ସିଆର୍‌ପିଏଫ୍‌ର ନୂଆ ମୁଖ୍ୟ

ଦିଲ୍ଲୀକା ବାବୁ/ ଦିଲୀପ ଚେରିଏନ୍‌
ସିଆର୍‌ପିଏଫ୍‌ର ନୂଆ ମହାନିର୍ଦ୍ଦେଶକ ଭାବେ ୧୯୮୪ ବ୍ୟାଚ୍‌ ଆଇପିଏସ୍‌ ଅଫିସର ଏ.ପି. ମାହେଶ୍ୱରୀଙ୍କ ନିଯୁକ୍ତିରେ କେତେକ ସମୀକ୍ଷକ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ମାହେଶ୍ୱରୀ ଆଇଟିବିପି (ଭାରତ-ତିବ୍ବତ ସୀମା ପୋଲିସ) ମହାନିର୍ଦ୍ଦେଶକ ଏସ.ଏସ୍‌. ଦେଶଓ୍ବାଲଙ୍କଠାରୁ ଦାୟିତ୍ୱ ଗ୍ରହଣ କରିଛନ୍ତି, ଯିଏ ଗତମାସରେ ସିଆର୍‌ପିଏଫ୍‌ର ପୂର୍ବ ମହାନିର୍ଦ୍ଦେଶକ ରାଜୀବ ରାୟ ଭଟ୍ଟନାଗରଙ୍କ ସେବାନିବୃତ୍ତି ପରେ ସିଆର୍‌ପିଏଫ୍‌ର ଅତିରିକ୍ତ ଦାୟିତ୍ୱରେ ରହିଥିଲେ। ମାହେଶ୍ୱରୀ ଏବେ ୩.୨୫ ଲକ୍ଷ କର୍ମଚାରୀ ଥିବା ଭାରତର ସବୁଠୁ ବଡ଼ ଅର୍ଦ୍ଧସାମରିକ ବଳର ମୁଖ୍ୟ ହୋଇଛନ୍ତି। ସେ ଆଗାମୀ ବର୍ଷ ଅବସର ନେବା ପର୍ଯ୍ୟନ୍ତ ଦେଶର ମାଓବାଦବିରୋଧୀ ତଥା ଜମ୍ମୁ-କଶ୍ମୀରରେ ସନ୍ତ୍ରାସବାଦବିରୋଧୀ ଅଭିଯାନର ନେତୃତ୍ୱ ନେବେ। ସିଆର୍‌ପିଏଫ୍‌ରେ ଏହି ୟୁପି କ୍ୟାଡର ଅଧିକାରୀ ବିଭିନ୍ନ ପଦବୀରେ ୯ ବର୍ଷରୁ ଊର୍ଦ୍ଧ୍ୱ କାର୍ଯ୍ୟ କରିସାରିଥିବାବେଳେ ଏହା ତାଙ୍କର ତୃତୀୟ କାର୍ଯ୍ୟକାଳ। ସେ ପୋଲିସ ଅନୁସନ୍ଧାନ ଓ ବିକାଶ ବ୍ୟୁରୋର ଡି.ଜି., ସୀମା ସୁରକ୍ଷା ବଳର ସ୍ବତନ୍ତ୍ର ଡି.ଜି. (ଅପରେଶନ) ସହ ସିଆର୍‌ପିଏଫ୍‌ରେ ଆଇ.ଜି. (ଅପରେଶନ) ଏବଂ ଆଇ.ଜି. (ଶ୍ରୀନଗର ସେକ୍ଟର) ଭାବେ ସେବା କରିଛନ୍ତି। ଏହି ନିଯୁକ୍ତି ପୂର୍ବରୁ ସେ ସ୍ବରାଷ୍ଟ୍ର ମନ୍ତ୍ରଣାଳୟରେ ସ୍ବତନ୍ତ୍ର ସଚିବ (ଆଭ୍ୟନ୍ତରୀଣ ସୁରକ୍ଷା) ଭାବେ ଦାୟିତ୍ୱ ନିର୍ବାହ କରୁଥିଲେ। ତେବେ ଜଣେ ସ୍ବତନ୍ତ୍ର ସଚିବଙ୍କୁ ସିଆର୍‌ପିଏଫ୍‌ର ଡିଜି ଭାବେ ନିଯୁକ୍ତି ଦେବା ଅସ୍ବାଭାବିକ ମନେହୁଏ। ମାହେଶ୍ୱରୀଙ୍କୁ ତାଙ୍କ ସେବା ଲାଗି ଏପରିଭାବେ ପୁରସ୍କୃତ କରାଯାଇଥାଇପାରେ ବୋଲି ପର୍ଯ୍ୟବେକ୍ଷକମାନେ ମନେକରୁଛନ୍ତି।
