କ୍ରିସ୍ମାସ୍ ବା ବଡଦିନ ଖ୍ରୀଷ୍ଟଧର୍ମାବଲମ୍ବୀଙ୍କ ଲାଗି ଏକ ମହାନ୍ ଦିନ। ଏହି ଦିନକୁ ସ୍ମରଣୀୟ କରିବା ଲାଗି ସମଗ୍ର ବିଶ୍ୱରେ ବିଭିନ୍ନ କାର୍ଯ୍ୟକ୍ରମମାନ ଆୟୋଜନ କରାଯାଇଥାଏ। ଠିକ୍ ସେହିଭଳି କ୍ରିସ୍ମାସ୍ ଅବସରରେ ଓଡିଶାର ପ୍ରସିଦ୍ଧ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ବାଲିରେ ନିର୍ମାଣ କରିଥିଲେ ସାନ୍ତାକ୍ଲଜଙ୍କ ବୃହତ୍କାୟ ପ୍ରତିକୃତି। ଏଥିରେ ସେ ବାଲି ସହ ୧୦ ହଜାର ବର୍ଜ୍ୟ ପ୍ଲାଷ୍ଟିକ ବୋତଲ ମଧ୍ୟ ବ୍ୟବହାର କରିଥିଲେ। ୧୦୦ ଫୁଟ ପ୍ରସ୍ଥ ଏବଂ ୩୦ ଫୁଟ ଉଚ୍ଚତା ବିଶିଷ୍ଟ ଏହି ସାନ୍ତାକ୍ଲଜ୍ ସୃଷ୍ଟି କରିଛି ରେକର୍ଡ। ୨୦୧୮ ମସିହାରେ ପୁରୀ ବେଳାଭୂମିରେ ସେ ଏହି ବାଲୁକାକଳା ନିର୍ମାଣ କରି ପ୍ଲାଷ୍ଟିକ ପ୍ରଦୂଷଣ ସମ୍ପର୍କରେ ବିଶ୍ୱବାସୀଙ୍କୁ ସଚେତନତାର ବାର୍ତ୍ତା ପ୍ରେରଣ କରିଥିଲେ। ସେହିଭଳି ୨୦୧୭ ମସିହାରେ ୨୫ ଫୁଟ ଉଚ୍ଚ ଏବଂ ୫୦ ଫୁଟ ଓସାର ବିଶିଷ୍ଟ ସାନ୍ତାକ୍ଲଜ୍ର ଏକ ବିଶାଳ ମୁହଁ ନିର୍ମାଣ କରି ସେ ଆଉ ଏକ କୀର୍ତ୍ତିମାନ ସୃଷ୍ଟି କରିବାରେ ସଫଳ ହୋଇଥିଲେ।
