ଅହମଦାବାଦ,୭ା୭(ପି.ଟି.): ୨୦୧୦ରେ ସୂଚନା ଅଧିକାର କର୍ମୀ ଅମିତ ଜେଠଓ୍ବାଙ୍କୁ ଗୁଳିକରି ହତ୍ୟା କରାଯିବା ଘଟଣାରେ ସ୍ବତନ୍ତ୍ର ସିବିଆଇ କୋର୍ଟ ଶନିବାର ଭାଜପାର ପୂର୍ବତନ ଏମ୍ପି ଦିନୁ ସୋଲାଙ୍କି ସମେତ ୭ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଗିର୍ ଜଙ୍ଗଲାଞ୍ଚଳରେ ବେଆଇନ ଖଣି ଖନନର ଗୁମର ଖୋଲିବା ଲାଗି ଜେଠଓ୍ବା ପ୍ରୟାସ କରୁଥିବାବେଳେ ତାଙ୍କୁ ହତ୍ୟା କରାଯାଇଥିଲା। ସ୍ବତନ୍ତ୍ର ସିବିଆଇ ବିଚାରପତି କେ.ଏମ୍. ଡାଭେ ଜୁଲାଇ ୧୧ ତାରିଖରେ ଏହାର ଦଣ୍ଡ ଶୁଣାଣି କରିବେ।
ଗୁଜରାଟ ହାଇକୋର୍ଟ ଏହି ମାମଲାର ତଦନ୍ତ ଭାର ସିବିଆଇକୁ ପ୍ରଦାନ କରିଥିଲେ। ସୋଲାଙ୍କି ଗୁଜରାଟର ଜୁନାଗଡ଼ରୁ ୨୦୦୯ରୁ ୨୦୧୪ ମଧ୍ୟରେ ଏମ୍ପି ଥିଲେ। ସେ ଓ ତାଙ୍କ ଭାଇ ଶିବ ସୋଲାଙ୍କି ଏବଂ ଅନ୍ୟ ୫ ଅଭିଯୁକ୍ତଙ୍କ ବିରୋଧରେ ଅପରାଧ ଷଡ଼ଯନ୍ତ୍ର ଓ ହତ୍ୟା ମାମଲା ରୁଜୁ କରାଯାଇଥିଲା। ପ୍ରକାଶଥାଉ କି, ଜେଠଓ୍ବା ବେଆଇନ ଖଣି ଉତ୍ତୋଳନ ନେଇ ଜନସ୍ବାର୍ଥ ମାମଲା ରୁଜୁ କରିବା ପରେ ତାଙ୍କୁ ୨୦୧୦ ଜୁଲାଇ ୨୦ରେ ହାଇକୋର୍ଟ ବାହାରେ ଗୁଳିକରି ହତ୍ୟା କରାଯାଇଥିଲା।