ସିଆଇଡି ଲାଗି ବିବାଦ
ହରିୟାଣାର ଗୃହମନ୍ତ୍ରୀ ଅନିଲ ଭିଜ୍‌ ୧୯୮୪ ବ୍ୟାଚ୍‌ ଆଇପିଏସ୍‌ ଅଧିକାରୀ ତଥା ସିଆଇଡି ମୁଖ୍ୟ ଅନିଲ କୁମାର ରାଓଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବା ଲାଗି ରାଜ୍ୟ ଗୃହସଚିବଙ୍କୁ ଲିଖିତଭାବେ ଜଣାଇଛନ୍ତି। କେବଳ ଏତିକି ନୁହେଁ, ରାଓଙ୍କ ବଦଳରେ ସେହି ପଦବୀରେ ୧୯୮୪ ବ୍ୟାଚ୍‌ର ଆଉ ଜଣେ ଅଧିକାରୀ ଶ୍ରୀକାନ୍ତ ଯାଦବଙ୍କୁ ଅବସ୍ଥାପିତ କରିବାକୁ ମଧ୍ୟ ଦାବି କରିଛନ୍ତି। ଗୃହ ସଚିବ ଭିଜ୍‌ଙ୍କ ଦାବିକୁ ଗ୍ରହଣ କରିବେ ବୋଲି ମନେହେଉଛି। ରାଜ୍ୟ ସିଆଇଡିର କାର୍ଯ୍ୟଧାରାରେ ମନ୍ତ୍ରୀ ଅସନ୍ତୋଷ ପ୍ରକାଶ କରିବା ପ୍ରଥମ ଘଟଣା ନୁହେଁ। ଏହି ବିଭାଗକୁ କିଏ ଚଳାଇବ ସେ ନେଇ ତାଙ୍କର ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟରଙ୍କ ସହ ବି ବିବାଦ ଉପୁଜିଥିଲା। ବିଭାଗର କାର୍ଯ୍ୟରେ ଉନ୍ନତି ଆଣିବା ଲାଗି ଆବଶ୍ୟକ ପ୍ରସ୍ତାବ ଦେବାକୁ ସେ ବର୍ଦ୍ଧନଙ୍କ ଅଧ୍ୟକ୍ଷତାରେ ଏକ ତିନିଜଣିଆ କମିଟି ଗଠନ କରିଥିଲେ। ସିଆଇଡି ମୁଖ୍ୟମନ୍ତ୍ରୀଙ୍କ ଅଧୀନରେ ରହିବା ପରମ୍ପରା ରହିଆସିଛି, କିନ୍ତୁ ଭିଜ୍‌ଙ୍କ ମତ ଭିନ୍ନ। ଖଟ୍ଟର ସେହି ବିଭାଗ ଚଳାନ୍ତୁ ବୋଲି ସେ ଚାହାନ୍ତି ନାହିଁ। ଦୁର୍ଭାଗ୍ୟବଶତଃ ଗୃହମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ମଧ୍ୟରେ ଚାଲିଥିବା ବିବାଦରେ ଏବେ ସିଆଇଡି ମୁଖ୍ୟ ରାଓ ବଳିପଡିପାରନ୍ତି। ଏହି ଲଢ଼େଇରେ କିଏ ଜିତିବ ସେଥିରେ କିଛି ଫରକ ପଡିବନି, କିନ୍ତୁ ରାଜ୍ୟ ସିଆଇଡିର କାର୍ଯ୍ୟଧାରା ଏହାଦ୍ୱାରା ପ୍ରଭାବିତ ହେଉଛି।
