଟ କମାଣ୍ଡାଣ୍ଟ ନରେନ୍ଦ୍ରସିଂ ପ୍ରମୁଖ ତାଲିମ ପ୍ରଦାନ କରିଥିଲେ। ଏଥିରେ ଜିଲାର ବିଭିନ୍ନ ପ୍ରାନ୍ତରୁ ମୋଟ ୨୯ଜଣ ଯୁବକ ତାଲିମ ନେଇଛନ୍ତି । ଯୁବକଙ୍କ ମଧ୍ୟରେ ଦେଶ ସେବାର ଭାବନା ଜାଗ୍ରତ କରିବା ସହ କର୍ମନିୟୋଜନ କରିବା ଏହାର ଲକ୍ଷ୍ୟ ବୋଲି କମାଣ୍ଡାଣ୍ଟ କହିଛନ୍ତି ।
