ରୂପ୍ସା, ୨୦।୯(ଡି.ଏନ୍.ଏ.)- ବାଲେଶ୍ୱର ସଦର ବ୍ଲକ ଆଙ୍କୋ ପଞ୍ଚାୟତ ଅନ୍ତର୍ଗତ ପଦ୍ମପୋଖରୀ ଆଡ଼ିରେ ଜବରଦଖଲ ନେଇ ଉତ୍ତେଜନା ଲାଗି ରହିଛି। ସ୍ଥାନୀୟ ଲୋକେ ଏହି ସରକାରୀ ଜମିରେ ଖୁଣ୍ଟ ପୋତି ନିଜ ଦଖଲରେ ଘର ନିର୍ମାଣ ପାଇଁ ମସୁଧା କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ପଞ୍ଚାୟତର ଏହି ବିଶାଳ ପୋଖରୀ ହତ୍ପିଣ୍ଡ ସଦୃଶ। ପୋଖରୀର ଦକ୍ଷିଣପାର୍ଶ୍ୱରେ ରହିଛି ଶ୍ମଶାନ। ଉତ୍ତରପଶ୍ଚିମ ପଟେ ରହିଛି ରୂପ୍ସା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର। ପୂର୍ବପାର୍ଶ୍ୱରେ ପଦ୍ମକିଶୋର ମହାଦେବ ମନ୍ଦିର। ଏହାଛଡ଼ା ପଶ୍ଚିମ-ଉତ୍ତର କୋଣରେ ଖୋଦ୍ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ। ଉତ୍ତରପଟେ ଗ୍ରାମର ଯୁବକଙ୍କୁ ନେଇ ଗଢ଼ି ଉଠିଥିବା ଏକ କ୍ଲବର ଅଫିସ୍ ଗୃହ।
ରାବଣପୋଡ଼ି ଉତ୍ସବରେ ପୋଖରୀ ଚତୁଃପାର୍ଶ୍ୱରେ ହଜାରରୁ ଊର୍ଦ୍ଧ୍ୱ ମହିଳାପୁରୁଷ ସମବେତ ହୋଇଥାନ୍ତି। ଜବରଦଖଲ ଯୋଗୁ ପୋଖରୀର ସୌନ୍ଦର୍ଯ୍ୟ ନଷ୍ଟ ସାଙ୍ଗକୁ ଶ୍ମଶାନ ଯିବା ରାସ୍ତା ମଧ୍ୟ ଅବରୋଧ ହେଉଥିବା ଦେଖିବାକୁ ମିଳିଛି। ଶ୍ମଶାନ ଯିବା ରାସ୍ତାରେ ଜଣେ ବ୍ୟକ୍ତି ସରକାରୀ ଜାଗାରେ ଜବରଦସ୍ତ ଇଟାକାନ୍ଥ ଦେଇ ଦୋକାନଘର ନିର୍ମାଣ କରିଥିବା ଯୋଗୁ ଏଭଳି ପରିସ୍ଥିତି ଉପୁଜିଛି। ଏବେ ପୋଖରୀର ପଶ୍ଚିମପଟରେ ଥିବା ମେଡିକାଲ ଯିବା ରାସ୍ତାପାର୍ଶ୍ୱ ବହୁ ଜାଗାରେ ଖୁଣ୍ଟ ପୋତାଯାଇ ବାଡ଼ କରାଯାଇଛି। ରାଜସ୍ବ ନିରୀକ୍ଷକଙ୍କ ଅଫିସକୁ ଲାଗି ରହିଥିବା ଗୋଚର, ରକ୍ଷିତ ଓ ଅନାବାଦୀ କିସମର ସରକାରୀ ଜାଗା ଜବରଦଖଲକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବା ପ୍ରଶାସନର କାର୍ଯ୍ୟଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ଜନସାଧାରଣ ତଥା ଅଞ୍ଚଳବାସୀ ସମୂହଙ୍କ ସ୍ବାର୍ଥକୁ ଦୃଷ୍ଟିରେ ରଖି ତୁରନ୍ତ ଜବରଦଖଲ ଉଚ୍ଛେଦ ଦିଗରେ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରା ନ ଗଲେ ଜୋର୍ଦାର ଆନ୍ଦୋଳନ ହେବ ବୋଲି ସାମାଜିକ କର୍ମୀ ଜୟକୃଷ୍ଣ ବେହେରା, ୱାର୍ଡ଼ସଭ୍ୟା ରଞ୍ଜୁଲତା ହାତୀ, ନିରୁପମା ପାଣିଗ୍ରାହୀ, ୱାର୍ଡ଼ସଭ୍ୟ ଗିରୀଶ ବେହେରାଙ୍କ ସମେତ ଗ୍ରାମବାସୀ ଚେତାବନୀ ଦେଇଛନ୍ତି। ଏ ସମ୍ପର୍କରେ ଆର୍ଆଇ ପୂର୍ଣ୍ଣଚନ୍ଦ୍ର ମଲିକଙ୍କୁ ପଚରାଯିବାରୁ ୧୮ଜଣଙ୍କ ନାମରେ ସରକାରୀ ଜମି ଅବରୋଧ ମାମଲା ରୁଜୁ ହୋଇଛି। ସେମାନଙ୍କୁ ଜାଗା ଛାଡ଼ିବା ପାଇଁ ବିଭାଗ ପକ୍ଷରୁ ନୋଟିସ ମଧ୍ୟ ହୋଇଛି।