ବିବାଦରୁ ବିଦା
ସମ୍ପ୍ରତି ମହାରାଷ୍ଟ୍ରରେ ବାବୁମାନଙ୍କର ଯେଉଁ ଅଦଳବଦଳ ହେଲା ସେଥିରେ ଗୋଟିଏ ଘଟଣାକୁ ଛାଡି ସେମିତି କିଛି ନୂଆକଥା ନ ଥିଲା। ମୁମ୍ବାଇ ମେଟ୍ରୋ ରେଲ କର୍ପୋରେଶନ (ଏମ୍‌ଏମ୍‌ଆର୍‌ସି)ର ପରିଚାଳନା ନିର୍ଦ୍ଦେଶକ (ଏମ୍‌ଡି) ଅଶ୍ୱିନୀ ଭିଦେଙ୍କୁ ରାଜ୍ୟ ସରକାର ବିଦା କରିଦେଲେ। ପର୍ଯ୍ୟବେକ୍ଷକମାନଙ୍କ କହିବା ଅନୁସାରେ ଯେବେଠୁ ଆଦିତ୍ୟ ଠାକ୍‌ରେ ରାଜ୍ୟ ସଂସ୍କୃତି ଓ ପରିବେଶ ମନ୍ତ୍ରୀ ହେଲେଣି, ସେବେଠୁ ଏପରି ହୋଇପାରେ ବୋଲି ଜଣାପଡ଼ୁଥିଲା। ଗତବର୍ଷ ମେଟ୍ରୋ ପ୍ରୋଜେକ୍ଟ ଲାଗି ମୁମ୍ବାଇର ଆରେ କଲୋନୀରେ ଗଛ କାଟିବାକୁ ନିର୍ଦ୍ଦେଶ ଦେଇଥିବାରୁ ଭିଦେଙ୍କୁ ବଦଳି କରିବା ଲାଗି ସେ ସାଧାରଣରେ ଦାବି କରିଥିଲେ। ଏହା ପାଖାପାଖି ସେହି ସମୟର ଥିଲା ଯେତେବେଳେ ରାଜ୍ୟରେ ସରକାର ଗଢିବା ଅନିଶ୍ଚିତତା ଭିତରେ ଥିଲା ଏବଂ ମହା ବିକାଶ ଅଘାଡି ସରକାର ଗଠନ ହୋଇ ନ ଥିଲା। ୧୯୮୮ ବ୍ୟାଚ୍‌ ଆଇଏଏସ ଅଧିକାରୀ ଭିଦେ ମେଟ୍ରୋ ଶେଡ୍‌ ପ୍ରୋଜେକ୍ଟର ଜଣେ ଦୃଢ ସମର୍ଥକ ଥିଲେ ଏବଂ ରାଜନୈତିକ ଦଳ ଓ ଗ୍ରୀନ କାର୍ଯ୍ୟକର୍ତ୍ତାମାନଙ୍କ ଆକ୍ରୋଶର ଶିକାର ହୋଇଥିଲେ। ତାଙ୍କ ସ୍ଥାନରେଏବେ ମହାରାଷ୍ଟ୍ର ସଡ଼କ ପରିବହନ ନିଗମର ଉପାଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ ଥିବା ରଣଜିତ୍‌ ସିଂ ଦେଓଲଙ୍କୁ ଅବସ୍ଥାପିତ କରାଯାଇଛି। କୌତୂହଳର କଥା ହେଉଛି ସେ ପ୍ରମୁଖ ସଚିବ ଭାବେ ପଦୋନ୍ନତି ପାଇବାର କିଛିଦିନ ପରେ ଏହି ବଦଳି କରାଯାଇଛି।
Email: dilipcherian@gmail.com


