ନୂଆଦିଲ୍ଲୀ, ୨୧।୪-କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ସ୍ଥିିତିରେ ଅଲିମ୍ପିକ୍ସ ବ୍ରୋଞ୍ଜ ମେଡାଲିଷ୍ଟ ସାକ୍ଷୀ ମଲିକ ନିଜକୁ ଫିଟ୍ ରଖିବା ପାଇଁ ଏବେ ‘ଦେଶୀ ପହେଲିୱାନୀ’ ପନ୍ଥା ଅବଲମ୍ବନ କରିଛନ୍ତି। ସେ ଗତ କିଛିଦିନଧରି ଏକ ଲମ୍ବା ଦଉଡ଼ି ଓ ବଡ଼ କାଠଗଡ଼ ସହାୟତାରେ ରୋହତକର ମୋଖରା ଗ୍ରାମରେ ଥିବା ପୁରୁଣା ଏବଂ ଅବ୍ୟବହୃତ ଆଖଡ଼ାର ମାଟିକୁ ସମାନ କରିବାରେ ଲାଗିଛନ୍ତି। ନିଜ କୋଚ୍ଙ୍କ ସହ ଫୋନ୍ରେ କଥା ହୋଇ ସାକ୍ଷୀ ଏହି କାର୍ଯ୍ୟ କରି ଚାଲିଛନ୍ତି। ଲକ୍ଡାଉନ୍ ସ୍ଥିତିରେ ଅଭ୍ୟାସ ପାଇଁ ପାର୍ଟନର ପାଉ ନାହାନ୍ତି ଏହି ତାରକା କୁସ୍ତିବିତ୍। ତେଣୁ ଆଧୁନିକ ଯୁଗର ଟ୍ରେନିଂ ସରଞ୍ଜାମକୁ ଛାଡ଼ି ସେ ଦେଶୀ ପହେଲୱାନୀ ବାଟରେ ଯିବାକୁ ନିଷ୍ପତ୍ତି ନେଇଛନ୍ତି। ”ଏବେ ମୁଁ କେବଳ ଦେଶୀ ଷ୍ଟାଇଲ୍ ଆପଣାଉଛି। ମୋ ଘର ପଛପଟରେ ଏକ ଆଖଡ଼ା ଅଛି। ମୁଁ ଏହାକୁ ପୂର୍ବରୁ କେବେହେଲେ ବ୍ୟବହାର କରି ନ ଥିଲି। ମାତ୍ର ବର୍ତ୍ତମାନ ମୁଁ ଏହାର ଗେଟ୍ ଖୋଲି ସକାଳେ ଏବଂ ସନ୍ଧ୍ୟାରେ ଅଭ୍ୟାସ କରୁଛି। ଏଥିପାଇଁ କଠିନ ପରିଶ୍ରମ କରିବାକୁ ପଡ଼ୁଛି ଏବଂ ଏହା ସମୟ ସାପେକ୍ଷ। ମାତ୍ର ମୁଁ ଏହାକୁ ଉପଭୋଗ କରୁଛି“ ବୋଲି ସାକ୍ଷୀ ପ୍ରକାଶ କରିଛନ୍ତି। ମାଟି ଉପରେ ବଡ଼ କାଠଗଡ଼କୁ ଟାଣିବା ଛଡ଼ା ମୁଁ ରନିଂ, ଯୋଗ ଏବଂ ଷ୍ଟ୍ରେଚିଂକୁ ଦୈନନ୍ଦିନ କାର୍ଯ୍ୟସୂଚୀରେ ସାମିଲ କରିଛି“ ବୋଲି ରିଓ ଅଲିମ୍ପିକ୍ସ ବ୍ରୋଞ୍ଜ ମେଡାଲିଷ୍ଟ ପ୍ରକାଶ କରିଛନ୍ତି ।
