ଅନୁଗୋଳ ଅଫିସ, ୨୩।୪: କରୋନା ଭୂତାଣୁ ରୋକିବାକୁ ଅନୁଗୋଳ ପୌରାଞ୍ଚଳରେ ଚାଲିଥିବା ସାନିଟାଇଜ୍ ପ୍ରକ୍ରିୟାରେ ଏବେ ପଲିଟିକ୍ସ ପଶିଯାଇଛି। ବୁଧବାର ଏହି କାର୍ଯ୍ୟକୁ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ବନ୍ଦ କରାଇବା ପରେ ଏପରି ଅଭିଯୋଗ ପଦାକୁ ଆସିଛି। ନଗର କଂଗ୍ରେସ ପକ୍ଷରୁ ଏହି ସାନିଟାଇଜ୍ କରାଯାଉଥିବା ପୂର୍ବତନ କାଉନସିଲର ବଲବୀର ସିଂହ ଦାବି କରିବା ସହ ବିଜେଡି ଚାପରେ ପୌର ନିର୍ବାହୀ ଅଧିକାରୀ ଏଥିରେ ରୋକ୍ ଲଗାଇଥିବା ଅଭିଯୋଗ କରିଛନ୍ତି। ତେବେ ସରକାରୀ କାର୍ଯ୍ୟକୁ ଅପହରଣ କରି ନଗର କଂଗ୍ରେସ ଏହାକୁ ନିଜ ଦଳର କାମ ବୋଲି କହୁଥିବା ବିଜେଡି ପକ୍ଷରୁ କୁହାଯାଇଛି।
ପୂର୍ବତନ କାଉନସିଲର ସିଂହ କହିଛନ୍ତି, ସାମାଜିକ ଦୂରତା ରକ୍ଷା କରି ସହରରେ ଥିବା ବିଭିନ୍ନ ୱାର୍ଡକୁ ସାନିଟାଇଜ୍ କରିବାକୁ କରୋନାର ନୋଡାଲ ଅଧିକାରୀ ତଥା ପିଡି ଅତୁଲ୍ୟ କୁମାର ଚମ୍ପତ୍ତିରାୟଙ୍କ ନିକଟରୁ ନଗର କଂଗ୍ରେସ ଅନୁମତି ନେଇଥିଲା। ଦୁଇଦିନ ଧରି ସହରର ୨୩ ନମ୍ବର ୱାର୍ଡକୁ ସାନିଟାଇଜ୍ କରାଯାଉଥିଲା। ହେଲେ ବୁଧବାର ଉକ୍ତ ୱାର୍ଡର ହାତୀଶାଳପଡ଼ାରେ ସାନିଟାଇଜ୍ ସମୟରେ ପୌର ନିର୍ବାହୀ ଅଧିକାରୀ ପଣ୍ଡା ଫୋନ କରି ଏପରି କାର୍ଯ୍ୟ ବନ୍ଦ କରିବାକୁ କହିଥିଲେ। ବିପତ୍ତି ସମୟରେ ସମସ୍ତେ ପରସ୍ପରକୁ ସହଯୋଗ କରିବାକୁ ଆଗେଇ ଆସୁଥିବା ବେଳେ ନିର୍ବାହୀ ଅଧିକାରୀ ସାନିଟାଇଜ୍ ବନ୍ଦ କରାଇବା ପଛରେ ବିଜେଡିର ଚାପ ରହିଛି। ଏହାକୁ କଂଗ୍ରେସ କର୍ମୀମାନେ ନିନ୍ଦା କରିଛନ୍ତି। ଏ ସମ୍ପର୍କରେ ପୌର ନିର୍ବାହୀ ଅଧିକାରୀ ପଣ୍ଡା କହିଛନ୍ତି, ସହର ସାନିଟାଇଜ୍ କରିବା ଦାୟିତ୍ୱ ଅଗ୍ନିଶମ ବିଭାଗର। ଯେଉଁଠାରେ ଏହା ଆବଶ୍ୟକ ପଡ଼ିବ ଅଗ୍ନିଶମ ବିଭାଗର କର୍ମଚାରୀମାନେ ତାହା କରିବେ। କରୋନା ନୋଡାଲ ଅଧିକାରୀ ତଥା ପିଡି ଚମ୍ପତ୍ତିରାୟ କହିଛନ୍ତି, ଏଥିପାଇଁ ନଗର କଂଗ୍ରେସକୁ ଅନୁମତି ଦିଆଯାଇ ନ ଥିଲା। ଉକ୍ତ ଚିଠି ପୌରନିର୍ବାହୀ ଅଧିକାରୀଙ୍କୁ ମାର୍କ କରି ପଠାଯାଇଥିଲା। ଅନୁଗୋଳ ଜିଲା ବିଜେଡି ସଭାପତି ମହେନ୍ଦ୍ର ବସ୍ତିଆ କହିଛନ୍ତି, ସରକାରୀ ଅର୍ଥରେ ପୌରପାଳିକା ପକ୍ଷରୁ ସାନିଟାଇଜ୍ କାର୍ଯ୍ୟ ଚାଲିଥିଲା। ହେଲେ ପୌରପାଳିକାର ସାନିଟାଇଜ୍ ଗାଡ଼ିରେ ଜବରଦସ୍ତି ଦଳୀୟ ପୋଷ୍ଟର ମରାଯାଇ ତାହାକୁ ନଗର କଂଗ୍ରେସର କାର୍ଯ୍ୟ ବୋଲି ପ୍ରଚାର କରାଯାଉଥିଲା। ତେଣୁ ଏହାକୁ ବିରୋଧ କରାଯାଇଥିବା ବସ୍ତିଆ ପ୍ରକାଶ କରିଛନ୍ତି।
