ଭୁବନେଶ୍ୱର,୩୧ା୮(ବ୍ୟୁରୋ): ସହରାଞ୍ଚଳ ସ୍ବାସ୍ଥ୍ୟ ବ୍ୟବସ୍ଥା ସଂକ୍ରାନ୍ତରେ ଶୁକ୍ରବାର ସ୍ଥାନୀୟ ଏକ ହୋଟେଲରେ କର୍ମଶାଳା ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ ସ୍ବାସ୍ଥ୍ୟ ମିଶନ ନିର୍ଦ୍ଦେଶିକା ଶାଳିନୀ ପଣ୍ଡିତ ଯୋଗଦେଇ କୈଶୋର ସ୍ବାସ୍ଥ୍ୟରେ ଉନ୍ନତି ଆଣିବା ସହିତ ଲୋକଙ୍କ ଚାହିଦାକୁ ଦେଖି ଗୋଷ୍ଠୀ ସ୍ତରରେ ଅଧିକ ସଚେତନ ଆବଶ୍ୟକ ବୋଲି ମତବ୍ୟକ୍ତ କରିଛନ୍ତି। ସେ କହିଛନ୍ତି, ମାତୃ ଓ ଶିଶୁ ମୃତ୍ୟୁହାର, ଆନୁଷ୍ଠାନିକ ପ୍ରସବ କ୍ଷେତ୍ରରେ ଯଥେଷ୍ଟ ଉନ୍ନତି ଘଟିଥିଲେ ମଧ୍ୟ ସହର ଓ ଗ୍ରାମାଞ୍ଚଳ ମଧ୍ୟରେ ପାର୍ଥକ୍ୟ ରହୁଛି। ବର୍ତ୍ତମାନ ସ୍ଥିତିକୁ ଦେଖି ୟୁଏସ୍ଏଡ୍, ବିଲ୍ ଆଣ୍ଡ ମେଲିଣ୍ଡା ଗେଟ୍ସ ଫାଉଣ୍ଡେଶନ ଏବଂ ଅନ୍ୟ ସଂସ୍ଥା ସହାୟତାରେ ସହରାଞ୍ଚଳର ଗରିବ ଲୋକଙ୍କୁ ଉନ୍ନତ ସ୍ବାସ୍ଥ୍ୟ ସେବା ଯୋଗାଇ ଦେବାକୁ ପ୍ରୟାସ ହେବ। ପୁରୀ, ରାଉରକେଲା ଓ ବ୍ରହ୍ମପୁର ସହରର ଗରିବ ଲୋକଙ୍କ କ୍ଷେତ୍ରରେ ଟିସିଆଇଏଚ୍ସି ଦ୍ୱାରା ପରିବାର ନିୟନ୍ତ୍ରଣ ଏବଂ ମାତୃ ସ୍ବାସ୍ଥ୍ୟସେବା ବ୍ୟବସ୍ଥାକୁ ସୁଦୃଢ଼ କରାଯାଉଛି ବୋଲି ପଣ୍ଡିତ ସୂଚନା ଦେଇଛନ୍ତି।
ଜାତୀୟ ସ୍ବାସ୍ଥ୍ୟ ମିଶନ, ଟିସିଆଇଏଚ୍ସି, ପିଏସ୍ଆଇର ମିଳିତ ସହଯୋଗରେ ଆୟୋଜିତ ଏହି କର୍ମଶାଳାରେ ‘ଟୁଲ କିଟ୍ସ’ ଉନ୍ମୋଚିତ ହୋଇଥିଲା। ସହରାଞ୍ଚଳର ଗରିବ ଲୋକେ କିଭଳି ସୁବିଧାରେ ସ୍ବାସ୍ଥ୍ୟସେବା ପାଇପାରିବେ ସେନେଇ ଆଲୋଚନା କରାଯାଇଥିଲା। ଏଥିରେ ଏମ୍ସିଏସ୍ସି ଗ୍ଲୋବାଲ କାର୍ଯ୍ୟକ୍ରମର ଆମେରିକୀୟ ପ୍ରତିନିଧି ପାଟ୍ରିସିଆ, ଏ. ଟେଲର, ଜାତୀୟ ସ୍ବାସ୍ଥ୍ୟ ମିଶନର ଅତିରିକ୍ତ ଏମ୍ଡି ମୃଣାଳକାନ୍ତି ଦାଶ, ରାଜ୍ୟ କାର୍ଯ୍ୟକ୍ରମ ପରିଚାଳକ (ସହରାଞ୍ଚଳ) ସୁକାନ୍ତ କୁମାର ମିଶ୍ର ପ୍ରମୁଖ ଉପସ୍ଥିତ ଥିଲେ।