Enter your email to get our daily news in your inbox.

All Right Reserved By Dharitri.Com

ଅବାସ୍ତବ ଚାଷୀଙ୍କ ଆୟବୃଦ୍ଧି ଲକ୍ଷ୍ୟ

ତତ୍ତ୍ୱ ଓ ତର୍କ/ ବିମଳ ପାଣ୍ଡିଆ ଚାଷୀଙ୍କ ଆୟ ୬ ବର୍ଷରେ ଦୁଇଗୁଣା ବଢ଼ିବ କି ନାହିଁ ତାହାକୁ ନେଇ ଚିନ୍ତା କରିବା ପ୍ରାୟ ସମସ୍ତେ...

ପିଲାଙ୍କୁ ଅବୋଧ୍ୟ ବୁଢ଼ାଙ୍କ ଭାଷା

ଇଂ. ହାଡ଼ିବନ୍ଧୁ ଖଣ୍ଡୁଆଳ ବେଳେ ବେଳେ ଆମେ ଶୁଣିବା ପୁରୁଖା ଲୋକମାନେ ଏହିପରି କଥାବାର୍ତ୍ତା ହେଉଥିବେ- ଆଗେ ଶସ୍ତା ଯୁଗ ଥିଲା। ଭରଣେ ଧାନ ବିକିଲେ...

ଏଇ ଭାରତରେ

ସାମ୍ପ୍ରତିକ ସମୟରେ ଡିଜିଟାଲ ଶିକ୍ଷାର ଆବଶ୍ୟକତାକୁ ଉପଲବ୍ଧି କରି ଝାଡଖଣ୍ଡର ଜଣେ ଯୁବକ ଗ୍ରାମାଞ୍ଚଳ ପିଲାମାନଙ୍କୁ ସୌରଚାଳିତ ଭ୍ରାମ୍ୟମାଣ କମ୍ପ୍ୟୁଟର କ୍ଲାସ୍‌ ମାଧ୍ୟମରେ ଶିକ୍ଷା ଦେଉଛନ୍ତି।...

ମରିସସ୍‌ର ପ୍ରଧାନମନ୍ତ୍ରୀ

ବ୍ୟକ୍ତିତ୍ୱ/ ଜିତେନ୍ଦ୍ର କୁମାର ନାୟକ ଆଫ୍ରିକାର ଏକ ସ୍ଥାୟୀ ଗଣତନ୍ତ୍ର ଭାବେ ମରିସସ୍‌ ଜଣାଶୁଣା। ୧୯୬୮ରେ ବ୍ରିଟେନରୁ ଏହା ସ୍ବାଧୀନତା ପାଇଥିଲା। ଭାରତ ଭଳି ଏହାର...

ଅର୍ଥନୀତିକୁ ଦେଖ

ବିଶ୍ୱ ଅର୍ଥନୀତି ଏବେ ମାନ୍ଦାବସ୍ଥା ଦେଇ ଗତି କରୁଛି। ଆମେରିକା ଭଳି ବିକଶିତ ରାଷ୍ଟ୍ର ମଧ୍ୟ ବିଭିନ୍ନ ପ୍ରକାର ଆର୍ଥିକ ସମସ୍ୟାରେ ପଡ଼ିଲାଣି। ଚାଇନା ସହ...

ଏଇ ଭାରତରେ

ଆସାମର ଗୋଟିଏ ଗଁାରେ ମୁସଲମାନ ସମ୍ପ୍ରଦାୟର ଲୋକେ ଜଣେ ହିନ୍ଦୁ ବ୍ୟକ୍ତିଙ୍କ ଅନ୍ତିମ ସଂସ୍କାର କରି ଉଦାହରଣ ସୃଷ୍ଟି କରିଛନ୍ତି। ଏହି ରାଜ୍ୟର କାମରୂପ ଜିଲାର...

ଉତ୍ସର୍ଗୀକୃତ ଡାକ୍ତର

କୋଭିଡ୍‌-୧୯ ମୁକାବିଲା ଦିଗରେ ଡାକ୍ତରମାନେ ସର୍ବାଧିକ ସେବା କରି ଅନନ୍ୟ ଉଦାହରଣ ସୃଷ୍ଟି କରିପାରିଛନ୍ତି। ଭାରତୀୟ ବଂଶୋଦ୍ଭବ ଡାକ୍ତର ରବି ସୋଲାଙ୍କି ବ୍ରିଟେନ୍‌ରେ କରୋନା ପ୍ରତିହତ...

ବିନିବେଶରେ ଭୁଲ୍‌ ଠିକ୍‌

ଡ. ଭରତ ଝୁନ୍‌ଝନ୍‌ଓ୍ବାଲା ଭାରତ ପେଟ୍ରୋଲିୟମ, ଶିପିଂ କର୍ପୋରେଶନ ଓ କନ୍‌କୋର ଭଳି ତିନୋଟି ବୃହତ୍‌ ରାଷ୍ଟ୍ରାୟତ୍ତ ଉଦ୍ୟୋଗ (ପିଏସ୍‌ଇ)ର ଘରୋଇକରଣ ଲାଗି କେନ୍ଦ୍ର ସରକାର...

Coronavirus Update


Archives

Model This Week

Why Dharitri